Read Lautu Chin Lucuotuv 19 Bible Online

Lucuotuv 19 - Lautu Chin bible

Lucuotuv 19

¹Korin lie Apolos a aw ning kha Paul ca capa ruochung kha tlaw te Efesa luo a chiy. Capa lieca zangtuv chekha kha va hmung yite,

²“Zangtuv cuo tli ung cate, Thlaapa Pathe kha nama ting ma?” a ta yi. Iema ta, “Ting va puv, Thlaapa Pathe a aw tapa hmuo thyi buo va puv,” ama ta.

³Cakhutaacata ama ta, “Cacuokie, tuokhaapa tiynawna ma nama ang?” a ta yi. Iema ta, “Johan tiynawna,” ama ta.

⁴Paul ta, “Johan tiynawna ca sue a ngiepachiynapa tiynawna tana a cuo. Ama hnang taata a vaw riypapaa Zingsuv ama zang riypatana cawsaa kha a chang yi,” a ta.

⁵Capaca ama thyi tiyta Zingsuv ming ta tiy amaa naw.

⁶Paul ta ama cunglie a kuv a khang tiyta, iema cung luo kha Thlaapa Pathe za cung te, thyiliparyi kha cyi yite Khazing bie zaw kha ama ri.

⁷Iema ca ama bangkhuo ta hlyihning hraw ama ta.

⁸Paul ca apungna-ing luo kha a ngie te Khazing pena kaw kha riephasa pata hne cawsaa ta ama thyi thesa riypata thlathung chung a ri.

⁹Cuorasala cawsaa chekha ca ama palung a khungsa te, zang khu lipa yi ta Phungluo kha cawsaa hmiekunglie ama rithuochi. Cacuonakaw Paul ta pya se yite, a ziytuv tie kha a chiyle yite Tirannas[64] bierina ing tapa chunglie kha ningting ta a pacuv yi.

¹⁰Cahaa cata kung hning chung pazue te Asia ruo chunglie a awpa Judah ming hne Grik ming bangkhuo ca Abyipa bie kha ama thyi diy.

¹¹Khazing ta ning hrang a aw buo lipa kharuehaa hmang kha Paul kuv ta a tue.

¹²A pavya hne a ruepaze kha hmuota a tluo lipa tie'a luo ama cyile tiyta, tluo yite thlaapa chiepa kha ama chung taata a pya.

¹³Hmangting ta a khielepa khachie a papyapa tie Judah ming khata thlaapa chiepa a hnyipa tie cunglie kha Abyipa Zingsuv ming kha hmuo yite, “Paul ta a ukhyipa Zingsuv ming tana ica papya,” ama ta

¹⁴Judah ming tluobyilepa Skeva saacapaa pasariy tie ta capaca ama tue.

¹⁵Cuorasala thlaapa chiepa ta, “Zingsuv i pachang, Paul zaw i pachang; cuorasala niema hing ahung zaw tama nama cuo?” a ta yi.

¹⁶Cakhutaata thlaapa chiepa a hnyipapaa cata a vya zuchiy yite tuv yite a te nakaw yi ta ama thiy ama hnie hne ama cahri pata ing taata amaa ruo.

¹⁷Capa bie ca Efesa lie a awpa Judah ming hne Grik ming bangkhuo ta ama thyi tiyta, ciysa yite Abyipa Zingsuv ming kha ama pathuosa.

¹⁸Zangtuv a vya cuopa a hluvpuv zaw khata ama za tue tawpa kha zaapuv hmielie ama phu.

¹⁹Pacuo a thepa tie zaw ta ama caa-uv kha pakhaw yite zaapuv hmielie myi ta ama rue. Capa caa-uv muo ca ama tue tiyta ngu tuokaa thaw sawngaa muo a ta.

²⁰Cahaa cata Abyipa bie ca cahrana hne aa ze hryly.

²¹Capa hmang bangkhuo a cuo khu taata, Paul ca Masidonia ruo hne Akhaia ruo kha cahrawpaale pata Jerusalem luo tlaw riypa aa ting. “Jerusalem i chiy khu taata Rom zaw i hmung hrahring aa hu,” a ta.

²²Cacuonakawta ama a byatuv a cuopa Timote hne Erastas kha Masidonia luo pathlie yite ama ca Asia ruo lie kha cuo syi vie a hmuo.

²³Hingpa hrawning hing Phungluo kawlieta hnaahnawna khuopuv ta a aw.

²⁴Ngu a patle thepa Demetrias ama tapapaa ca Artemis khazingnung biena-ing zuvta kha ngu ta patle te capa re lie rehrietuv tie ca ama tuokaa hmungna luopuv a phasa.

²⁵Ama ta a rehrietuv tie hne iema haapa re a hrie rapa tie kha kupakhaw yite, “Uvnu zaw, hing rehriena taahingta hnyirungna ma hmungpa ungca nama pachang.

²⁶Niema zaw hmung ung cate nama pachangpa haata hingpa Paul hingta Efesa lie dyi cuo li pata Asia ruo bangkhuo lie a awpa cawsaa hluvpuv kha, cawsaa ta tuechawpa Khazing ca Khazing ta cuo vyi, tapata chang yite a pa zang sa diy tli yi.

²⁷Cakhutaata ima sungpalina zaw mingchiena aa taw'apa dyi cuo li pata khazingnung Artemis biena-ing zaw hing a ling zue'a te, Asia ruo bangkhuo hne chuelyi puv ta ama biepa a lesyina zaw hing a cungbung aa,” a ta yi.

²⁸Ca bie ca ama thyi tiyta ama hihaa te, “Efesa lie a awpa Artemis ca a lesyice!” tapata khuopuv ta ama u.

²⁹Khy chunglie ca cahaa cata khi-una ta a bi; cawsaa ta Paul khytlawhnepa Masidonia ming Gaius hne Aristarkas kha a vya dale yite pyi mangna ing luo kha ama vya chiykhyi.

³⁰Paul ca ama pangpa ta cawsaazaapuv hmie luo pya riypa kha a khing, cuorasala zangtuv tie ta ama thlu.

³¹A viesaa ta a cuopa Asia pe uvtuv chekha zaw ta pyi mangnapa ingchung luo hrahring a ngie li riypata bie ama vya taa.

³²Capa cuo ning ca, chekha ta a phang hrang, a hrangpa chekha ta a phang hrang khata khi patlaw yite, hluv vie bangkhuo khata khaapanakawma hingpa luo hing maa vya hmya tapa hmuo pachang vayi.

³³Judah ming ta Alekzandar kha hmie luo ama vya papya nakawta cawsaazaapuv chekha ta amapaa hingna hingpa hmang a chiykhyituv ta a cuo thlu'a mang ama ta. Alekzandar ta cawsaazaapuv ca a kuv pazuu te a padie sa khu taayita, ama a cuo lina kaw ri aa pachie.

³⁴Cuorasala Judah ming a cuopa kha ama pachang tiyta, “Efesa lie a awpa Artemis ca a lesyice,” ta yite siymaluo pahning chung ama u.

³⁵Cuorasala khy caziypa ta cawsaazaapuv ca padie sa yite, “Efesa khy ming, ahung hingma Efesa khypuv ca a lesyipa Artemis biena-ing hne vuoruo taata zaa tlapa ama hmingsuo kuvtuezuv a awnapa tana a cuo tapa a pachang lipa a aw ungciy?

³⁶Capaca ahungtahmuo i khu'apa a cuo li nakawta a dieta tah nama aw riypa hne khuerue taa li pata hmang nama tue cakhaw riypata cuo vyi.

³⁷Niema ta, ma biena-ing hmang zaw a paruv buo lipa hne ma[65] khazingnung thuopachina bie zaw a ri buo lipa hingpa cawsaa zaw hing hingpa hmang luo nama vya chiykhyi.

³⁸Demetrias hne a rehriehne tie ta, ahung cunglie a cuo zaw ta, bie ama hnyi khing kieca bierina zung pahaw yite bieripatuv tie ama aw thluo. Capa lieca tazaa vaa cyi thluo yi se.

³⁹Capa laa cata[66] nama pachang khing vie kieca khy ming bangkhuo a hmyana lie kha bie chi riypata a cuo.

⁴⁰Ata ning a puvpa hmang kawlie hingta kiema hing hnaahnawnapa na nama chiykhyi tapata pasuena maa taw khu. Tahematapakieca hingpa hmang a cuona kaw hing a siesa pata ma ri khu riypa suokha hmuo aw vyi, a ta.

⁴¹Capa bie a ri khu taacata a hmyapa tie kha a padiy sa diy yi.