Read Lautu Chin Lucuotuv 5 Bible Online

Lucuotuv 5 - Lautu Chin bible

Lucuotuv 5

¹Cuorasala Ananias ama tapapaa hne a napuvnung Safira ca ama hnyipa hmangkha zaa yite,

²ama hmungpa tuokaa chekha kha a napuvnung palung tlingkhyina hne dya chi te chekha dyi kha lucuotuv tie phyi thabaw luo a vya chiykhyi.

³Piter ta, “Ananias, khaapanakawma Thlaapa dung riypata Setaa hing na palung lie bi te alyi na zaanapa chekha kha dya naa chi?” a ta.

⁴Na zaa hluo kha nama huopa cuo vama? Cacuokie na zaa khu taata na hmungpa a muo ca nama huopa cuo vama? Khaapanakawma capa hmang ca tue riypa palung na phya? Kiema[21] malie dung vaciy cuorasala Khazing na na dung,” a ta.

⁵Ananias ca capa bie ca a thyi pahne a liepatyi te a thiy. Capa thuohlaa a thyipa bangkhuo ca ama phuv dyi aa hling.

⁶Satlie tie a vaw yite a riy[22] kha ama pahlaw khu taata a puvle yite ama va paby.

⁷Cakhutaata siymaluo pathung tluv a ru pata khaapa hmang ma a cuo tapa pachang li pata a napuvnung ca a zaa ngie.

⁸Piter ta, “Na chang tie, nama hne na navaapa ta alyi kha hingpa zaa ta dyi hingtama nama zaa?” a ta. Ama ta, “A cuo, ama zaa khatana ma zaa,” a ta.

⁹Peter ta, Khaapanakawma Abyipa Thlaapa kha dyapasya riypata nama palung a tlingpakhaw? Mang tie, na navaapa vaa pabypa tie kha ingchiypakaa a thaa lie amaa daa kalie khiy, nama zaw acaa puvle ra'a yi,” a ta.

¹⁰Sungkha ta Piter phyi thabaw lie kha a lie te a thiy. Satlie tie amaa zaa ngie ca a thiy rapa kha hmung yite pyakhyi yite a navaapa a thaa lie kha ama va paby.

¹¹Khrihsaabuv hne capa thuohlaa a thyipa bangkhuo ca ama phuv dyi aa hling.

¹²Lucuotuv tie ta cawsaa hrawlie kha pamangsana hne kharuehaa hmang a hluvpuv ama tue. Zangtuv tie ca Solomon hmiechue lie kha palung a lusa pata amaa hmya.

¹³Ale luo cawsaa ahungtahmuo vaa te nguo vayi, cuorasala cawsaazaapuv taca ama pathuosa.

¹⁴Tuokhaata a cuo zaw canung hne capaa hne a hluv vie hryly ta Abyipa kha zang yite ama buv luo ca amaa vya cha hryly.

¹⁵Cacuonakawta Piter a vya cakuole pata a mingthlaapa ta sisuele naaseyi tapata a pasapa kha a vya puv yite luopuv chunglie kha amaa phaa cunglie'a nata pangphaa cunglie kha ama pahlaa.

¹⁶Jerusalem cahriy khypuv tie taakhata cawsaa hluvpuv ca a vya hmya yite, a pasapa hne thlaapa pyalyipa ta a tuepa tie kha a vaw khyi yite, ama bangkhuo ta patluo sa pata ama cuo.

¹⁷Cakhutaata tluobyilecepa hne, ama hne a aw hnepa Sadusi tie bangkhuo ta khuopuv ta ihnyi yite lucuotuv tie kha

¹⁸patuv yite zaapuv thaw-ing lie kha ama pathla.

¹⁹Cuorasala zuo khata Abyipa avuoming ta thaw ingchiypakaa kha pahaw te,

²⁰“Cakuo ungla, Biena-ing chunglie kha a daa ungla, hing hringna kaw hing va chang tie ung,” a ta yi.

²¹Khy a dyi pahne Biena-ing chung luo kha a ngie yite, a ripa haakhata cawsaa kha ama pacuv. Tluobyilecepa hne ama hne a aw hnepa tie ama vya chiy tiyta, bierituvphuv tie hne Israel uvthyi bangkhuo kha a hmya pahry yite, lucuotuv tie kha ama hmiekung luo vya chiykhyi riypata bie ama pi.

²²Cuorasala thaw-ing paliy tie kha ama vaa tiyta iema kha thaw-ing chunglie ama hmung li nakawta vya kaa yite,

²³“Kiema ta thaw-ing a phasa pata a hre te a huotuvpa tie chiypakaa lie amaa daapa kha ma hmung, cuorasala ma pahaw tiyta iema kha pakha hmuo hmung vayi puv,” ama ta.

²⁴Biena-ing uvtuv byipa hne tluobyi tie ca capa bie ca ama thyi tiyta, ama nang ta uosa te khaapama a vya cuo aa tapa kha ama kharue ta a haasa.

²⁵Cakhupatahne cata cawsaa pakha vya chiy te, “Mang tie ung, thaw nama pathlapa cawsaa tie khana biena-ing chunglie a daa yite cawsaa a pacuv ciemuo yi,” a ta.

²⁶Biena-ing uvtuv byipa ca paliy tie hne khata vaa te lucuotuv tie kha amaa vya chiy. Cuorasala hruohra ta nuopuole a dapuole pata ca cuo vyi, tahematapakieca cawsaa ta alung ta malie vaa kie yi tapa kha ama ciy.

²⁷Lucuotuv tie ca vya chiykhyi yite, bierituvphuv hmielie kha padaa yite tluobyilecepa ta bie a hiehriy yi.

²⁸“Hingpapaa ming hingta cawsaa pacuv'a va ungciy tapata a cusa pata bie maca pi mangtli yi. Cuorasala nama pacuvna pata Jerusalem ca pabi ung cate hingpapaa thiyse hing kiema luv cung luo pathla riypata namaa ting hinghaw,” a ta yi.

²⁹Cuorasala Piter hne lucuotuv tie ta, Kiema ca cawsaa ri laata Khazing ri na maa ngie vie aa.

³⁰Thingkungpa cunglie pathlie ung cate nama thiepa Zingsuv ca ma mingchingmingvuo tie Khazing ta a pathu pakhaa mangtli.

³¹Israel ming kha ama suena taata a ngiepachiy pata sue a ngiethena pi riypata Khazing ta ama ca luochiytuv hne khuotuv ta a cacuo luo kuo ta patu te a cyicalang tli.

³²Kiema hne Khazing ta ama a ri a ngiepa tie a pipa yi Thlaapa Pathe kha pachangkhyituv ta ma cuo,” ama ta.

³³Capa bie ca ama thyi tiyta ama hi haa laalaw te lucuotuv tie kha thie diy ama khing.

³⁴Cuorasala bierituvphuv lie pakha ta a cuo rapa Gamaliel ama tapa Farasipa, cawsaa bangkhuo ta ama pa-uvsathyipa phungbie sayapa ca bierituvphuv hmielie kha a daa te lucuotuv tie kha ingle luo pyakhyi caw riypata bie a pi yi.

³⁵Ama ta Israel ming kha, “I phangkha Israel ming,[23] iema cunglie tue nama khingpa hmang hing a raaringsa pata ruepathiy tie ung.

³⁶Ma hnangluo ning kha Theudas ama tapapaa za pya te, cawsaa cakhawpa ta cuo va angne aa ta nakawta cawsaa zapaliy tluv ta ama ziy. Cuorasala ama ca thie yite a hnang a ziypa tie ca a chepatlaa yite ama vie diy.

³⁷Ama khutaa cata Galilee pa Judas kha mingluv ri cuo ning kha za pya ra te, cawsaa ta ama za ziy ra raalaa ca ama zaw kha rana luo chiy te a ziypa tie zaw kha amaa zaa chepatlaa diy.

³⁸A taapa hmang kawlie zaw hing niema ta hingpa cawsaa zaw hing khaahmuo ta kha ung, tahematapakieca hingpa hing cawsaa hmang tue pata a cuo kieca ra'a te;

³⁹cuorasala Khazing hmang tue pata a cuo kieca te khu the'a va ungciy, niema tuv na Khazing a dutuv ta a cuo pali'a ungciy,” a ta yi. A bie ca a ngie yite,

⁴⁰lucuotuv tie kha u yite asung ta ama chi. Cakhutaata Zingsuv ming ta bie ri hrahring li tli riypata chang yite ama pathlie.

⁴¹Lucuotuv tie ca bierituvphuv hmie taata ama za pya tiyta Zingsuv thueta nangzaahmiechi ang riypata maa tla tapata a rue yite ama palung a tluosa.

⁴²Cahaa cata Zingsuv ca Messiah[24] tana a cuo tapa kha Biena-ing lie cuose, ing[25] lie cuose, ningting ta ci li pata pacuv yite ama u khyi.