Read Lautu Chin Lucuotuv 27 Bible Online

Lucuotuv 27 - Lautu Chin bible

Lucuotuv 27

¹Italy luo tiypalaw ta si riypata bie chipa a cuo tiyta, Paul hne a hrangpa thaw a tlapa chekha kha “Siepahruo Rieka” tapa lieta riebyipa Julius kuv raw luo kha ama palaw.

²Asia pe tiypalaw a dingnapa khy zaw capiepaale pata si a nangpa Adramittium khy taata tiypalaw kha maa khang. Masidonia ruo Thesalonika khypa Aristarkas zaw kha kiema'a lieca a si ra.

³A mawluopa ta Sidon khy kha ma pha. Julius ca Paul'a lie kha phasa te a viesaa zaw'a luo cakuo riypa hne a viesaa zaw ta a huna haata vya pihluo riypa hne mangchiy riypa zaw kha a pase.

⁴Ama taacata si pate kiema kuo luo dyi ta thliy a vya hruo nakawta, Saipras parala ruo thliynena luo kuo khata ma si.

⁵Riyliy kha Silisia hne Pamfilia a dadaw taakhata te pate Lisia pe Mira khy luo kha ma pha.

⁶Capa lieca riebyipa cata Alekzandria taata Italy luo a si'a nangpa tiypalaw kha hmung te malie a pakhang sa.

⁷Ning syipuv chung duvsaa ta malie sikhyi te a ruvsa pata Nidas khy a dadaw te kha ma pha. Thliy kha kiema'a luota a vya hruo nakawta Krit parala thliynena luota si pate Salmon a rie-e luo kha ma chiy.

⁸Ngiekuo hne a ngieta khata a ruvsa pata si pate Lisia khypuv a thaa lie a awpa Palaw Adingna Hnaanguo ama tapa luo ma chiy.

⁹Cuo syipuv pachuo tli pate, Athlana Ning kha a law tli nakawta tiypalaw ta sipa zaw kha ciy aa chiysa tli. Cacuonakawta Paul ta ruena pi yite,

¹⁰“I byipaa zaw, hingpa taahingta ma luopuv hing ciy a chiy te rakyina lepuv zaw maa taw khu. Hmang hne tiypalaw dyi cuo li pata ma hringna zaw ma pavie khu tapatana i hmung,” a ta yi.

¹¹Cuorasala riebyipa ta Paul ripa laa khata tiypalaw byipa hne a hnyituvpa ripa kha a zang vie.

¹²Tiypalaw a dingnapa ca thlasiy chung awna ta a pha li nakawta hluv vie bangkhuo taca si pata Funiks ma pha khu kieca ama lieca thlasiy chung aw pata ama khing. Funiks ca Krit parala lie tiypalaw a dingna ta cuote sungluo ningtla luo hne chaluo ningtla luo pachaw pata a awpa tana a cuo.

¹³Sungluo taata thlasiy thliy-neziyliypa ca a kya hruo te ama tingnapa kha ima pha khu aa tapata ama rue nakawta thaatungkyipa kha a dapuole yite ngiekuo hne a ngieta khata Krit parala luo ca ma si.

¹⁴Cuorasala a ru hluo ta Karit luo taata, ‘ningchiy chaluo thliy,’ ama tapa khuosa ta a zaa hruo.

¹⁵Ma tiypalaw ca thliy ta za de te hmie luo ma tung khu li nakawta thliy ca maa paphya sa thluo.

¹⁶Kauda[76] parala ruo cawta a sungluo kuo thliynena hmang ma chiy taata tiypalaw ta a cakelepa sawkawpalaw ca a ruvsapa khiy ta a phata tah ma pachie hru.

¹⁷Tiypalaw cung luo kha khang yite khuhriy ta a cusa pata ama ciypuo. Sirtis viehnang tluo kha suv'a kie tapa ama ciy nakawta a pangzu kha pachung yite tiypalaw ca thliy kha ama paphya.

¹⁸Thliy ta khuopuv ta malie a de nguoluo thluo nakawta a mawluopa taca tiypalaw cunglie hmang kha ama thaw.

¹⁹A ningthungnapa taca tiypalaw chechiy kha iema kuv ta la yite ama thaw.

²⁰Ning syipuv chung ning cuose, aasiy cuose a luo li pata thliychie ca a hruo nguoluo thluo nakawta, a hnangcaw taca hring riy'apa khiy hmuo a nguopuo khu va tli puv.

²¹Sa ning li pata a syisa ama aw nakawta, Paul ca iema hrawlie kha a daa te, “Uv zaw nu zaw, i ripa kha na zaa ngie ungla Krit taakhata si li pata ma aw kieca hing rakyina hing a taw'a va puv.

²²Cuorasala nama thlaa zang kha se, tiypalaw dyi hing ra'a te niema hrawlie ta ahunghinghmuo nama hringna ca vie'a vyi.

²³Tahematapakieca azuohnie khana naa hnyituv'a nata i biepa Khazing avuoming i thaalie zaa daa te,

²⁴‘Paul, ciy kha, Rom siepahruo hmielie naa daa ngiethie aa; na khy tlawhnepa bangkhuo hringna zaw hing aa bang aa, ina ta,’ a ta.

²⁵Cacuonakawta, nama thlaa zang kha se, uv zaw nu zaw, tahematapakieca ina changpa haahingta a cuo hrahring aa tapata Khazing'a lie zangna i hnyi.

²⁶Cuorasala thliy ta parala suokhakha luo malie a pazu aa,” a ta.

²⁷Zuohraa hlyipaliynapa vya chiy te Adria riyliy va te pata thliy ta malie a phyale ning kha tiypalaw rehrietuv tie khata tluo hnena maa ngie tli tapata ama palung a hring.

²⁸Tiy kha ama taa ca luo kiy a ta. A cawta a awpa ta taa pakhaa yite luo hraa hlyipangaa a tapa kha ama hmung.

²⁹Alung suv'a kiepuv tapa kha ama ciy nakawta tiypalaw a hnang luo taakhata thaatungkyipa suopaliy kha pathla yite thlaachuona hne khydyi riypa dyi kha ama huo.

³⁰Cuorasala tiypalaw rehrietuv tie kha a ruo a ting yite, thaatungkyipa na ma pathla tapa haakhata dya a pa-aw sa yite tiypalaw taakhata sawkawpalaw kha dya ama pachung.

³¹Paul ta riebyipa hne rieka tie kha, “Hing cawsaa zaw hingna tiypalaw chunglie a aw vayi tapa kieca, hring khu'a va ungciy,” a ta yi.

³²Cakhutaaca rieka tie ta sawkawpalaw riy kha a cepachung yite tiy ama paphya.

³³Khy a dyi hluo ta lie kha Paul ta iema bangkhuo kha sa ning riypata a chang yi. “Sa ning lipa'a nata kharuehaa vuosuo pata nama awnapa hing ata ning taca ning hraa hlyipaliy a ta mangtli.

³⁴Cacuonakawta nama hringna riypata a hu nakawta sa nama ning riypata paa ica kie yi. Tahematapakieca nama luv cung lieta suobuv buvkha hmuo vie'a vyi,” a ta yi.

³⁵Cahaa cata a ri khu taata viechuo kha la te, Khazing kha alawna bie a chang khu taata iema bangkhuo hmiekunglie kha chechi te a ning.

³⁶Ama bangkhuo ta ama thaa kya pha te sa kha ama ning kaluo.

³⁷(Khy a tlawpa ma bangkhuo ta zahning sawsariy pacaruv[77] ma ta.)

³⁸Ama riy bisa pata ama ning diy khu taata tiypalaw kha a hy vie naase tapata a chunglie jungsacuo kha tiy chung luo ama thaw.

³⁹Maw khy a kya dyi ca tiypalaw rehrietuv tie ta ama hmungpa tluo kha pachang khu vayi. Cuorasala riyliy syipahyana lie ngiekuo kha ama va hmung tiyta a cuo khu kieca ama lie kha tiypalaw ca pading sa riypata amaa ting.

⁴⁰Cacuonakawta thaatungkyipa kha riyliy chunglie ama pathla siy. Cakhutaata tiypalaw mawnapa ama ciypuopa khuhriy kha ama pathluo. Ngiekuo luo a si the riypa khata a pangzu kha zu yite tiypalaw ca thliy ama paphya sa.

⁴¹Cuorasala viehnangtluo kha va suv te aa tuo thluo. Tiypalaw a luv luo a daw ca viehnang lie kha a vaa capang. Cuorasala a hnang luo kha tiylaw ta de caa ta a de nakawta kechi te a kyi thluv.

⁴²Rieka tie taca thaw a tlapa bangkhuo kha tiy a zu pata ama zang li riypata thie diy amaa nang.

⁴³Cuorasala riebyipa ta Paul kha a khuo khing nakawta amaa tingna haata patue sa vayi. Tiy a zu thepa bangkhuo ca tiypalaw taata a zupathla pata, tiy a zu pata ngiekuo luo pya riypata naw a pi yi.

⁴⁴Aa ngaapa tie ca thingphie zaw tiypalaw kyinapa zaw kha patuv kaluo yite ama paziy. Cahaa cata cawsaa bangkhuo ca aa bangta tah ngiekuo luo ma pha diy.