Read Lautu Chin Lucuotuv 17 Bible Online

Lucuotuv 17 - Lautu Chin bible

Lucuotuv 17

¹Paul hne Silas ca Amfipolis khy hne Apollonia khy kha vya capiepaa yite Thesalonika khy luo kha ama pha. Capa lieca Judah ming apungna-ing kha a aw.

²Paul ca a tue tawpa haakhata apungna-ing luo vaa te Sabbath ning ningthung chung bangkhuo iema hne khata Caapathepa bie lie'a pakha amaa i.

³Messiah ca ruvnaana a ang riypa hne thiy te a thupakhaa hrahring a hunapa kaw kha ri pasie te a paluo sa. “Kama ta ica chang nguoluopa yi hing capa Messiah,[57] Zingsuv catana a cuo,” a ta yi.

⁴Chekha ca ama palung sie te Paul hne Silas kha amaa hlaw, cahaa cata Khazing a biepa Grik ming hluvpuv hne canung uvthyi hluvpuv zaw kha amaa vya hlaw ra.

⁵Cuorasala Judah ming ta ihnyi yite chadawtluo lie a khie cakhawpa zyazaa pha lipa tie kha pahmya yite ama pakhipa-u sa nakawta khy chunglie kha hnaahnawna a puv. Paul hne Silas kha patuv pata zaapuv hmie luo chiykhyi riypata Jason ing kha ama va ching.

⁶Iema kha ama hmung li taata Jason hne zangtuv[58] chekha kha khychung uvthyi tie'a luo kha a vya dale yite, “Chuelyi a palipathipa hing cawsaa zaw hing hingpa hmang luo hing vya chiy yite,

⁷Jason ta a ing lie aa patlung sa yi. Siepahruo hrangpa Zingsuv ama tapa na a aw, ta yite Rom siepahruo nawhnyina kha amaa du,” ama ta.

⁸Capaca ama thyi tiyta khychung uvtuv byi tie hne cawsaa zaw ca ama palung aatawaamuo sa.

⁹Jason hne a hrangpa tie'a taata biekuona tuokaa ama la khu taata ama pathlie.

¹⁰Capa zuopa cata zangtuv tie ta Paul hne Silas kha Berea luo ama pasi sa. Ama chiy tiyta Judah ming apungna-ing luo kha ama cakuo.

¹¹Berea khy lie Judah ming ca Thesalonika khy ming laa khata bie cuhluo ama the vie; cacuonakawta bie kha palung thusa pata naathlie yite a cuo ma cuo vama tapa kha che the riypata ningting ta Caapathepa kha ama mang.

¹²Iema hraw taata cawsaa hluvpuv kha vya zang yite pa-uvsathyi tluo aa tlapa Grik ming canung capaa a hluvpuv zaw ama vya zang ra.

¹³Cuorasala Thesalonika lie a awpa Judah ming ta Paul na Berea lie thuophaabie a phu e tapa kha ama thyi tiyta a vaw yite cawsaazaapuv kha hnaahnawna tue riypata ama pasu.

¹⁴Zangtuv tie ta sungkha ta Paul kha riyliy kie luo pathlie yite Silas hne Timote ca amaa ngaa siy.

¹⁵Paul a pathliepa tie ca Athens te kha va chiy ra yite, a cuo khuna chung ta Silas hne Timote kha naa vya hlaw paluo mang yi sala, tapata Paul ta bie a taa khu taayita ama kaa.

¹⁶Paul ca Athen taata Silas hne Timote a huo nguoluo ning yi kha capa khy ca kuvtuezuv ta a bi pakha hmung te a palung rie a thyi khyisa.

¹⁷Cacuonakawta apungna-ing lie cuose, chadawtluo[59] lie zaw kha cuose, Judah ming'a nata Khazing a zangpa Grik ming hneta a ningtating ta bie amaa i pari.

¹⁸Epikurian pacuvtuv chekha hne Stoik pacuvtuv chekha zaw hne khata amaa i. Chekha ta “Hingpa a pasingsa te a khicakhawpapaa hing khaapama a ri khing?” ama ta. A hrangpa tie ta, “Ruohrang ming khazing kaw na a ri thlu aa?” ama ta. (Cahaa cata ama tapa ca Zingsuv hne a thupakhaanapa kaw kha a ri nakawtana a cuo.)

¹⁹Cacuonakawta ama kha Areopagas ama tapa ahmyana hmang luo chiykhyi yite, “Na ri nguoluopa pacuvna thaapa kaw hingna ma pachang khing.

²⁰Kiema cuota biethaapa cuote a ri khingna hingna ma pachang khing,” ama ta.

²¹Athens khy ming hne capa lie a awpa ruohrang ming ca ama cuo hnyipa bangkhuo kha biethaapa a changna hne naathliena ta ama hmuo diy.

²²Cakhutaata Paul ca Areopagas lie a vya hmyapa tie hmiekunglie kha a daa te, “Athens khy ming, biena luota khatluv tama nama pakangpahaa tapa kha ica pachang yi.

²³Khychung kha a khie ang te nama bienapa hmang kha i hmung tiyta, capa hraw taacata, “Ma pachang lipa khazing cuota,” tapata caa aa capepa bienatluophie kha i hmung. Kama ta niema'a lie i phupa hing capa nama pachang li pata namaa biepa kaw catana a cuo.

²⁴Chuelyi hne a chunglie a awpa bangkhuo a satuv Khazing, alyi hne vuoruo Byi, cawsaa kuv ta sapa biena-ing chunglie a aw lipa tana a cuo.

²⁵Khazing ca a hringpa bangkhuo kha hringna hne huv hne zezaw bangkhuo kha a pituv cuote, cawsaa ta a cuota tuepa riypa kha aa hupa suokha hmuo aw vyi.

²⁶Cawsaa pakha chung taata mingphang bangkhuo kha sa te alyi lie kha khy a pasa sa yi. Kha cuo ma ama hring aa tapa hne ama awna riypa ruoriy zaw kha a thlipa pacie yi.

²⁷Tahematapakieca iema ta, ama, Khazing kha huv'a yite ama hmung thena riypatana a cuo. Cadyiseca Khazing ca kiema pakha cyicuo hne hingta a hla vyi.

²⁸Ama chunglie ma hring, cakuocavaa pate khy ma sa,’ ama tapa haata hne hlaa a phy thepa tie ta, ‘Kiema zaw hing ama samingsahlaa tana ma cuo,’ ama tapa haa khatana a cuo.

²⁹Cahaa cata kiema ca Khazing samingsahlaa ma cuo nakawta, a hringpa Khazing hing cawsaa kuvzung ta tuepa siyy a cuo li kie, ngu a cuo li kie, alung kuvtuezuv haata ri riypata cuo vyi.

³⁰Khazing ta, cawsaa ta ama za pachang the lina cuo kha a hmung li hruo aa cuo raalaa pata, ata hing ca cawsaa bangkhuo kha ama hring pha lipa bangkhuo taata a ngiepachiy riypata bie a pi yi.

³¹Tahematapakieca aa tlaw ciepa paa thueta chuelyi hing a dangna ta bie ripa riypata ning a thli pacie tli. Cawsaa bangkhuo ta hingpa hmang hing a cuo tapa ama pachang riypata ama kha thiyna taata a pathu sa.”

³²Thiyna taata thupakhaana kaw kha ama thyi tiyta, chekha ta ama pahnyisue; cuorasala chekha ta, “Hingpa kaw nama ripa hing naa na maca thlie pakhaa khing yi,” ama ta.

³³Capa lie cata Paul ta a pya se yi.

³⁴Cuorasala chekha ta ama kha vaa hlaw yite zangtuv ama vya cuo. Iema ca Areopagas lie abyi a cuopa Dionisias hne Damaris ama tapa canung pakha hne a hrangpa zaw khata ama cuo.