Read Lautu Chin Lucuotuv 22 Bible Online

Lucuotuv 22 - Lautu Chin bible

Lucuotuv 22

¹“Uvnu zaw'a nata paa zaw, niema hmie lieta i sue linapa bie i ripa hing naa na thliepa tie ung.”

²Hebru ryi ta a ripa kha ama thyi tiyta ama die karing. Cakhutaacata,

³“Kama ca Silisia ruo Tarsas khy lieta a puvpa Judah ming tana i cuo, cuorasala i lenapa ca hingpa khy hingta a cuo. Gamaliel kuv raw lieta mingchingmingvuo tie zaw phungbie kha pacuvpa ta cuo ang te niema zaw bangkhuo haahingta Khazing cuota a pipa tana i cuo.

⁴Hing Phungluo a ziypa tie hing thiyna te ta za hrisaa yi ang te, canung capaa ta patuv yi ang te thaw-ing luo i za khungpa yi kha

⁵tluobyilecepa hne bierituvphuv uvthyi tie bangkhuo hing naa pachangtuv ta ama cuo. Iema'a taahingta Damaskas khy lie a awpa uvnu zaw pi riypa caa kha a la ang te, capa lie a awpa tie ca patuv pata, cakhiy pata, Jerusalem luo chiykhyipa yi ta duo te riypa yita i si hning yi.

⁶“Damaskas luo ca si ang te i pha tyalya caw, ningchung hraw khiy ta avuo taata khena ta sungkha ta ina za ka.

⁷Alyi lie a lie ang te ueryi suokha i thyipa ca, Saul, Saul, khaapanakawma ina hrisaathierue ciy?’ ina ta.

⁸Kama ta, “Abyipa, ahung tama na cuo?” i ta. Cakhutaaca ama ta, “Na hrisaathierue nguoluopa Nazareth Zingsuv tana i cuo,” ina ta.

⁹Kama'a lie a aw rapa tie ta khena dyi kha hmung yite kama'a lie bie zaa ripa ueryi kha thyi vayi.

¹⁰Kama ta, “Abyipa, Khaapama i tue aa?” i ta. Abyipa ta, “Thu la Damaskas luo kha si tie; Khazing ta hrie riypata aca pipa bangkhuo ca aca chang'a yi,” ina ta.

¹¹Khena ta ina khetuv nakawta i ming ca hmung the li pata i viesaa zaw khata i kuv ta na ca-yale yite Damaskas luo inaa chiyle yi.

¹²“Phungbie kha ziy te Khazing'a luo aa pipasesa nakawta capa lie a awpa Judah ming bangkhuo ta ama rithuophaapa Ananias ama tapapaa kha

¹³a vaw te, i thaa lie kha a daa te, ‘Uvnu Saul, hmung pakhaa tie!’ ina ta. Capatahne cata i ming ca vuo te ama kha i hmung.

¹⁴Cakhutaaca ama ta, ‘Ma mingchingmingvuo tie Khazing ta a khingna na pachang riypa hne, aa dangpapaa na hmung riypa hne a ueryi na thyi riypata acaa tlaw tli;

¹⁵tahematapakieca hing chuelyi lieta na hmungpa hne na thyipa bangkhuo hing a cuota pachangkhyituv riypatana na cuo aa.

¹⁶Cacuonakawta khaapama na haasaa? Thu la tiy a naw tie, ama ming kha u la na suena kha pathe sa tie,’ ina ta.

¹⁷“Jerusalem luo i kaa khu taata biena-ing lie thlaa i chuo nguoluo ning kha muocuo hmung ang te,

¹⁸Zingsuv ta, ‘Jerusalem taahingta a catli pata pya tie, tahematapakieca kama kaw tehte na khuopa kha cuhluo vayi,’ a ta.

¹⁹Kama ta, ‘Abyipa, apungna-ing ting ta vaa ang te nama caa zangpa tie kha tuv yi ang te thaw i pathlapa yi kha iema ta ama pachang.

²⁰Cakhutaata, nama kaw pachangkhyituv Steven thiyse palang yite ama thie ning zaw kha kama hrahring amaa thaa lie a daa ang te, palung tlingsa pata, ama a thiepa tie buohryicungle kha i kingpa yi,’ i ta.

²¹Cakhutaa, ama ta, ‘Cakuo tie, tahematapakieca Jentail ming hraw luo na ica pathlie aa,’ ina ta,” a ta.

²²Paul bie ripa kha ama te hing ca naa ama thlie, cuorasala ama khutaa ca, “Hingpaapa cawsaa hing chuelyi lie aw kha se! Thie tie ung! Hring a tla vyi! ta yite ama khi.

²³Ama khi nguoluo ning ca ama pang kha cathlu yite buvcing kha avuo luo ama hi.

²⁴Riebyipa cata khaapanakawma hing tluv ta a du yite ama khi tapa kha pachangna riypata Paul kha riekate luo a chiy ungla, tuv ungla, bie hiehriy tie ung, tapata naw a pi yi.

²⁵Cuorasala tuv riypata ama cakhiy khupa khiy ta, a thaa lieta a daapa riebyipa kha Paul ta, “Rom ruo ming pakha kha a bie ripa li pata tuv phung a cuo ma?” tapata a hiehriy.

²⁶Riebyicawpa ta a thyi tiyta riebyipa'a luo kha vaa te, “Khaapama na tue'a nang? Amapaa hing Rom ruo ming tana a cuo tli hing,” a ta.

²⁷Riebyipa ta a vaw te Paul kha, “Na chang tie, Rom ruo ming ta na cuo ma?” a ta. Ama ta, “I cuo,” a ta.

²⁸Riebyipa ta, “Rom ruo ming cuona hmung riypa hingta tuokaa a hluvsa i pachuo,” a ta. Paul ta, “Kama ca i zaa puvkhyipa tana Rom ruo ming i cuo,” a ta.

²⁹Bie a hiehriy'a nangpa mekaa ca sungkha ta a saw se diy yite; Rom ruo ming a cuopa Paul a cakhiy tlamu nakawta riebyipa zaw kha a thlaa a zang.

³⁰Riebyipa ca Judah ming ta Paul sue ama phawpa hing khaapanakawma a cuo tapa kha a pachang khing nakawta a mawluopa ta Paul ca pathlie te tluobyi tie hne bierituv tie bangkhuo kha a hmya riypata naw a pi yi. Paul kha a vya chiy te ama hmiekunglie a padaa.