Read Lautu Chin Lucuotuv 3 Bible Online

Lucuotuv 3 - Lautu Chin bible

Lucuotuv 3

¹Ningkha ca zuoluo siymaluo pathung, thlaa chuo cuo lie kha Piter hne Johan ca thlaa chuo riypata Biena-ing luo ama cakuo.

²A puv baataata a phyi cabiepa pakha kha amaa vya puvle. Biena-ing chung luo a ngiepa tie kha tuokaa a hie khu naaseyi tapata Thlake Puvthe tapa biena-ing thlake lie kha ningting ta ama chi taw.

³Piter hne Johan kha biena-ing luo amaa ngie'a nangpa a hmung tiy yi ta aa hie yi.

⁴Ama kha taapuo pata mang yite, “Malie mang tie,” ama ta.

⁵Suokhakha ca ina pi thlu'a yi tapa a nguopuona hneta iema kha ming vy li pata a mang yi.

⁶Cuorasala Piter ta, “Kama ca ngu cuose, siyy cuose hnyi va ang, cuorasala i hnyipa na ica pi; Nazareth Zingsuv ming ta thu la cakuo tie,” a ta.

⁷A cacuo luo kuv ta patuv te a padaa ca a phyi hrahning hne a cakhawruv zaw ca sungkha ta a thaa vya ruv te, a daa te luo a cakuo.

⁸Cakuole, a cathlule te Khazing a pathuosapuo pata iema hne cata biena-ing chung luo kha aa ngie.

⁹Khazing pathuosa te a cakuopa kha cawsaa bangkhuo ta ama hmung.

¹⁰Biena-ing Thlake Puvthe lieta a tu te a hie tawpa kha ama pachang nakawta a cunglie hmang a tlungpa kawlie kha ama kharue haa te ama nang dyi a uo.

¹¹Cawsaapapaa ca Solomon hmiechue tapa lie kha Piter hne Johan'a lieta a awpa kha ama hmung tiyta cawsaazaapuv ca kharuehaasa pata iema'a luo kha ama vaa.

¹²Piter ta iema kha a hmung tiy yi ta, “I phangkha cawsaa Israel ming,[10] “Khaapanakawtama hingpa hmang kawlie hing nama kharue haa te kiema tlaku kiema cahrana hne phana ta a cakuo sa khupa haata ming vy li pata malie nama mang?

¹³Abraham, Isak hne Jakob Khazing, ima mingchingmingvuo tie Khazing ta ama rungnaana ca a changtaapa[11] Zingsuv'a lieta a pi tli. Ama ca Pilat kuv luo pi ung cate ama ta pathlie riypata bie a chi raalaa pata Pilat hmielie hrahring kha nama thaw ngiethie.

¹⁴Niema ta a pathepa hne aa dangpa kha thaw ung cate lie a nawpa tuv kha aca pathliepa riypa yita namaa hie.

¹⁵Cakhutaata hringna luo cawsaa a chiytuvpa ca nama thie. Cuorasala Khazing ta ama kha thiyna taata pathu pakhaa te kiema hing capa kaw ca a pachangkhyituv ta ma cuo.

¹⁶Cahaa cata a ming kha a zang nakawta, a ming mamaapa khata nama hmungpa hne nama pachangpa hingpapaa hing cahrana a pi. Capa Zingsuv zangnapa cata ama kha niema hmiekunglie hrahring ta tluopasingna a pi.

¹⁷“Uv zaw nu zaw,[12] ata zaw hing, niema hne nama uvtuv tie ta nama tuepa hing nama pachang li nakawtana a cuo tapa i pachang.

¹⁸Messiah[13] ca a te a ang aa tapata profet tie'a taata a za rilupa bie kha Khazing ta hingpa haahingta a patling sa.

¹⁹Cacuonakawta nama suenapa ca pathesapa nama cuo riypata a ngiepachiy ungla Khazing'a luo kha a pali tie ung.

²⁰Cakhutaata Abyipa ta thaazuo thaa lana cuo kha ca pi'a yite niema cuota a tlaw ciepa Messiah, Zingsuv kha niema'a luo aca pi'a yi.

²¹Ama ca Khazing ta hluoning baataata a profet tie zaw cung taata a za ripa, hmangting bangkhuo sapathiyna cuo a tlung hluo li vuoruo lieta a aw aa.

²²Moses ta, ‘Abyipa nama Khazing ta niema mingphang[14] chung taahingta kama haapa profet pakha kha pathlie'a te, aca changpa bangkhuo yi kha naa nama thlie aa.

²³Capa profet bie naa a thlie lipa bangkhuo ca mingphang chung taata thawpa ta ama cuo aa.

²⁴Profet Samuel hne ama hnang taata a vawpa profet zaw bangkhuo ta hingpa ning hne cuo kaw hing ama ri diypa ta a cuo.

²⁵Niema ca profet tie samingsahlaa cuo ung cate, Khazing ta nama mingchingmingvuo zaw a pipa yi biekuona a hraw rapa tana nama cuo.

²⁶Abraham kha, ‘Nama samingsahlaa chung taahingtana chuelyi ming bangkhuo hing thluechiy i pi'a yi,’ a ta. Cacuonakawta niema ahung nama cuo zaw, nama phalina taata vya kaa pata thluechiy pi thepa nama cuo riypata Khazing ca a saacapaapa kha pathu sa pakhaa te niema'a luo hmietaace ta a vya pathlie,” a ta.