Read Lautu Chin Lucuotuv 6 Bible Online

Lucuotuv 6 - Lautu Chin bible

Lucuotuv 6

¹Capa cuo hrawning ca, ziytuv tie ca hluv vie le lawmaw yite, Grik ryi a cyipa Judah ming ta Hebru ming kha ningting sa ning riypa a rena kawlie tana kiema nunghlyi tie ca hnang malie ama chawpa vie, tapata ama kaw ama ri.

²Cacuonakawta lucuotuv hlyihning tie ta ziytuv bangkhuo kha pakiy yite, “Sapitiypi[26] kawlieta Khazing bie ri kha hnang ma chaw kieca pha the'a vyi.

³Cacuonakawta uvnu zaw, niema hraw taahingta singna hne Thlaapa ta a bipa pasariy kha a tlaw ungla hing re hing iema pi pata cuo sala,

⁴kiema hing ca thlaachuona hne Khazing bie rina lie tuv kha thaa pahrang vie pata cuose,” ama ta.

⁵Ama bie ta zaapuv palung kha patluo te, zangna hne Thlaapa Pathe ta a bipa Steven, Filip, Prokhoras, Nikanor, Timon, Parmenas, hne Antiok khy taata Judah biena luo a ngiepa Gentailpa Nikolaus kha amaa tlaw.

⁶Iema kha lucuotuv tie hmiekunglie padaa yite, ama luv cunglie kha ama kuv khang yite thlaa ama chuopa.

⁷Khazing bie ca aa ze hryly. Jerusalem khy chunglie kha zangtuv hluv hryly yite tluobyi hluvpuv zaw ta ca zangna ca amaa paw ra.

⁸Khazing vihnyina hne cahrana ta a bipa Steven ta kharuehaana hne pahmungsana hmanglepa kha cawsaa zaw hrawlie ta a tue.

⁹Cuorasala sii taata hya a zangpa tie biena-ing lie a pungpa chekha, Sairin, Alexandria, Silisia hne Asia taata a vawpa tie kha a daa yite Steven hneta bie amaa i.

¹⁰Cuorasala Steven ca singna hne Thlaapa Pathe ta bie a ri nakawta te khu vayi.

¹¹Cacuonakawta, cawsaa chekha kha, “Moses hne Khazing thuo pachi pata bie a ripa na ma thyi,” ta riypata biesakue ama khe.

¹²Cahaa cata cawsaazaapuv, uvthyi tie hne phungbie saya tie kha pasu yite Steven kha patuv yite bierituvphuv hmie luo kha ama vya chiykhyi.

¹³A hmuo lipa pachangkhyituv kha ku yite iema cata, “Hingpapaa hingta a pathepa ma biena-ing hne phungbie kha a du pata bie ri pari te,

¹⁴hing Nazareth khypa Zingsuv hingta hingpa Biena-ing hing para patlaa diy'a te Moses ta malie a pipa phungbie bangkhuo hing a thle diy'a ne tapata a ripa kha ma thyi,” tapata ama ri.

¹⁵Bierituvphuv chunglie a tupa bangkhuo ta Steven ca taapuo pata mang yite a hmie ca avuoming hmie hneta aa lupa kha ama hmung.