Read Lautu Chin Lucuotuv 2 Bible Online

Lucuotuv 2 - Lautu Chin bible

Lucuotuv 2

¹Pentekos ning a vya pha tiyta zangtuv bangkhuo ca suvkha lie ama aw.

²Sungkhabala ta vuoruo taata ueryi suokha ca thliysung pu haata za paring te amaa tunapa ing kha a bi diy.

³Aa chepa palyi ca myipalyi haata iema hrawlie kha zaa luo te myipalyi suokha cyicuo ca iema pakha cyicuo cunglie kha aa cang.

⁴Iema bangkhuo ca Thlaapa Pathe ta bi yite Thlaapa ta a pipa yi cyicuo haakhata ryi hrangpa kha ama cyi.

⁵Capa ning ca vuoruotyi ruo ting ta a awpa Judah ming kha Jerusalem lie ama aw ningta a cuo.

⁶Ca ueryi ca ama thyi tiyta cawsaazaapuv kha a vya hmya yite ama kharue a haa hringhruo, tahematapakieca zangtuv tie ama ripa kha a vawpa tie ta iema ryi cyicuo ta ama thyi nakawta a cuo.

⁷Ama nang ta uosa te, “Ama bangkhuo hingta Galilee ryi a cyipa cuo vayi ma?

⁸Cacuokie tuokhaatama kiema pakha cyicuo ta ma puvnapa ryi ta ma thyi the?

⁹Kiema ca Parthia ruo, Media ruo, Elam ruo, Mesopotamia ruo, Judea ruo, Kappadosia ruo, Pontas ruo, Asia ruo,

¹⁰Frizia ruo, Pamfilia ruo, Izipt ruo, Libia ruo chung Sairin khy cahriy lie a awpa ma cuo. Rom taata a vawpa khyche, Judah ming hne Judah biena a hrawpa Jentail ming zaw ta ma cuo.

¹¹Karit parala ruo hne Arabia ruo taata a vawpa zaw ta ma cuo, cuorasala Khazing ta a cahrana ta a tuepa hmang rungnaapa kaw kha ama ri tiyta ma ryi cyicuo ta ma thyi kaluo,” ama ta.

¹²Ama bangkhuo ta nang-uo chungzing pata, “Hingpa hing a siyluo khaapatama a cuo aa,” amaa ta.

¹³Cuorasala a hrangpa tie ta, esepuo pata, “Mingsuv tiy na ama pariy,” ama ta.

¹⁴Cuorasala Piter ca hlyikha tie hne khata a kya daa te a ryi kha khuosa ta pathlie te, “I phangkha cawsaa Judea ruo ming hne Jerusalem lie a awpa bangkhuo zaw, i ripa hing naathlie ungla pachang tie ung.

¹⁵Hingpa tie hing niema nama ruenapa haata pariy vayi, tahematapakieca maw siymaluo pacaky dyi muo a ta baaning ta.

¹⁶Hingpa hing ca profet Joel a za ripa kha tana a cuo:

¹⁷‘Khazing ta, Ningchuonapa lieca cawsaa bangkhuo kha i Thlaapa bya'a yi ang te, nama sacanung hne saacapaa tie ta bie ama phu aa, nama thutlie tie ta muocuo hmung'a yite, nama macuo tie ta muo ama sa aa.

¹⁸Capa ning thue ca i sii canung hne i sii capaa zaw cunglie kha i Thlaapa bya'a ang te, bie ama phu aa.

¹⁹Cung luo vuoruo lie khiy pamangsana hmang paluo'a ang te, raw luo alyi lie hing kharuehaa hmang i paluo aa, thiyse hne myi hne myikhuv chaapuv ta ama cuo aa.

²⁰A rungnaapa hne a lesyipa Abyipa ning a vaw hluo ta Ning khiy zing'a te, thlaapa khiy thiyse haata a se aa.

²¹Cakhutaata Abyipa ming a upa bangkhuo ca khuona ama hmung aa,’ a ta.

²²Israel ming,[4] i bie hing naathlie tie ung. Nama pachangpa haata Nazareth khypa Zingsuv ca Khazing ta re a changpa na a cuo tapa kha, Khazing ta ama hmuopa ta a tuepa, a cahrana ta a tuepa hmang rungnaapa zaw, kharuehaa hmang zaw, hne pamangsana tie zaw hingta niema'a lie a paluo sa.

²³Khazing ta hmungdawna hne ama khuekhuona haata niema'a luo aca pipa yi Zingsuv ca cawsaa pha lipa tie kuv ta vieluo cunglie nama thie.

²⁴Cuorasala Khazing ta ama kha thiyna[5] taata a pathu pakhaa, tahematapakieca thiyna ta ama kha patuv pari khu'a vyi.

²⁵Cacuonakawta David ta ama hne aa patuv pata, ‘I hmiekunglie Abyipa kha i hmung pari, I cacuo luota inaa daapuo nakawta a cahang'a va ang;

²⁶Cacuonakawta i palung tluo te, i bie ca thaaphana hneta a bi; Cadyi cuo vyi, i pangpasaa ca a nguopuona hnetana a hring aa.

²⁷Tahematapakieca i thlaapa kha athiykhy lie thuse'a vaciy, Na mingpathepa hing thluokhue lie lang riypata ca pase'a vaciy.

²⁸Hringna luopuv kha na pachang sa cate, Ina aw puo nakaw cata i palung a tluo pari aa,’ a ta.

²⁹Uv zaw nu zaw,[6] mingpa David kaw hing a siesa pata ica chang'a yi. Ama ca thiy te ama paby, ata ning tepa ta a thluo zaw kiema'a lie a aw kalie.

³⁰Ama ca profet a za cuopa haata, a saming a sahlaa pakhakha kha ama siepahruo thude lie i patu aa tapata Khazing ta bie a kuopa kha a pachang.

³¹Ama kha hmungluna hne David ta Messiah[7] thupakhaana kaw a ripa ca, ‘Ama ca athiykhy lie thusepa cuo li'a pata, a pangpasaa ca thluo lie kha lang'a vyi,’ a ta.

³²Khazing ta hingpa Zingsuv hing thiyna taata pathu pakhaa te, kiema bangkhuo hing pachangkhyituv ta ma cuo.

³³Khazing cacuo luo kuo ta patu sapa cuote, Paa ta bie a kuopa Thlaapa kha a hmung tli. A ta nama hmungpa hne nama thyipa hing kiema cunglie a za byapa ama lasaw tana a cuo.

³⁴David ca vuoruo luo kha kie vyi, cuorasala ama hrahring ta a ripa ca, ‘Abyipa ta i Byipaapa kha,

³⁵“Na carie tie kha na phyipazaa rawlie tlawpuo pata ama cuo hluo li, I cacuo luo kuo ta a tu tie, a ta pakha” a ta.’

³⁶Cacuonakawta, “Israel ming bangkhuo, niema ta vieluo lie nama thiepa Zingsuv hing Khazing ta Abyipa hne Messiah ta a tue tapa hing pachang tie ung,” a ta yi.

³⁷Capa bie ama thyi tiyta ama palung kha cahrie yite Piter hne lucuotuv hrangpa tie kha, “Uvnu zaw,[8] khaapama ma tue aa?” ama ta.

³⁸Piter ta, Nama bangkhuo hingta sue a ngiethepa nama cuo riypata nama suena kha a ngiepachiy ungla Zingsuv Khrih ming ta tiy a naw tie ung; cacuokieca Khazing lasaw Thlaapa Pathe kha nama hmung aa.

³⁹Tahematapakieca biekuona ca Abyipa ma Khazing ta ama'a luo a kupa, niema, nama saata tie, hne luohlaa luo a awpa tie nama bangkhuo cuota na a cuo,” a ta yi.

⁴⁰Cakhutaata a hluvpuv cawpa yite a pasu yi. “Hing chuo pha lipa lie a tlung riypa duotena chung taahingta hyazang riypata a zue ung,” a ta yi.

⁴¹Cacuonakawta a bieripa a cuhluopa tie ca tiy naw yite capa ning cata cawsaa thawthung amaa chachiy.

⁴²Iema ca lucuotuv tie pacuvna hne zangtuv tie a viesaana luo kha a pi karue yite, a viesaana sa ningpakhawna hne thlaachuo pakhawna kha ama hnyi pari.

⁴³Kharuehaa hmang hluvpuv hne pamangsana hluvpuv kha lucuotuv tie ta ama tue nakawta cawsaa bangkhuo kha ama kharue a haasa.

⁴⁴A zangpa bangkhuo kha aw pakhaw yite chechiy bangkhuo kha amaa hraw;

⁴⁵ama hnyipa hmang kha zaa yite ama hmungpa tuokaa kha amaa huna cyicuo haakhata amaa re.

⁴⁶Ning kha hnang ning kha, ama cuo hnyipa hluv vie bangkhuo kha biena-ing lie hmuo yite, ama ing[9] lie kha sa ning a hraw yite pahyana hne palung tluosa pata ama ning.

⁴⁷Khazing kha pathuosa yite cawsaa bangkhuo hmielie hmiephaa ama hmung. Cahaa cata Abyipa ta khuona a hmungpa tie kha ning kha hnang ning kha ta ama buv luo a chachiy yi.