Read Lautu Chin Lucuotuv 28 Bible Online

Lucuotuv 28 - Lautu Chin bible

Lucuotuv 28

¹Ngiekuo luo a bangsa pata ma chiy taata, capa parala ca Malta ama tapa parala ta a cuopa kha ma pachang.

²Capa ruo ming ca kiema cunglie ta ama pha hringhruo. Khy vya saa te a kangsa nakawta myi patiy yite malie cadung sa yite malie ama patu sa.

³Paul ca thingpahri kha pakhaw te myi luo a hmawpa hingta myi a ling nakawta thing chung taata pariy sakha kya pya te Paul kuv kha a kaze.

⁴Capa ruo ming cata pariy kha Paul kuv lie aa pathlie thluopa ama hmung tiyta, pakha hne pakha kha, “Hingpapaa hing cawsaa a thiepa tana a cuo aa; riyliy chung taata hmuo hyazangna hmung ra sala adangna hmang taca hring riypata pahya vyi,” amaa ta.

⁵Cadyiseca Paul ta a kuv taakhata myi chung luo thypathla te ama ca khaahmuo ta vyi.

⁶Khatiy tama a pangpa bangkhuo ta kya thling'a te a liepatyi'a te a thiy aa tapa kha ama mangkhuo. A syipuv mangkhuo yite khaahmuo a ta li taata ama palung thle yite, “Hingpapaa hing khazing pakha tana a cuo,” amaa ta.

⁷Capa hmang hne a ngie puo napa hmang lie kha capa parala uvtuv byipa Publius luruo kha a aw. Ama ta ing malie a patlung sa te ningthung chung a phasa pata malie a mangchiy.

⁸Publius paa ca ngeling pata hne thiysechungparuo ta pasa te iehmang cunglie aa zie. Paul ta va parie te, a luv cunglie a kuv khang te, thlaa chuopa te a patluo sa.

⁹Capa hmang a cuo khutaa cata capa parala lie a awpa a tluo lipa bangkhuo kha a vaw yite a patluo sa yi.

¹⁰Lasaw a hluvsa malie pi yite ma si'a nang taata zaw maa hupa bangkhuo kha tiypalaw cunglie malie ama sangpa diy.

¹¹Thla thung khu taata, “Mingphie Uvcanu” ama tapa, capa parala lie thlasiy chung a awpa Alekzandria tiypalaw kha a khang pate ma si.

¹²Sirakus ama tapa khy kha pha pate capa lieca ningthung ma aw.

¹³Cakhutaata, sipakhaa pate Rekium ama tapa khy kha ma pha. A mawluopa ta sungluo thliy a kya hruo te a hezuoningpa ta Puteoli khy luo kha ma chiy.

¹⁴Capa lieca zangtuv uvnu zaw za aw yite malie ama thlu nakawta zaakha ma aw siy. Cakhutaata Rom luo ma vya si.

¹⁵Capa lie a awpa zangtuv tie[78] ta ma kaw kha malie ama thyi tiyta, Appius Chadaw ma tapa hne Banglaa Suothung tapa hmang te kha malie ama vya daw. Paul ta a hmung tiy yi ta Khazing pathuo sa te thaazuo aa la.

¹⁶Rom luo ma chiy tiyta, Paul ca ama a huo riypa rieka pakha pi yite amata tah awna naw ama pi.

¹⁷Ningthung khu taata Paul ta capa lie a awpa Judah uvthyi tie kha a kupakhaw yi. Amaa vya hmya tiyta, Paul ta, “Uv zaw nu zaw, ma cawsaa hne ma mingchingmingvuo tie phungluo kha i du li raalaa pata Jerusalem lie kha na patuv yite Rom ming kuv luo ina pi tli yi.

¹⁸Bie ina hiehriy tiy yi ta i kawlieta thiy aa phuvpa suena ama hmung li nakawta iema ta ina pathlie khing yi.

¹⁹Cuorasala Judah ming ta ama khing li nakawta i cawsaa zaw cunglie suena khaahmuo i tue li raalaa pata Rom siepahruo'a luo kha paduo i hie.

²⁰Capa kawlie cata caa taw yi ang te niema hne bie icaa ruepa yi hing a cuo. Hing thaabuoliriy ta ina cakhiypa yi hing Israel ming a nguopuonapa kawlie tana a cuo,” a ta yi.

²¹Iema ta, “Nama kawlie hingta Judea ruo taata caa hmung va puv, a vaw pata na phalina kaw caa vya ripa pakhahmuo aw vayi.

²²Cuorasala tuokhaatama na rue tapa kha nama'a taata ma thyi khing, tahematapakieca hingpa phuv kaw hne a patuvpa hingta hmangting lieta a duna bie ama rilepa ca ma pachang,” ama ta.

²³Ama hne a tawna riypa ning kha ama thli khu taata, aa rina luo kha a hluvpuv amaa vaw. Maw taata zuoluo te ta Khazing pena kaw kha tehte khuo te a pasie sa. Zingsuv kaw kha Moses phungbie taa hne profet caa-uv chung taakhata a changpasie yi.

²⁴Chekha ca a ripa kha ama palung vuo te, chekha ta ca zang vayi.

²⁵Cacuonakawta pakha hne pakha kha ama palung a lu khu vyi. Cahaa cata ama pyapuole pa khata Paul ta, “Profet Isaiah taata Thlaapa Pathe ta nama mingchingmingvuo tie'a luo a za ripa hing aa hmuo patana a cuo:

²⁶Hing cawsaa zaw'a luo hing vaa la va chang tie yi, Naa ca thlie thluo'a ung cate, cuorasala pachang buohluo'a va ungciy, Mang raalaa ung cate hmung buohluo'a va ungciy.

²⁷Tahematapakieca hingpa cawsaa zaw palung ca ping te, Ama naa ca thyi khu the vyi, Ama ming zaw ama pasing; Cahaa cata ama za cuo li kieca, ama ming ta hmung'a yite, ama naa zaw khata thyi'a yite, Ama palung kha vuo'a te kama luo amaa vya pali'a nakawta, I patluo sa raalaa yi ing,’ a ta.

²⁸Cacuonakawta ica pachang sa khingpa yi ca, Khazing khuona hing Jentail ming'a luo pasi pata cuo'a te iema ta ama cuhluo aa,” a ta.

²⁹(Paul ta hingpa bie a ri khu taahingta Judah ming ca iema hne iema kha khuopuv ta amaa ipuole pata ama pya.)[79]

³⁰Kung hning chung bangkhuo Paul ca amata tah aa hluopa ing lie kha aw te, ama a vya tawpa bangkhuo kha a cuhluo yi.

³¹Khazing pena hne Zingsuv kaw kha riepha ciemuopa hne a pakhuopa aw li pata u khyi te a pacuv yi.