Read Lautu Chin Lucuotuv 18 Bible Online

Lucuotuv 18 - Lautu Chin bible

Lucuotuv 18

¹Cakhutaata Paul ca Athens khy taakhata pya te Korin luo a si.

²Capa lieca Pontas ruo lie a puvpa, a ming Akuila ama tapa Judah ming pakha kha a napuvnung Prisilla hneta a va hmung yi. Iema ca siepahruo Kalaudias ta Judah ming bangkhuo Rom taata a papya nakaw yi ta Italy taata a vya chiy thaapa ta ama cuo.

³Paul ta vaa taw yite, ama haata pangthluodaa bie pata a riy a cawpa ama cuo ra nakawta iema'a lie kha aw te re ama hrie hne.

⁴Sabbath ning kyry ta Judah ming hne Grik ming kha ama palung a sie the riypata apungna-ing lie kha bie a rue yite a changpasie yi.

⁵Silas hne Timote kha Masidonia taata ama vya chiy tiyta, Paul ca a cuo bangkhuo kha Khazing bie phuna ta hmuo diy te, Judah ming kha, Zingsuv ca Messiah[60] tana a cuo tapata tehte a khuo yi.

⁶Judah ming ta ama kha a du yite ama hue tiyta, a palung tling lina paluosana ta a pang lie buvcing kha cakhawsue siy yite, “Nama thiyse ca niema luv cunglie tla mangsue! Kama ca i pathe. Ata taahingta ca Jentail ming'a luo na i cakuo'a tli,” a ta yi.

⁷Cakhutaata apungna-ing taakhata pya te Khazing abiepa Titius[61] Justas ama tapapaa ing luo kha a cakuo. Capapaa ing ca apungna-ing a vya paziypa khana a cuo.

⁸Apungna-ing uvtuv byi a cuopa Krispas ca aa chungkhue yalya ta Abyipa kha ama vya zang; cakhutaata Paul ta a ripa thuophaabie a thyipa Korin ming a hluvpuv zaw kha zang yite tiy amaa naw.

⁹Zuokha ca Paul ta muocuo hmung te, Abyipa ta, “Ciy kha, duo lie ciy, ri lawmaw tie;

¹⁰ca aw puo ang te, nama kha ruvnaana pi riypata ahungtahmuo ta na cunglie a kuv pathlie'a vyi, tahematapakieca hing khypuv chunglie hing i cawsaa na a hluvpuv a aw yi,” a ta.

¹¹Cacuonakawta Paul ca capa lieca kung kha thlacaruv aw te iema kha Khazing bie a pacuv yi.

¹²Cuorasala Gallio ca Akhaia ruo uvtuv a cuo tiyta, Judah ming ta Paul kha a du yite bierina zung luo ama chiykhyi.

¹³Iema ta, “Hingpapaa hingna cawsaa kha ma phung haata cuo li pata Khazing abie riypata a changpari yi,” ama ta.

¹⁴Paul ta bie a vya ri'a nangpa khata Gallio ta Judah ming kha, “zyazaa phalina kawlie'a nata suena kawlieta a cuo kieca zung luo nama vya chiykhyipa bie hing ca cuhluo'a yi ang te a phata tah i rue a hu aa.

¹⁵Cuorasala ata'apa hmang hing ca biesuo kaw, ming kaw'a nata niema phungluo kaw zaw ta a cuo nakawta niemata tah vaa ri tie ung; hingpa hmang kawlie taca bieripatuv cuo khu va ang,” a ta yi.

¹⁶Cakhutaata zung chung taacata a papya yi.

¹⁷Cadyiseca iema bangkhuo khata apungna-ing uvtuv Sosthenes kha patuv yite zung hmielie kha ama tuv. Cuorasala Gallio ta khapa zaw kha siysaa hetahmuo ripa vayi.

¹⁸Paul ca Korin lie cuo syipuv a aw khu taata, zangtuv tie[62] kha bie a changsiy yite Prisilla'a nata Akuila hne khata tiypalaw ta Siria luo a si. Tiypalaw ta ama si hluo khata Kenkhria khy lie kha biekuona a tue nakawta a suo aa ngu.

¹⁹Efesa luo ama chiy tiyta iema kha thuse yite apungna-ing luo kha vaa te Judah ming hneta bie amaa rue.

²⁰Iema ta a syi vie aw caw riypata ama thlu tiyta bie nesa pata a bu yi;

²¹cuorasala aa thu'a nang caw ta, “Khazing khingna a aw kieca niema'a luo i vya kaa pakhaa aa,” a ta yi. Cakhutaacata Efesa taakhata tiypalaw ta a pya.

²²Sisaria luo a pha tiyta Jerusalem luo kha khaw te khrihsaabuv kha bie a kya chang yi. Cakhutaata Antiok luo kha a si.

²³Capa lieca cuo syipuv a aw khu taata Galatia hne Frizia ruo kha suvkha hnang suvkha ta tlawle yite a ziytuv bangkhuo kha thaazuo a pile yi.

²⁴Capa ning ca Alexandria khy lie a puvpa Judahpa, Apollos ama tapapaa ca Efesa khy luo kha aa vaw. Ama ca bie ri a thepa hne Caapathepa kha a phata tah a pachangpa ta a cuo;

²⁵Abyipa Phungluo kaw kha pathiypalung hmisi ta hne a cuona dadang haata a pacuv yi. Cuorasala Johan tiynawna kaw dyi kha a pachang.

²⁶Apungna-ing lie kha riepha ciemuopa ta ri te; cuorasala Prisilla hne Akuila ta ama thyi tiyta ama kha cakuo khyi yite Khazing Phungluo kaw kha a cuona haata ama chang.

²⁷Apollo ca Akhaia ruo luo si kha aa ting tiyta zangtuv tie ta thaazuo pi yite a phasa pata ama cuhluo riypata ziytuv tie'a luo kha caa ama cape. A va chiy tiyta Khazing vihnyina thueta zangtuv a cuopa tie kha khuopuv ta aa bya yi.

²⁸Tahematapakieca zaapuv hmielie bie a ina lieta Judah ming ama paana kha khuopuv ta paluo sa te, Zingsuv ca Messiah[63] tana a cuo tapa kha Caapathepa chung taata la te a pahmung sa yi.