Read Lautu Chin Lucuotuv 7 Bible Online

Lucuotuv 7 - Lautu Chin bible

Lucuotuv 7

¹Tluobyilepa ta Steven ca, “Hinghaahingta ama tapa hing aa hmuopa a cuo ma?” a ta.

²Steven ta: “Uvnu zaw'[27]a nata paa zaw naathlie tie ung! Mingpa Abraham ca Haran lie a aw hluo, Mesopotamia ruo lie a za aw ning kha a lesyipa Khazing ca ama'a lie kha zaa luo te,

³‘Na ruo hne na tie na riy kha thuse la ica pahmung sa riypa ruo luo kha si tie,’ a za ta.

⁴Cacuonakawta Khaldia ruo kha pya se te Haran khy lie kha a va aw. A paa a thiy khu taata Khazing ta capa taacata ata nama awnapa hingpa ruo luo hing a vya palaw.

⁵Hingpa ruo lie hing phyipazaa pathlana khang hmuo ama kha ru a pi li raalaa pata, saata pakha hmuo a sa lipa khata nama hne na samingsahlaa cuotana hingpa ruo hing ru ta ica pi aa tapata bie a za kuo.

⁶Khazing ta, “Na samingsahlaa zaw ca malie ruo lie kha khyche ta ama cuo aa. Kung zapaliy chung bangkhuo sii ta a ziy'a yite riethyi ama ang aa.

⁷A re ama za hriepa pa mingphang tie kha kama ta ama bie ripa'a yi ang te capa khutaa cata pya'a yite hingpa hmang lie hing i ming ina pathuosa'a yi,” a ta.

⁸Cakhutaata Khazing ta Abraham kha vangdawtena phung kha a biekuo pahmangsana ta a pi. Cacuonakawta Abraham ta a saacapaa Isak kha a puv khu taata ningcari a ta pata a vangdaw te te, Isak zaw ta a saacapaa Jakob kha cahaa cata a vangdaw te te, Jakob zaw ta mingpa tie pahraahlyihning kha ama vangdaw a te ra yi.

⁹Ma mingpa tie ta Josef kha ihnyi yite Izipt ruo luo kha ama zaa. Cuorasala Khazing ta aw puo te

¹⁰a za angpa ruvnaana chung bangkhuo taata hya a pazang sa. Izipt siepahruo Faro hmielie aa daa tiyta Khazing ta singna hne Faro minghmiepha hmung khuthe riypa kha a za pi. Cacuonakawta Faro ta Izipt ruo bangkhuo uvtuv byi hne a siepahruo ing uvtuv byi ta a tue.

¹¹Izipt ruo hne Kanaan ruo chung bangkhuo lie kha cakuo tlung te ruvnaana khuopuv ta a tlung nakawta ma mingchingmingvuo tie kha sa ning riypa zaa hmung khu vayi.

¹²Cuorasala Jacob ta Izipt ruo liena sa a aw tapa kha a thyi tiyta ma mingchingmingvuo tie kha a yikhanapa a pathlie yi.

¹³Yihningnapa a pathliena lie yi kha Josef ta a uvnu zaw kha a pachang sa yite Josef chungkhue kaw kha Faro ta a pachang yi.

¹⁴Cakhutaata Josef ta a paa hne a ingchungkhue bangkhuo kha kya padaw sa yite ama bangkhuo ta sawsariy papangaa ama ta.

¹⁵Cacuonakawta Jacob ca Izipt luo kha za si te ama hne ma mingchingmingvuo tie ca capa lieca ama thiy.

¹⁶Ama riy ca Shekhem luo kha sikhyi yite Abraham ta Hamor mingphang tie'a lie ngu tuokaa ta a calyipa thluo lie kha ama paby.

¹⁷Khazing ta Abraham'a lie a tuepa biekuona a tlingna cuo a vya ngie tiyta, Izipt lie ma cawsaa tie ca khuopuv ta ama pungzaa.

¹⁸Cakhutaata Josef a pachang lipa siepahruopa ta Izipt ruo ca a vya uv.

¹⁹Ma mingchingmingvuo tie kha za dung yite a za hrisaa yi, a puvthaapa haaseta kha thiy naa se yi tapata ingle luo a pathaw sa yi.

²⁰Capa cuo ning kha Moses ca za puv te Khazing hmielie kha a puvthesa. A paa ing chunglie kha thlathung chung mangchiy yite,

²¹khungthing luo ama thaw ca Faro sacanungnung ta a saata tah a la te a sapa hrahring haata a mangchiy.

²²Cacuonakawta Moses ca Izipt singna bangkhuo kha pacaw sa pata cuote a bie lie hne a tuehriepa lie cahrana khuopuv ta a hnyi.

²³Kung sawliy a tling tiyta a mingphang Israel ming[28] parie riypa kha a palung chunglie a kya puv.

²⁴Iema hrawlie pakha kha Iziptpapaa ta a za hrisaa pakha a hmung tiyta a phangkha cawsaapa kha a bya te Iziptpapaa kha a thie.

²⁵Khazing ta iema hya pazang riypata ama a hmuopa kha a phangkha cawsaa zaw ta ama pachang thlu'a mang tapata Moses ta a rue raalaa ca pachang vayi.

²⁶A mawluopa ta Israel ming pahning amaa tuvpa kha hmung yite a ripatiy yi. Thukhyi yite, “Liechung zaw niema ca uvnu tamuo nama cuo ta, khaapanakawma na maa tuv,” a ta yi.

²⁷Cuorasala a viesaapa a hrutuvpapaa khata Moses kha vya nuo te, “Ahungma nama hing kiema uvtuv hne ma bie ripa riypata caa chi?

²⁸Azuochaning Iziptpa na thiepa haakhata ma ina thie khing ciy?” a ta.

²⁹Capa bie ca a thyi pahne ta Moses ca a ruo te Midian ruo luo kha mingpe ta a va aw. Capa lieca saacapaa pahning a sa.

³⁰Kung sawliy khu taata Sinai Tluo a thaa, ruochung lie kha ruohraw a kuopa myi chung taata avuoming pakha kha ama'a lie aa luo.

³¹Moses ca a hmungpa hmang cunglie kha a nang ta uo te mangpasie riypata a vaa ngie ca capa myi chung taacata,

³²‘Kama ca na mingchingmingvuo tie Khazing, Abraham, Isak hne Jakob Khazing tana i cuo,’ tapata Abyipa ueryi kha a thyi. Moses ca a cathangsa te a mang hmuo mang nguo vyi.

³³Cakhutaata Abyipa ta, ‘Na phyipakaw kha thlie tie, naa daana hmang hing a pathepa hmang tana a cuo,’ a ta.

³⁴Izipt lieta a awpa i cawsaa zaw ama te-angna hne ama riethyina kha hmung tli ang te amaa hrungna ueryi zaw kha i thyi tli. Iema khuo riypatana i za cung. Ata hingta a vaw tie, Izipt luo na ica pathlie aa,’ a ta.

³⁵“Ahungma kiema uvtuv riypa hne bieripa riypata caa chi?’ ta yite ama khing lipa Moses kha iema uvtuv hne hyapazangsatuv riypata ruohraw a kuopa myi hmuo pata Khazing ta iema'a luo a pathlie.

³⁶Iema kha Izipt ruo taata pyakhyi yite Izipt ruo, Riyliy Sepa, hne ruochung lie kha kharuehaa hmang hne pamangsana kha kung sawliy chung a tue.

³⁷Moses ca Israel ming kha, “Khazing ta kama ina pathliepa haahingta niema mingphang[29] chung taahingta profet pakha aca pathliepa'a yi,” zaa ta tuvpa khatana a cuo.

³⁸Ama ca Sinai Tluo lieta bie zaa changpa avuoming hneta ruochung lie Israel ming a hmyana lieta a awpa, ima mingchingmingvuo tie hneta khy a sapa, hne a hringpa Khazing bie kiema'a luo a chiy the riypata zaa cuhluotuv tana a cuo.

³⁹Ma mingchingmingvuo tie ta a ri zaa ngie khing lipa yi ta za thaw yite Izipt ruo luo kaa riypa tlaku kha ama za khing.

⁴⁰Aaron kyihuo khata, ‘Luo malie a chiy riypa khazing tie kha malie tuepa tie, Izipt ruo taata malie a vya chiytuv Moses cunglie khaama a tlung tapa kha pachang va puv,’ ama ta.

⁴¹Capa cuo ning ca cuetaata zuv kha tue yite saa thie yite hriykhung amaa ri; ama kuv ta ama tuepa kha pa-uvsathyina pyi ama tue.

⁴²Cuorasala iema kha Khazing ta a palise yite profet tie caa-uv chunglie ama capepa haakhata avuo aasiy kha a pabie sa yi. Capa caa-uv chunglie ca: Israel ming zaw, ruochung lie ta kung sawliy chung sahring thie ung cate namaa biepa kha kama i cuo ma?

⁴³Cuo va ang; Molok khazing thluodaa kha a phyale ung cate, nama kuv ta nama tuepa nama khazing Refan aasiy zuv kha nama cakele. Cacuonakawta niema ca Babilon vachi luo na ica thaw'a yi,” tapata aa cape.

⁴⁴Ma mingchingmingvuo tie khata Khazing kiema'a lie a aw tanapa ta ruochung lie kha thluodaa ama za hnyile. Capa thluodaa ca Khazing ta Moses a chaw ningta a pahmung sapa haakhata tue pata a cuo.

⁴⁵Thluodaa ama hmung khutaa khata, ma mingchingmingvuo tie, hne Joshua ca ama hmielie Khazing ta aa cadepa yi mingphang tie ruo ama lale ning kha capa thluodaa ca amaa sikhyile.

⁴⁶Capa thluodaa ca David chuo te khata capa lieca a aw. David ca Khazing minghmiepha hmung te Jakob Khazing cuota ing suokha sa riypata Khazing zaa hiepa tana a cuo.

⁴⁷Cuorasala ing a satuv tange ca Solomon tana a cuo.

⁴⁸Cadyiseca Cungnungce Khazing ca cawsaa kuv ta tuepa ing lie aw vyi; profet tie ta,

⁴⁹Vuoruo hing i tuna cuote, chuelyi hing i phyi chaana ta a cuo. Tuokhaapa ing ma ina sapa'a ungciy? Khaalie kha ma i pahyna hmang ca a cuo aa?

⁵⁰Hing hmang bangkhuo hing i kuv ta i tue ciepa cuo vama? a ta.

⁵¹A nangpingpa, pathiypalung hne naathyina lieta vangdaw a te lipa tie! Nama mingchingmingvuo tie ta ama za tue tawpa haatana Thlaapa hing namaa du pari.

⁵²Profet pakha ta chuo nama mingchingmingvuo tie ta ama za hrisaa lipa ama aw ma? Aa dangpapaa a vaw riypa a rilupa tie kha za thie yite, ata niema zaw hing capa a dangpapaa a lyituv hne a thietuv ta nama vya cuo.

⁵³Avuoming ta ama za chawpa Khazing phungbie kha a cuhluopa ca niema ta nama cuo raalaa pata, capa phungbie a ziy lipa ca niema ngiethie ta nama cuo,” a ta.

⁵⁴Ca bie ca ama thyi tiyta, ama hi haa hringhruo te Steven kha ama haa dyi ama rie sue.

⁵⁵Cuorasala Steven ca Thlaapa Pathe ta bi te, vuoruo luo kha a mang tiyta Khazing rungnaana hne Khazing cacuo luo kuo ta Zingsuv a daapa kha a hmung.

⁵⁶Catiyta, “Mang tie ung, vuoruo ingchiypakaa kha a pahaw te Khazing cacuo luo kuo ta Cawsaa Saacapaa a daapa khana i hmung!” a ta.

⁵⁷Cuorasala ama naa kha a paping yite, khuopuv ta khi yite amaa ruochiy.

⁵⁸Khyle luo kha a dapahriy yite alung ta ama vaa. Alung ta a vaapa tie cata ama caw kha Saul ama tapa satliepa phyi thabaw lie ama papung.

⁵⁹Alung ta ama vaa nguoluo ning kha Steven ta, “Abyipa Zingsuv i thlaapa kha na cuhluo thi tie,” tapata thlaa a chuo.

⁶⁰A pakhuv pane te, “Abyipa ama suena hing a thyipa pari thi kha yi,” tapata khuopuv ta a khi khu taata a thiy.[30] Saul zaw ta Steven ama thiepa kha a palung a tlingkhyi yi.