Read Lautu Chin Lucuotuv 24 Bible Online

Lucuotuv 24 - Lautu Chin bible

Lucuotuv 24

¹Ningpangaa khu taata tluobyilecepa Ananias ca uvthyi chekha'a nata sihni Tertullas hneta muokiybyipa'a luo kha Paul sue ama phawna bie kha ama chang.

²Paul amaa vya ngiekhyipa hneta Tertullas ta hinghaahingta suephawna bie kha a ri: Abyipa, Nama thueta diena chunglie cuo syipuv vya aw pate, na singna thueta hing cawsaa zaw cuo hingta pare riypa a hluvpuv pare pata a cuo.

³Hingpa bangkhuo hing hmangting lie a awpa kiema bangkhuo ta ma palung aa tluokhyi hringhruo.

⁴Na cuo kha a syituv ca lapa'a kie ang tapata i ri riypa bie hing a pachangna chung ta vya ri'a ang te naa na thliepa thi la tapata icaa nue.

⁵Hingpapaa hing zaapuv hrawlie hnaahnawna a chiykhyituv, chuelyicung khy ting lie a awpa Judah ming hrawlie hnaahnawna a aw riypata pasutuv hne Nazareth buv ama tapa luochiytuv tana a cuo.

⁶Biena-ing zaw kha papyapalyi aa chie nakawta ma patuv pata a cuo. (

⁷Ma phungbie haata bie ripa pa ma khing raalaa pata riebyilepa Lusias ta kiema kuv taakhata hruohra ta malie chuv te ama sue a phawpa tie kha nama hmie luo chiy riypata naw malie a pi.)[73]

⁸Ama hing bie na hiehriy kieca sue ma phawnapa bangkhuo hing a sie vie ta na pachang aa,” a ta.

⁹Judah ming zaw ta suephawna lie kha vaa pahlaw yite ama ripa bangkhuo hing aa hmuopa se tana a cuo ama ta.

¹⁰Muokiybyipa ta Paul kha bie ri la ta te a kuv a va pazu tiyta, Paul ta: Nama ca hingpa mingphang cunglie hing kung syipuv chung bieripatuv byi na cuo tli tapa kha i pachang nakawta, i sue lina kaw hing palung tluosa pata i ri aa.

¹¹Na pachangna haata, Jerusalem luo Khazing bie riypata i khawnapa hing ning hraa hlyihning laata syi vie valie.

¹²Iema hingta biena-ing chunglie pakhakha hneta bie maa ipa cuose, apungna-ing chunglie'a nata khy chunglie ta cawsaazaapuv kha pasu pata hnaahnawna i tuepa zaw na hmung vayi.

¹³Sue ina phawpa zaw yi hingma aa hmuo hrahring tapata na hmielie hing ri khu tange'a vayi.

¹⁴Cadyiseca, na hmiekunglieta i cuo thluo tapata i ri khingpa ca, iema ta a sichiepa buvthaapa ama tapa, Phungluo haata ma mingchingmingvuo tie ta amaa zaa biepa Khazing kha abie ang te, profet tie caa-uv lie aa capepa hne phungbie chunglie'apa bangkhuo kha i zang.

¹⁵Iema zaw amaa nguopuo pata a cuopa, cawsaa hing a phapa hne a chiepa hne thiyna taata ama thupakhaa aa tapa kha Khazing'a lieta a nguopuona i hnyi.

¹⁶Cacuonakawta Khazing hmielie hne cawsaa hmielieta chiephathleduona palung pathesapa ta i hring khuna riypata i zue pari.

¹⁷Kung a syi myarya khu taata i mingphang tie abyana phya riypa hne Khazing'a luo hriykhungri riypata Jerusalem luo hing i vya chiy.

¹⁸Capa hmang i tue nguoluo ning, phung haata a pathena i tue khutaa khata biena-ing chunglie na hmung yite, capa ning ca cawsaazaapuv zaw aw vayi, hnaahnawna suokha hmuo aw ra vyi.

¹⁹Cuorasala Asia ruo taata Judah ming chekha aw yite, kama kha sue ina phaw khing kie yi ca nama hmiekung luo hing a vaw pata sue ina phaw riypa yi a cuo.

²⁰A cuo li kie hingpa lie a awpa tie hingta bierituv phuv hmielie i daa ning hing khaapa suena ma i tue tapa kha ri yi se.

²¹Ama hmielie i daa ningta hmang suokha tuv ca i ripa a aw, caca a thiypa tie thupakhaana kaw cuote capa kawlie cata ata ning na hmiekunglie i daapa hingta a cuo,” a ta.

²²Cuorasala capa Phungluo kaw ca a phata tah a pachangpa Feliks ta a bie ca pachuo te, “Riebyilepa Lisias a za chiy taatana na bie ica ripa aa,” a ta.

²³Cakhutaacata riebyipa kyihuo khata thaw a tlapa tie khungcawna ing lie chi riypata naw pi te, cuorasala hyazang vie ta chi riypa hne ama kha aa huna lie ama mangsang the riypata a vya tawpa a viesaa zaw kha pakha hmuo thlu li riypata a chang.

²⁴Ning a cawta a rupa khiy ta, Feliks ca Judah zaanung ta a cuopa a napuvnung Drusilla hneta a vaw yite Paul kha ku te Khrih Zingsuv zangna kaw a ripa kha naa ama thlie.

²⁵Paul ta adangna kaw, pangpa a cadangna kaw, a vaw riypa bierina kaw tapa tie kha a ri tiyta Feliks ca a thlaa zang te, “ata hing ca cakuo caw tie, cuo i hnyi taata ica ku pakhaa aa,” a ta.

²⁶Feliks ca, Paul ta tuokaa ina pi thlu aa tapata a nguopuo nakawta ata'a na ata tah a taw te bie aa rue.

²⁷Kung hning khu taata Feliks ca Porsias Festas ta aa thle. Feliks ta Judah ming palung a patluo khing nakawta, Paul kha thaw-ing lie a thuse siy.