Read Lautu Chin Lucuotuv 25 Bible Online

Lucuotuv 25 - Lautu Chin bible

Lucuotuv 25

¹Capa pe chung luo a pha taata ningthung a tapata Festas ca Sisaria taata Jerusalem luo kha a khaw.

²Ama lieca tluobyilepa tie hne Judah ming luochiytuv tie ta Paul sue ama phawnapa kha ama chang.

³Festas kha paakie yite ngiechina pata Paul kha Jerusalem luo malie palawpa la ama ta. Hmisi ta kieca Paul kha luopuv lie a bawkhuo pata thie riypata khue ama khuo.

⁴Festas ta, “Paul ca Sisaria thaw-ing chunglie aw thluo te kama zaw a ru hluo ta kaale i ting.

⁵Cacuonakawta naw a hnyipa tie kha kama hne hingta a zuv ra ungla cawsaapapaa kha a suena a aw kieca sue za phaw tie ung,” a ta yi.

⁶Iema'a lie ning cari a cuo li kie ning hraa hraw a aw khu taata Sisaria luo kha a si. A mawluopa ta bierina thude lie kha a tu te Paul kha kya pyakhyi riypata naw a pi yi.

⁷Paul a kya chiy tiyta Jerusalem taata a zuvpa Judah ming ca ama kha cadung yite suephawna bie kha a hluvsa ama ri, cuorasala ama suephawna bie kha a hmuo hrahring tapata ri khu vayi.

⁸Paul ta a sue lina kaw kha ri te, “Kama ta Judah ming phungbie cuose, biena-ing cuose, siepahruo cuose a du pata suena suokha hmuo tue va ang,” a ta.

⁹Cuorasala Festas ta Judah ming palung a hmung khing nakawta Paul kha, “Jerusalem luo khaw pata i hmielie bie ripa riypata na khing'a ma?” a ta.

¹⁰Paul ta, “Siepahruo bierina thude hmielie na i daa nguoluo; hingpa lie hingna bie ripa riypata i cuo. A phasa pata na pachangpa haata Judah ming cunglie suena i tuepa aw vyi.

¹¹Suena tue ang te thiy aa phuvpa i cuo kieca capa thiyna taacata a ruo riypata a ting'a va ang. Cuorasala sue ina phawpa yi hing aa hmuopa suokha hmuo a aw li kieca a ahungtahmuo kama hing iema kuv luo na pi khu vyi. Siepahruo'a luo na paduo i hu aa,” a ta.

¹²Festas ca a viesaa bierituvphuv tie hneta bie amaa ruepakhaw khu taata, “Siepahruo'a luo paduo naa hu pahaata siepahruo'a luo na na si aa,” a ta.

¹³Capa khu taata ning a syi myarya a ru pata, Agrippa Siepahruopa hne Bernis ca Festas bie a chang riypata Sisaria luo ama chiy.

¹⁴Ning a syi myarya ama aw khu taata Festas ta siepahruo kha Paul kaw ca a chang. “Hingpa lie hing Feliks ta thaw a pathla siypa cawsaa pakha a aw.

¹⁵Jerusalem lie i aw ningta tluobyilepa tie hne Judah uvthyi tie ta a kaw kha na chang yite a bie ripa la sue pacu tie ina ta yi.

¹⁶Kama ta, Rom ming phung taca sue phaw a cuopa ca sue a phawpa tie hne a taw pata sue ama phawpa kha a sue lina kaw a pasiena bie a ri hluo ta sue a phawpa tie kuv luo pi riypa cuo vyi.

¹⁷Cacuonakawta hingpa luo ama vya chiy pahne a mawluopa ta bierina zung lie kha a tu ang te cawsaapapaa kha kya papya riypata naw i pi yi.

¹⁸Sue a phawtuvpa tie kha a vya daa yite sue ama vya phaw tiyta i mangkhuona haata sue phaw vayi.

¹⁹Ama biena kawlieta bie amaa inapa hne Zingsuv ama tapa cawsaa pakha thiy te a hring pakhaa tapata Paul ta a ri nakawlie amaa ina kaw kha ama ri.

²⁰Hingpa kaw hing tuokhaatama a sie vie ta i pachang khu aa tapa kha a ruena caw i pachang li nakawta, Paul kha, Jerusalem luo si pata sue aca phawpa yi hing capa lieca ca ripa se angla na khing'a ma i ta.

²¹Cuorasala Paul ta Siepahruo'a luo duo a hu riypata thaw-ing chunglie chi caw riypa kha a khing nakawta thaw-ing chunglie chi caw riypata naw i pi yi.

²²Agrippa ta Festas kha, “Capapaa bie ripa cana kama hrahring ta i thyi khing,” a ta. Festas ta, “Mawluo na thyi aa,” a ta.

²³Cacuonakaw a mawluopa ca Agrippa hne Bernis ca a rungnaasa pata zaapuv a pungna khuo luo kha riebyi tie'a nata khychung nungpaa tie hne khata amaa vya ngie. Cakhutaata Festas ta naw pi yite Paul ca amaa vya ngiekhyi.

²⁴Festas ta, “Siepahruo Agrippa hne kiema hne hingpa lie a awpa bangkhuo, hing nama hmungpapaa hing Jerusalem lie cuose, hingpa lie hing cuose, Judah ming bangkhuo ta hring a tla vyi ta yite kama'a lie sue ama phawpapaa ta a cuo.

²⁵Cuorasala hingpapaa hingta thiy aa phuvpa suena suokha hmuo tue vyi. Rom siepahruopa'a luo paduo aa hu nakawta Rom luo paphya riypata bie i chi.

²⁶Cuorasala a kaw hing siepahruopa'a luo cape ciemuo riypa hmung va ang. Cacuonakawta niema zaw bangkhuo hmiekung luo i vya chiykhyi. Siepahruo Agrippa, na hmiekung thathang luo i vya chiykhyi, tahematapakieca ama kha bie ma hiehriy khu taata cape riypa a cawta chuo i hnyi riypata i khing nakawta a cuo.

²⁷Kama cuo zaw ta thaw a tlapa pakha sue ama phawna kha a sie pata cape khu li pata i paphya riypa ca a phapa ta cuo vyi,” a ta.