Read Lautu Chin Lucuotuv 21 Bible Online

Lucuotuv 21 - Lautu Chin bible

Lucuotuv 21

¹Iema hne maa che khu taata a dangsa pata si pate Kos luo kha ma chiy; a mawluopa ta Rhodes luo kha chiy pate cakhutaata Patara[68] luo ma chiy.

²Fonisia luo a si'a nangpa tiypalaw kha hmung pate capa palaw cata ma va caluo.

³Saipras aa luo nate chiy pate ma cavyi luo kuo ta ma thuse khu taata Siria luo chiy pate Tair lie kha ma cung, tahematapakieca capa lieca ma tiypalaw kha a hmang a pachung.

⁴Zangtuv tie kha a taw yi pate capa lieca ning sariy ma aw. Thlaapa ta a changna haayita Paul kha Jerusalem luo si li riypata ama thlu.

⁵Cuorasala iema'a lie ma awnapa cuo ca chuo te, thuse yi pate maa tha pakhaa. Ama nung ama saa yalya hne khata khy le luo te malie ama vya pathlie. Capa riyliy kie lieca ma pakhuv pane pate, iema hne cata thlaa chuo pakhaw pate

⁶pakha hne pakha kha, nama tluo pata, maa ta. Cakhutaata tiypalaw cung luo kha kie pate iema ca ama kaa.

⁷Tair taacata si pate Ptolemai luo kha ma chiy; zangtuv tie[69] kha bie a chang yi pate iema'a lieca ning kha ma aw.

⁸A mawluopa ca a tha pakhaa pate Sisaria ma chiy. Uvthyi pasariy hrawlie pakha a cuopa, thuophaabie a rituv Filip ing lie kha ma tlung.

⁹Navaa a hnyi lipa sacanung[70] papaliy hnyi te iema ca profet-biephu ri khuna lasaw a hmungpa ta ama cuo.

¹⁰Capa lieca ning hluvpuv ma aw khu taata, Agabas ama tapa profet pakha Judea taata a za chiy.

¹¹Kiema'a luo kha a vaw te, Paul tesaw kha la te a phyi hne a kuv kha aa ciy khu taata, “Thlaapa Pathe na hinghaahingta naa chang, ‘Jerusalem lie a awpa Judah ming ta hingpa tesaw a hnyipapaa hing hinghaahingta ciy'a yite Jentail ming kuv luo ama pi aa,’” a ta.

¹²Capa bie ca ma thyi tiyta, kiema hne capa lie a awpa cawsaa zaw cata Jerusalem luo si li riypata ma thlu.

¹³Cakhutaa, Paul ta, “Khaapama nama tue, caa ung cate i pathiy i palung ina pa-ichi ungciy? Ina ciypakang riypa dyi yi hing cuo li pata Zingsuv Khrih cuota Jerusalem lie thiy riypata hmuo muo i ting ta,” a ta yi.

¹⁴Tuokhaatahmuo ripasa the a aw li nakawta, “Khazing khingna haa cuo thluo se,” dyi tapa te a dieta tah ma aw.

¹⁵Cakhutaacata a pachie pate Jerusalem luo ca ma si.

¹⁶Sisaria khy taata a ziytuv chekha kha kiema hneta kya si ra yite, iema cata a hluo baataata a ziytuv zaa cuopa, Saipraspa Mnason ing luo kha malie chiytha yite capa lieca ma aw.

¹⁷Jerusalem luo ma chiy tiyta, uvnu zaw ta palung tluosa pata malie ama cuhluo.

¹⁸A mawluopa ta Paul hne kiema zaw bangkhuo ca Jeim a taw riypata vaa pate Khrihsaa uvthyi tie bangkhuo kha ama aw ra.

¹⁹Iema kha bie maa chang khu taayita, Paul ta ama rehrienapa taata Jentail ming hrawlie Khazing hmangtuepa bangkhuo kha suokha hnang suokha ta a chang yi.

²⁰Ca bie ca ama thyi tiyta Khazing kha ama pathuosa. Cakhutaata ama kha, “Uvnu Paul, Judah ming hrawlie hing zangtuv thaw khazaa aw yite ma phungbie khatluv ta amaa daakhyi tapa hing na pachang.

²¹Jentail ming hrawlie a awpa Judah ming kha, Moses phungbie kha thuse riypa hne ama saata zaw kha vangdaw te li riypa hne Judah phung kha ziy li riypatana a pacuv yi, tapata iema ta na kaw kha ama thyi tli.

²²Cacuonakawta tuokhaata tuepa tama a pha aa? Hingpa luo na vya chiypa hing ama pachang ngiethie hyi aa.

²³Cacuonakawta maca changpa hing tue tie. Kiema'a lie hing biekuona a tuepa cawsaa papaliy ama aw.

²⁴Iema hing ziy yi la a pathesana ama tuepa kha va tue ra la ama suo a nguna muo kha va liepa tie yi. Cata a cuo kieca na kaw ama thyipa hing suokha hmuo cuo vyi tapa hne nama hrahring phungbie na ziypa kha ama pachang aa.

²⁵Cuorasala zangtuv a vya cuopa Jentail ming tuv kha ca kiema ta, kuvtuezuv lie hriykhung amaa rinapa sa ning li riypa, thiy ning li riypa, a rue cadiepa ta ama thiepa[71] saa bangkhuo ce li riypa, hne aparuvsuena tue li riypa tapa ma bie chinapa caa kha ma paphya tli yi, ama ta.

²⁶A mawluopa ta Paul ca cawsaa tie kha a chiy yite a pathena a tue. Iema hne cata biena-ing luo kha a ngie te, khatiy tama a pathesana a chuo aa tapa hne pakha cyicuo cuota hriykhung a rina ama tue riypa cuo zaw kha a chang yi.

²⁷A ningsariynapa a chuo'a nangpa khata, biena-ing chunglie Paul a awpa a hmungpa, Asia taata a vawpa Judah ming ta cawsaazaapuv kha ama pasu. Ama kha patuv yite,

²⁸“Israel ming zaw, malie a bya tie ung! Hingpapaa hingna ruo ting ta sile te cawsaa bangkhuo kha ma cawsaa a duna, ma phungbie a duna hne hingpa hmang hrahring hing a du pata a pacuvle yi. Cadyi cuo li pata Grik ming kha biena-ing chung luo a ngiekhyi yite hing hmang pathepa hing a papya a palyi,” ta yite ama khi.

²⁹Tahematapakieca Efesapa Trofimas hne khata khy chunglie za hmung yite, Paul na biena-ing luo a ngiekhyi tapata ama rue nakawtana a cuo.

³⁰Khy chunglie ca hnaahnawna ta a bi. Cawsaa ca a vya ruo yite, Paul kha biena-ing lie patuv yite ale luo amaa dale khu taata biena ing chiypakaa kha ama hre.

³¹Ama kha thie amaa nang nguoluo pata Jerusalem khychung yalya tana hnaahnawna a aw tapa bie kha Rom rieka uvtuv byi'a luo a chiy.

³²Sungkhabala ta riebyi chekha hne rieka tie kha a chiy yite iema'a luo ca amaa ruo. Riebyipa hne rieka tie kha ama hmung taata Paul ama tuvpa ca ama taw.

³³Riebyipa ta a vaw te Paul kha a patuv khu taata thaabuoliriy suohning ta cakhiy riypata bie pi yite; ama kha a ahung ta cuote ma khaapama a za tue taw tapa kha dya a hiehriy yi.

³⁴Cawsaazaapuv hraw taata a che ta phangkha ta ama khi, a hrangpa a che ta a phanghrang ta ama khi patlaw nakawta riebyipa ca a cuo tangepa kha pachang khu li pata Paul kha riekate luo a ngiekhyi riypata naw a pi yi.

³⁵Hlyidaw te ama chiykhyipa kha taca cawsaazaapuv kha ama chaa tuv nakawta rieka tie ta a caba ta ama cabale.

³⁶A vya nuosuelepa cawsaazaapuv cata, “Thie tie ung!” tapata ama khi.

³⁷Riekate luo ama vya sikhyi'a nangpa khata, Paul ta riebyipa kha, “Bie suokha ca chang khu the'a ang ma?” a ta. Riebyipa ta, “Grik ryi ma na the?

³⁸Cacuokie, ma hnangluota ningta cehre a cyipa cawsaa thawpaliy ruochung luo sikhyi te rie a thupa Iziptpapaa kha taca cuo vaciy nuo? a ta.

³⁹Paul ta, “Kama ca Silisia ruo Tarsas khy, khypuv ming pathuopa lie a puvpa Judah ming tana i cuo. Paa na ica kie, cawsaazaapuv'a lie hing bie napa ri sa thi tie,” a ta.

⁴⁰Riebyipa ta bie rina naw a pi pahne, Paul ca hlyidaw cunglie kha a daa te, cawsaazaapuv'a luo kha a kuv pazuu te a padie sa yi. Ama die diy khu taata iema'a lie kha Hebru ryi ta bie a ri.