Read Lautu Chin Lucuotuv 23 Bible Online

Lucuotuv 23 - Lautu Chin bible

Lucuotuv 23

¹Paul ta bierituvphuv kha a hmiepachaw pata mang yite, “Uv zaw nu zaw,[72] ata ning tepa hingta ca i hringna lie hing Khazing hmiekunglie i chiephathleduona palung a pathe,” a ta.

²Capa bie a ri khu pahne cata tluobyilecepa Ananias ta Paul a thaalie a daapa tie kha a hmyataw cabe riypata naw a pi yi.

³Paul ta ama kha, “Nama, thungruopa a thuvpa lungruetlepie, Khazing na nama kha caa cabe aa, Phungbie haata kama bie ripa riypata naa tu thluopa hingtama, nama ta phungbie para cate cabe ungla ina ta ciy?” a ta.

⁴A thaalie a tupa tie ta, “Khazing tluobyilecepa na na ese,” ama ta.

⁵Cakhutaa, Paul ta, “Uv zaw nu zaw, tluobyilecepa a cuopa kha i pachang li nakawtana a cuo; Caapathepa lieta, “Na mingphang luochiytuv kha a thuo pachi'a va ungciy a ta,” a ta yi.

⁶Paul ta chekha tie kha Sadusi ta cuo yite chekha Farasi ta ama cuopa kha a pachang tiyta, bierituvphuv tie kha, “Uv zaw nu zaw, Kama ca Farasi tie, Farasi tie saata tana i cuo. Hingpa lieta bie ripa riypata i cuopa hing a thiypa tie ama thupakhaa aa tapa a ruechuona i hnyi nakawta a cuo,” a ta.

⁷Capa bie ca a ri tiyta, Farasi tie hne Sadusi tie a lala lie kha ruena a che te a hmyapa tie ca phuvhning ta amaa che.

⁸(Sadusi tie ta, thupakhaanapa, a cuo li kie avuoming, a cuo li kie thlaapa aw vyi ama ta, cuorasala Farasi tie taca a suothung ta ama zang diy.)

⁹Khuopuv ta a i yite, Farasi phungbie saya tie kha a daa yite, “Hingpapaa hing a suenapa suokha hmuo hmung va puv. Thlaapa a cuo li kie avuoming ta ama chang sasaw pata a cuo khu,” ama ta.

¹⁰Khuopuv ta amaa i nakawta Paul kha a chuv'a yite thlaachi diy'a kie yi tapata riebyipa kha a thlaa a zang. Cacuonakawta Paul kha hruohra ta za la pata riekate luo chi riypata rieka tie kha naw a pi yi.

¹¹Capa zuopa cata Abyipa kha a thaalie a daa te, “Khaapahmuo ciy kha! Tahematapakieca Jerusalem lie kama cuota tehte na khuopa haahingta Rom lie zaw kama cuota tehte na khuo kalie aa,” a ta.

¹²A mawluomawpa ta Judah ming ca a paruvta tah a taw yite khue pha lipa ama khuo. Paul ma thie hluo li sa ning li tiy dang li patana ma aw aa ta yite bie amaa kuo.

¹³Capa a paruv ta khue pha lipa ama khuona lieca cawsaa sawliy hlyi ama ta.

¹⁴Iema ca tluobyilepa tie hne uvthyi tie'a luo kha cakuo yite, “Paul ma thie hluo li sa ning'a va puv tapatana a cusa pata bie maa kuo.

¹⁵Cacuonakawta niema hne bierituv phuv tie ta, a kaw hingna a sie vie ta ma hiehriy khing e dya ta ungla Paul kha niema'a luo a za pathlie riypata riebyipa kha hie tie ung. Hingpa luo hing a za chiy hluo ta ma thie aa,” ama ta.

¹⁶Cahaa cata thie riypata ama byapa kha Paul a tuvpaapa ta a pachang nakawta riekate luo kha vaa te Paul kha a chang.

¹⁷Paul ta riebyipa pakha kha ku te, “Hingpapaa hing riebyilepa'a luo kha vaakhyi tie, bie chang riypa na a hnyi,” a ta

¹⁸Cacuonakawta vaakhyi te, “Thaw a tlapapaa Paul khata na ku tena hing satliepapaa hing bie chang riypa a hnyi nakawta nama'a luo vaakhyi la ina ta,” a ta.

¹⁹Riebyipa ta a kuv ta ca-yale te ama selaw ta a cakuokhyi khu taata, “Khaapa bie ma ina chang khing ciy? tapata a hiehriy.

²⁰Ama ta, “Judah ming ta Paul kha a kaw na a sie vie ta ma pachang khing dya tapata bierituv phuv hmiekung luo chiykhyi riypata nama'a luo hie riypa kha palung tlingna ama hnyi mangtli.

²¹Cuorasala ama bie kha zang lie ciy, cawsaa sawliy hlyi na ama thie riypata luopuv lieta a bya yi. Paul ma thie hluo li ta sa ning li tiy dang li patana ma aw aa ta yite bie amaa kuo mangtli. Iema ca a ting pacie diy pata aw yite nama biechina hingna ama huo thluo,” a ta.

²²Cacuonakawta riebyipa ta “Hingpa kaw ina changpa cahing ahunghmuo chang khue,” ta te satliepa kha a pathlie.

²³Riebyipa cata riebyi pahning kha ku yite, “Ata zuo siymaluo pacaky ta Sisaria luo si riypata rieka zahning, aruo rieka sawsariy, hne asyi rieka zahning kha a pachie pacie pata chi tie yi.

²⁴Paul aa khang riypa aruo zaw kha pachiepa la muokiybyi Feliks'a luo kha abang-asusa pata chiykhyi tie ung,” a ta.

²⁵Riebyipa ta a raw luo haahingta caa a cape:

²⁶“Kalaudias Lisias na Muokiybyipa Feliks'a luo bie a changna caa caa paphya ang.

²⁷Hingpa cawsaapa hing Judah ming ta patuv yite thie amaa nang, cuorasala Rom ruo ming a cuopa kha i pachang tiyta i rieka tie hneta ama kha ma khuo.

²⁸Khaapanakawma ama hing sue ama phaw tapa kha i pachang khing nakawta bierituv phuv luo kha i chiykhyi.

²⁹Iema phungbie hne a patuv pata sue ama phawpa ta cuote thaw pathla riypa hne thiy riypata aa phuvpa suena suokha hmuo hnyi vyi.

³⁰Ama kha raw yite thie amaa nangpa thuo i thyi tiyta, nama'a luo ca za paphya ang te, sue a phawtuvpa tie zaw kha nama hmiekung luo tazaa va cyi ungla i ta yi,” a ta.

³¹Cacuonakawta, rieka tie ca nawpipa ama cuopa haata, Paul kha va la yite zuo ta Antipatris te ama sikhyi.

³²A mawluopa ca aruo rieka tie kha pathlie sa yite, iema ca riekate luo ama vya kaa.

³³Sisaria luo chiy yite caa kha muokiy byipa ca ama pi; Paul zaw kha a kuv luo ama pi ra.

³⁴Caa kha ri te, Paul kha khaapa pe ming tama a cuo tapa kha hiehriy te, Silisia pe ming a cuopa kha a pachang ca,

³⁵“Tazaa caa cyipa tie ama vya chiy taatana na bie ica ripa aa,” a ta. Cakhutaata ama kha Herod siepahruo ing lie kha rieka ta huo riypata naw a pi yi.