Read Lautu Chin Lucuotuv 26 Bible Online

Lucuotuv 26 - Lautu Chin bible

Lucuotuv 26

¹Agrippa ta Paul kha, “Na kaw kha nama ta vya ri tie,” a ta. Paul ta a kuv kha vya pazuu te a sue lina kaw kha hinghaahingta a ri:

²Siepahruo Agrippa, ata ning nama hmiekunglieta Judah ming ta sue ina phawpa yi palie hriy pata i sue lina kaw ri the riypa cuo i hmung nakawta i vuo a pha ciemuo tapata i rue.

³Tahematapakieca Judah ming phungluo bangkhuo hne bie amaa ipa bangkhuo a pachang diytuv na cuo nakawta i bie ripa hing palung pasiysa pata naa na thliepa thi tie tapata icaa nue.

⁴Judah ming bangkhuo hingta i cawta baataata tuokhaatama i hring tapa kha ina pachang diy yi. A hruothu baataata kama ca i cawsaa zaw hrawlie hne Jerusalem lie a awpa i cuopa kha ina pachang yi.

⁵Ama ri khing pata a cuo kieca, ma biena lieta a pakangpahaacepa Farasi tie ta i cuopa kha ama pachang.

⁶Ata zaw hing Khazing ta ma mingchingmingvuo tie'a lieta a za pipa biekuona i nguopuona kawlieta bierituv phuv hmielie i daapa a cuo.

⁷Ca a nguopuona ca Israel ming phanghraahlyihning ta chung hne zuo hne Khazing zaa bie yite ma hmung aa tapata amaa zaa nguopuopa biekuona khatana a cuo. Capa a nguopuona kawlie cana, Abyipa,[74] Judah ming ta sue ina phawpa yi hingta a cuo.

⁸Khaapanakawma Khazing na a thiypa a pathu pakhaa tapa hing a cuo the li pata nama rue?

⁹“Nazarethpa Zingsuv kaw hing i du khu thiyta i du aa tapata kama hrahring zaw i za rue buopa a cuo.

¹⁰Capacana Jerusalem lie i za tuepa ta a cuo. Tluobyilepa tie'a taata nawpina za la ang te mingpathepa tie kha thaw chunglie i za pathlapa yi dyi cuo li pata iema ama thiena kawlie zaw a palung zaa tlingkhyipapaa ta i cuo.

¹¹Apungna-ing bangkhuo ta iema kha duo za tele yi ang te, Khazing ming ama ri pachie riypa kha i zaa zue. Iema cunglie i hi a za haa hringhruo nakawta iema hrisaathierue riypa khata ruohrang khypuv te ta i sihnuele yi.

¹²Capa ruena hne cata, tluobyilepa tie nawpina hne pathliena ta Damaskas khy luo kha i si.

¹³Ningchung hraw ta, Vya siepahruopa, luopuv lie i cakuole nguoluo pata ning laata a khe viepa avuo taata khena kha hmung ang te, kama hne i viesaa zaw cahriy lie kha a za khe.

¹⁴Ma bangkhuo ta alyi lie maa lie ning kha, Hebru ryi ta, ‘Saul, Saul, khaapanakawma kama kha ina hrisaathierue ciy? Asung cahrepa phyi ta chipa ca nama cuota muo pasana a cuo ta,’ a tapa kha i thyi.

¹⁵Kama ta, ‘Abyipa, ahung tama na cuo?’ i ta. Abyipa ta, ‘Kama ca na hrisaathierue nguoluopa Zingsuv tana i cuo,’ ina ta.

¹⁶Cuorasala thu la na phyi ta a daa tie. Nama kha i changtaapa cuo riypa hne ata ning kama kaw na hmungpa hing hne ica pahmung sa kalie riypa kaw kha tehtekhuo riypatana icaa tlaw.

¹⁷Nama kha ica pathlienapa na cawsaa zaw hraw taa hne Jentail ming'a taata ica khuo aa.

¹⁸Ama ming kha pavuo sa'a yi cate iema ca zingna taata khena luo, Setaa cahrana taata Khazing'a luo kha amaa vya pali aa. Cakhutaa ama suena taata a ngiethena kha hmung'a yite kama zangna chunglie ta pathesapa tie hrawlie kha ama aw ra aa,’ ina ta.

¹⁹Cakhutaacata, Siepahruo Agrippa, kama ta capa vuoruo taata muocuo ca pa-uvsathyi li pata aw khu va ang.

²⁰A hmietaace ta Damaskas lie a awpa tie, cakhutaa Jerusalem hne Judea ruochung bangkhuo hne Jentail ming'a luo te khata ama suena kha a ngiepachiy yite Khazing'a luo amaa vya pali riypa hne ama sue a ngiepachiyna kha tuena ta ama paluo sa riypata phung kha i chang yi.

²¹Capa kawlie catana Judah ming ta biena-ing chunglie kha na patuv yite thie inaa nang yi.

²²Ata ning tepa hingta Khazing ta na due te, hinglie hing a daapa ta, a le a caw hmiekunglieta tehte i khuo pata a cuo. I ripa ca a hrangpa cuo li pata, Moses hne profet tie ta ama za ripa kha vya tling'a te,

²³Judah ming hne Jentail ming'a lie khuona khena kha pathyi sa riypata Messiah[75] ca ruvnaana kha te-ang'a te thiyna taata pathu pakhaapa a pakhana ta a cuo aa, tapa hing tana a cuo,” a ta.

²⁴Paul ta a sue lina kaw a ri nguoluopa khata, Festas ta vya khisue te, “Paul, na palung a hmuo va tli! A hluv tuv caw cate na naa ngaakhyi tli!” a ta.

²⁵Cuorasala Paul ta, “I palung aa hmuo lipa cuo vyi, Abyipa Festas, cuorasala lungsingpya tana biedangpa ica chang.

²⁶Hmisi ta kieca, siepahruo ta hingpa hmang kaw hing a pachang diy, cacuonakawtana ama'a lie hing hyazangsa pata bie i ri. Tahematapakieca hingpa hmang hing nu pata, a cakiy lie tuepa a cuo li nakawta pachang li pata aw vaciy tapata i zang.

²⁷Siepahruo Agrippa, profet tie na zang yi ma? Na zang tapa kha ica pachang,” a ta.

²⁸Agrippa ta Paul kha, “Hing cuo pachangta chunglie hingma Khrihsaa pacuo sa inaa ting ciy?” a ta.

²⁹Paul ta, “A catli zaw a haa zaw nama dyi hmuo cuo li pata ata ning i bie naa a thliepa bangkhuo hingta kama haata nama cuo riypata thlaa i chuo, i thaabuoliriy hing ri li pata,” tapata a palie.

³⁰Cakhutaata siepahruo ca a daa te, muokiybyipa hne Bernis hne iema hne a tupa tie zaw kha amaa daa ra.

³¹Ama pyapuole pata, pakha hne pakha kha, “Hingpapaa hingta thawtla aa phuvpa hne thiy aa phuvpa suena a tuepa aw vyi,” amaa ta.

³²Agrippa ta Festas kha, “Hingpapaa hing Rom siepahruo'a luo na paduo aa hu va tapa kieca pathlie riypa na a cuo raalaa aa,” a ta.