Read Lautu Chin Lucuotuv 20 Bible Online

Lucuotuv 20 - Lautu Chin bible

Lucuotuv 20

¹Hnaahnawna a chuo khu taata Paul ta zangtuv tie kha ku yite thaazuo pi yite bie aa chang siy khu taayita Masidonia luo a si.

²Capa ruo chung ca cahraw te zangtuv tie kha thaazuo a hluvsa a pi khu taayita Grik ruo luo kha pha te,

³capa lieca thla thung chung a aw. Siria luo kha tiypalaw ta a si'a nang tli pata Judah ming ta ama raw nakawta Masidonia luo kaa riypata bie aa chi pakhaa.

⁴Berea khy ming Pirhas saacapaapa Sopater, Thesalonika ming Aristarkas hne Sekanda, Derbe khy ming Gaius, hne Asia ruo taata Timote, Tikhikas hne Trofimas zaw ta ama hne khata ama tlaw ra.

⁵Iema kha silu yite Troas khy taata malie ama za huo.

⁶Cuorasala kiema ca Thiynung Phuv lipa Viechuo pyi khu taata Filipi taakhata tiypalaw ta ma si. Ning pangaa khu taata Troas khy lie kha va pha yi pate capa lieca ning sariy ma aw.

⁷Zaakha chunglie ningtaapa ning, Abyipa zuosa a hraw riypata maa taw pata, Paul ta iema kha bie a rue yite, a mawluopa ca sile aa ting nakawkhata zuocang te ta a bieri kha ama pazue.

⁸Maa pungnapa a cung duo lieca myi-ing a hluvpuv ama vuo.

⁹Zutikhas ama tapa satlie pakha ca thlaluo-aw lie kha a tu te Paul ta a syipuv ta bie a ripazue nguoluo ning kha thuvhunglung khata a hmung nakawta duothungna taakhata alyi luo tla te a thiy pata amaa haa.

¹⁰Cuorasala Paul ca cung te, a bungchiy te a paw khu taata, “Nama thlaa zang kha se, a hring thluo,” a ta yi.

¹¹Cakhutaata Paul ca a cung duo luo kha kya kie te, viechuo kha chechi te ama ning khu taata, iema hne khata, khydyina te bie a rue yite aa thale.

¹²Satliepapaa ca a hring pata ing luo cakuo khyi yite ama hnaa a nguosa.

¹³Kiema ca tiypalaw ta Assos luo kha silu pate Paul kha kupaa riypata maa ting, tahematapakieca ama ca tluo luota si te kupaa riypata malie a chang ciepa ta a cuo.

¹⁴Assos lie kha maa taw taata tiypalaw luo ca kie ra te Mitilene luo kha ma si.

¹⁵Ama taacata si pate a mawluopa ta Khios a riechuo luo kha ma chiy. A hezuoningpa ta Samos luo kha chiy pate, a khetuningpa ta Miletas luo kha ma chiy.

¹⁶Paul ta Asia ruo chunglie cuo pachuo sa li riypata Efesa kha law pata si aa ting. Tahematapakieca, a cuo khu kieca, Pentekos ning kha Jerusalem lie awpa a khing.

¹⁷Paul ta Melitas taakhata Efesa Khrihsaa uvthyi tie kha amaa vya taw riypata bie a taalu yi.

¹⁸Amaa vya taw tiyta, iema kha, “Asia lie i phyi i pathla baataata ata tepa hingta nama hrawlie tuokhaatama i tu i daa tapa kha ina pachang ungciy.

¹⁹Rawcanawna'a nata mingthliy hneta Abyipa re kha hrie ang te, Judah ming ina rawna taayita a vawpa ruvnaana kha i ang law.

²⁰Ingkha hnang ingkha ta cuose, zaapuv ta cuose ica pacuv ning yi hne thuophaabie i ukhyina lie kha nama cuota phana a cuopa ca suokha hmuo i nguo siypa aw vyi.

²¹Judah ming nama cuozaw, Grik ming nama cuozaw Khazing'a luo kha a ngiepachiy pata Abyipa Zingsuv nama zang riypa kha ica chang yi.

²²Ata hing ca Thlaapa luochiyna haata khaapama i taw aa tapa kha pachang li pata Jerusalem luo i sile ningta a cuo.

²³I pachangpa ca, Thlaapa Pathe ta na chang te, khy ting taata thawtlana hne hrisaathieruena ta ina huo tapa khata a cuo.

²⁴Cuorasala Abyipa Zingsuv'a taata i hmungpa, Khazing vihnyina kaw thuophaabie phu riypa re hing i patlung pata a cuo kieca i hringna hing ca i cuota khaapatahmuo ri va ang.

²⁵Ata hing ca nama hrawlie ta sibungsithaw ang te Khazing pena thuophaa ica changpa yi niema ahungtahmuo i hmie na hmung pakhaa'a va tli ungciy tapa kha i pachang.

²⁶Cacuonakawta ata ning ta niema'a lie a siesa pata ica changpa yi ca, ahung thiyse kawlie tahmuo cuo sala kama ca i pathe,

²⁷tahematapakieca Khazing ta a tingpa kha nguo siy li pata niema'a lie ica chang diy karuv yi.

²⁸Niema hne niema kha a mangchiy ungla Thlaapa Pathe ta mangchiy riypata aca pipa yi tuvrung zaw kha mangchiy tie ung. Khazing ta[67] saacapaa thiyse ta a calyipa a khrihsaabuv zaw kha mangchiy tie ung.

²⁹I si khu taahingta a hruosapa cahnie zaw kha niema hraw luo a vaw'a yite, tuvrung kha ca pangaa'a vayi tapa i pachang.

³⁰Niema phuv chung lalaapa taata cawsaa chekha ca zangtuv tie ta iema hnang ama ziy the riypata biehmisipa ri li pata ama hang aa.

³¹Cacuonakawta a raaring ungla, kung thung chung bangkhuo, chung hne zuo hne a pahy li pata mingthliy hneta ica za changpa yi kha maw kha ung.

³²Ata hing ca niema kha Khazing'a luo na ica pi yi. Cakhutaata niema kha ca pakiesathaw'a yite a pathe sapa tie hraw lieta ru caa pipa yi a vihnyina thuophaabie luo kha ica pi tli yi.

³³Ahung siyy, ahung ngu hne ahung cawsie hmuota hietlie buo vayi ang.

³⁴Kama hne kama cuose, i viesaa zaw cuose i kuvta tah i ringpa yi kha niema hrahring na a pachang ungciy.

³⁵Hinghaahingta temaa pata rehriena taahingta na a ruvnaapa tie maa bya aa tapa kha i tuepa bangkhuo taata ica pahmung sa tli yi. Abyi Zingsuv hrahring ta, “Hmungna luo laata pina luo na thluechiy a aw vie,” a tapa kha maw kha ung.

³⁶Capa bie ca a patlung taata ama pakhuv pane yite thlaa ama chuo.

³⁷Ama caapuopa khata ama kha cakuv yite ama pahnuo.

³⁸Na hmung pakhaa va tli'a ungciy, a ta nakaw yi khata ama ngie a chi vie pacuo pata a cuo. Cakhutaa cata tiypalaw te kha ama va pathlie.