Read Lautu Chin Lucuotuv 16 Bible Online

Lucuotuv 16 - Lautu Chin bible

Lucuotuv 16

¹Paul ca Derbe khy hne Listra khy luo kha a va chiy. Capa lieca Khrihsaa a cuopa, a ming Timote ama tapa kha a aw. A nung ca Judah ming, zangtuv pakha ta cuote, cuorasala a paa ca Grik ming ta a cuo.

²Listra hne Ikonium lie a awpa zangtuv tie[52] ta ama ca a thuophaa ama risapa ta a cuo.

³Paul ta Timote ca aa chiyle khing nakawta a vangdaw a pate sa, tahematapakieca a paa Grik ming a cuopa kha capa lie a awpa Judah ming khata ama pachang.

⁴Khykha hnang khykha ta ama tlawle pa khata, Jerusalem lie a awpa lucuotuv tie hne khrihsaa uvthyi tie ta ama za chi ciepa phung kha ziy riypata iema kha ama changle.

⁵Cacuonakawta khrihsaabuv ca zangna lie kya cahra vie hryly yite ning kha hnang ning kha mingluv zaw ama hluv hryly.

⁶Asia ruo chunglie kha Thlaapa Pathe ta thuophaabie ri riypata a pa-aw li nakawyita Frizia ruo hne Galatia ruo chung kha khy ama tlaw.

⁷Misia ruoriy ama pha pa khata Bithinia ruo chung luo kha a ngie amaa ting. Cuorasala Zingsuv Thlaapa ta pa-aw vayi.

⁸Cacuonakawta Troas luo kha ama sibung.

⁹Zuo ta Paul ca muocuo a hmung: Masidonia cawsaa pakha a daa te ama kha “Masidonia luo a vaw la malie a vya bya tie,” a ta.

¹⁰Paul ta muocuo a hmung khu taata Masidonia luo si riypa kha maa pachie paluo, tahematapakieca Khazing na iema'a luo thuophaabie phu riypata malie a ku tapa kha ma pachangpasie.

¹¹Troas taata tiypalaw ta a tha pate Samothrasia luo kha a dangsa pata ma si. A mawluopa ta Neapolis luo ma chiy.

¹²Ama taacata Rom uvna ruo chung, Masidonia pe[53] chunglie ta khypuv ta a cuopa Filipi khy luo ma chiy. Capa khy lieca ningcuo syipuv ma aw.

¹³Sabbath ning ca khychung taakhata pya pate cavaa kie luo ma cakuo. Capa lieca thlaachuona hmang a aw thlu'a tapata ma rue. A tu pate capa lie a hmyapa canung zaw hne cata bie ma ri.

¹⁴Lidia ama ta nung, Khazing abiepa pakha ca ma bie kha naa a thlie ra. Ama ca Thiatira khy ming ta cuote caw sedungpa a zaanung ta a cuo. Paul ta a ripa bie kha hmisi ta naathlie riypata Abyipa ta a pathiypalung a pahaw nung tana a cuo.

¹⁵Ama hne a ingchungkhue tie tiy amaa naw khu taata, Lidia ta, “Abyipa a zang hrahring tapata ina ruepa ung cata a cuo kieca, a vaw ungla i ing luo kha a vya pahy tie ung,” tapata kiema kha paa malie a kie.

¹⁶Ningkha ca thlaachuona hmang luo ma vaa pata hmie luo kaw a ri khupa thlaapa a hryipa siicanung nung hneta maa taw. Hmie luo kaw a rilu khunapa khata a ziybyi tie kha tuokaa a hluvsa a hmungpa yi.

¹⁷Paul hne kiema malie a vya ziypuole pata, “Hing cawsaa zaw hing Cungnungce Khazing sii, khuona thuophaabie niema'a luo[54] a phutuv tie tana ama cuo,” a ta.

¹⁸Ning hluvpuv cahaa cata a ta. Cuorasala Paul ca a hihaasa pata thlaapa kha a pali hnue te, “Hingpa nung chung taahingta pya riypatana bie ica pi,” a ta. A ta khupa tahne ta thlaapa ca a pya.

¹⁹Ama a hnyituvpa tie ta ma tuokaa hmungnapa na a ra tli tapa kha ama hmung tiyta Paul hne Silas kha patuv yite chadawtluo luo, nawhnyituv tie hmiekung luo kha amaa dale.

²⁰Bieripatuv byi zaw hmiekung luo kha chiykhyi yite, “Hing cawsaa zaw hing Judah ming ta cuo yite, ma khypuv chunglie hnaahnawnapa a chiykhyituv tana ama cuo,

²¹kiema Rom ming ta maa paw khu li riypa hne ma ziy khu li riypa, phung kha ri yite a daakhyipa tana ama cuo,” ama ta.

²²Cawsaazaapuv ca Paul hne Silas a duna kuo luo khata ama aw diy. Bie ripatuv byi tie khata ama caw thlie pata asung ta tuv riypata naw ama pi.

²³Khuopuv ta ama tuv khu taata, thaw pathla yite, thaw-ing byipa kha a phata tah pahuo sa riypata naw ama pi.

²⁴Naw ama pipa haakhata thaw-ing aa thuvcena khuo chunglie kha chi yite ama phyi kha akyi ama de.

²⁵Zuocang hraw khiy taca Paul hne Silas ca thlaachuona hne hlaasana ta Khazing kha pathuosa yite thaw a tlapa tie ta naa ama thlie.

²⁶Sungkhapuv ta aling khuosa ta a siy te thaw-ing ca a thabaw te ta a cahang; thlaluo-aw bangkhuo a pahaw te thaw a tlapa tie thaabuoliriy bangkhuo kha ama kuv taata aa pathluo diy.

²⁷Thaw-ing byipa ca a kya cha te thaw-ing thlaluo-aw bangkhuo aa pahawpa kha a hmung tiyta thaw a tlapa tie na a ruo diy tli yi tapata a rue nakawta a zueziy kha a da te ama hne ama kha a thie a nang.

²⁸Cuorasala Paul kha khuopuv ta khi te, “Nama hne nama kha ruvnaana a pi kha, ma bangkhuo ta ma aw diy tli hing,” a ta.

²⁹Thaw-ing byipa cata, myi vya cyi ungla ta yite, thaw-ing chung luo kha a ruo te, a cathangsapuo pata Paul hne Silas phyi thabaw lie kha a vaa bu.

³⁰Cakhutaata ale luo pyakhyi yite, “I byipaa zaw, khuona hmung riypata khaapama i tue aa? a ta yi.

³¹Iema ta, “Abyipa Zingsuv kha zang la nama hne na ingchungkhue hneta khuona na hmung aa,” ama ta.

³²Abyipa bie[55] ca ama hne a ing chunglie a awpa bangkhuo kha ama chang.

³³Capa zuopa cata ama hmaa kha pasiypa yite cakhutaata ama hne a ingchungkhue bangkhuo ta tiy amaa naw paluo.

³⁴Iema kha ing luo a chiy yite sa a pi yi. Ama ta Khazing kha a zang nakawta ama hne a ingchungkhue bangkhuo ta ama palung a tluo hringhruo.

³⁵A mawluopa ta bieripatuv byi tie khata paliy tie kha vya pathlie yite, “Khapa cawsaa tie kha za pathlie yi se,” ama ta.

³⁶Canakaw cata thaw-ing byipa ta Paul kha chang te, “Bieripatuv byi tie na niema kha pathlie riypata bie naa vya taa yi, cacuonakawta kya pya ungla diena hne cakuo tie ung,” a ta yi.

³⁷Cuorasala Paul ta palie te, “Kiema Rom cawsaa a cuopa kha bie ripa li pata zaapuv hmielie asung ta malie tuv yite thaw malie ama pathla. Cakhutaata ata ca a paruv ta pathlie malie amaa nang. Cahaa cata cuo the'a vyi! Iema hrahring a vaw yi sala malie vya papya yi se,” a ta.

³⁸Paliy tie ta capa bie ca bieripatuv byi tie kha va chang yite, Rom ming tana ma cuo e ama tapa kha ama thyi tiyta ama thlaa a zang.

³⁹Cacuonakawta a vaw yite paa ama vya kie. Thaw-ing taakhata papya yite ama khypuv kha pya se riypata ama chang.

⁴⁰Caacuonakawta thaw-ing taakhata pya yite Lydia ing luo kha ama vaa. Capa lie ca uvnu sieta zaw[56] hneta a taw yite thaazuo ama pi khu taata capa khy taacata ama pya.