Read Lautu Chin Lucuotuv 4 Bible Online

Lucuotuv 4 - Lautu Chin bible

Lucuotuv 4

¹Piter hne Johan ta cawsaa-zaapuv'a lie bie ama ri nguoluo ning kha tluobyi tie hne biena-ing a huopa uvtuv byi hne Sadusi ming kha a vaw yite,

²lucuotuv tie ta Zingsuv a zangpa tie ca thiyna taata ama thupakhaa aa tapata ama za pacuv nakaw hne ama za ukhyi nguoluo nakaw khata a ama hi a haa hringhruo.

³Cacuonakawta iema kha patuv yite, khy a zing tli nakawta a mawluopa te ta thaw-ing lieta ama chi.

⁴Cuorasala ama ripa bie a thyipa tie ca zang yite ama bangkhuo ta thawpangaa tluv ama ta.

⁵A mawluopa ta ama uvtuv tie, uvthyi tie, phungbie saya tie hne,

⁶tluobyilecepa Annas, Kaiafas, Johan,[15] Alekzandar hne tluobyilepa chungkhue cawsaa hrangpa zaw kha Jerusalem lie kha amaa hmya.

⁷Lucuotuv tie kha a liekhingkhuo lie padaa yite, “Ahung cahrana hne ahung ming tama hing hmang hing nama tue?” tapata ama hiehriy.

⁸Piter ca Thlaapa ta bi te iema kha, “Uvtuv byi hne uvthyi tie zaw,

⁹a tluo lipa cawsaa pakha cunglie hmangpha tuena kaw hne tuokhaatama patluo sa pata a cuo tapa kha ata ning hing malie nama hiehriy pata a cuo kieca,

¹⁰niema ta vieluo cunglie za thie ung cate Khazing ta thiyna taata a pathu sa pakhaapa Nazareth khypa Zingsuv ming tana hingpapaa hing tluo paalaa khata nama hmiekunglie a daa tapa hing niema bangkhuo hne Israel ming bangkhuo ta pachang tie ung.

¹¹Capa Zingsuv ca Caapathepa ta, ‘niema, ingsatuv tie ta nama thawpa alung ca; a tungpuv cepa ingkiy lung tana aa li,’ a tapa khatana a cuo.

¹²Khuona ca ama chunglie dyina a aw, tahematapakieca chuelyi cung bangkhuo lie hing malie a khuo khutuv ming hrangpa suokha hmuo aw vyi,” a ta.

¹³Iema ta Piter hne Johan riephana zya kha ama hmung tiyta hne caa a the lipa cawsaa cakhawpa ama cuona zya kha ama pachang tiyta ama nang ta uo te, iema ca Zingsuv viesaa ama cuopa kha amaa kya thyi pakhaa.

¹⁴Ama patluo sa papaa amaa thaa lie a daapa kha ama hmung thluo nakawta khaapahmuo i riypa hnyi vayi.

¹⁵Cacuonakawta lucuotuv tie kha ing chung taata papya yite iema selaw ta capa kaw ca amaa rue pakhaw.

¹⁶Pakha hne pakha kha, “Hingpa cawsaa zaw hing tuokhaatama ma tue'a ung? Iema ta kharuehaa hmang lepuv ama tuepa kha Jerusalem lie a awpa bangkhuo ta ama pachang diy nakawta i khu'apa cata a cuo hyi va, amaa ta.

¹⁷Cuorasala hing hmang kaw hing cawsaa hraw luo a ze hryly li riypata, hing cawsaa zaw hing Zingsuv ming ta ahung'a lie hmuo bie ri'a va tli ungciy tapata khuosa ta thlu'a ungpuv,” amaa ta.

¹⁸Cacuonakawta iema kha ku yite Zingsuv ming ta bie ri li tli riypa hne pacuv li tli riypata bie ama pi.

¹⁹Cuorasala Piter hne Johan ta, “Khazing hmiekunglieta niema bie a ngiepa ma a pha vie aa, Khazing bie a ngiepa ma a pha vie aa tapa kha niema ta bie chi tie ung;

²⁰tahematapakieca kiema ca ma hmungpa hne ma thyipa kha ri li pata aw khu'a va puv,” tapata ama palie.

²¹Cawsaa bangkhuo ta hmang a cuopa kawlie kha Khazing ama pathuosa nakawta iema duotena riypa kha a luo hmung khu vayi. Cacuonakawta ama pachiypahuo khu taata iema ca ama pathlie.

²²A cunglie tluona kharuehaa hmang tuepa pata a cuopapaa hing kung sawliy hlyi a tapa tana a cuo.

²³Ama pathlie khu taata lucuotuv tie ca ama viesaa tie'a luo kha vaa yite tluobyi tie hne uvthyi tie ta ama changpa bie kha ama changpachaa.

²⁴Ama thyipa hneta Khazing'a luo kha khuopuv ta u yite, “Alesyipa Abyipa, alyi hne avuo, riyliy hne a chunglie a awpa bangkhuo a satuvpa,

²⁵na Thlaa Pathe hmuo pata na changtaapa[16] mingpa David'a lie bie za ri cate, ‘Khaapanakawma Jentail ming ca ama hihaa te, cawsaa zaw ta a cuo lipa khue ama rue?

²⁶Abyipa hne Messiah[17] a du pata chuelyi siepahruo tie a daahmang la yite, uvtuv tie hne amaa hmya pakhaw,’ na za ta.

²⁷Cahaa cata hingpa khy chunglie hing Herod hne Pontius Pilat ca Jentail ming'a nata Israel ming hne khata Messiah ta naa tlawpa, a pathepa na saata[18] Zingsuv a du riypa khata,

²⁸nama ta a vya aw riypa na za rue ciepa hne na za thli ciepa bangkhuo kha a tling riypata amaa hmya pakhaw sasaw.

²⁹Cacuonakawta, Abyipa, iema pachiypahuonapa kha za pachang thi la, na changtaapa[19] zaw ta riepha ciemuo pata na bie ama ri khu riypata zaa bya thi tie yi.

³⁰Cawsaa tluona riypata na buo ca pazuu la a pathepa na changtaapa[20] Zingsuv ming ta pahmungsana hne kharuehaa hmang ca pa-aw sa thi tie,” ama ta.

³¹Thlaa ama chuo khu pahne amaa hmyanapa ing ca a cahang te, Thlaapa Pathe ta bi yite Khazing bie kha riephana hneta ama ri.

³²A zangpa bangkhuo ca ama buv yalya ta ama pathiypalung hne ama ruena a lu te ahungtahmuo ama hnyipa kha kama huopa ta lipa yi ta chechiy bangkhuo kha amaa hraw.

³³Lucuotuv tie ta Abyipa Zingsuv thupakhaana kha cahrana hne khuopuv ta ri yite iema bangkhuo kha Khazing ta thluechiy a hluvsa ta a pi yi.

³⁴Iema hraw lieta aa huna lie aa phahlapa aw vayi, tahematapakieca ama hnyipa alyi hne ing bangkhuo kha zaa yite, ama hmungpa tuokaa kha

³⁵lucuotuv tie phyi thabaw luo ama vya pahmya. Lucuotuv tie ta pakha cyicuo kha amaa huna haata ama re.

³⁶Cahaa cata lucuotuv tie ta Barnabas (a siyluo ca thaazuo pituv saacapaa) ama tapa, Saipras lie a puvpa Levi ming Josef ca

³⁷a hnyipa a lu kha zaa te, a hmungpa tuokaa kha vya cyi te lucuotuv tie phyi thabaw lie kha a vya chi.