Read Lautu Chin Lucuotuv 8 Bible Online

Lucuotuv 8 - Lautu Chin bible

Lucuotuv 8

¹Capa cuo ning ca Jerusalem Khrihsaabuv lie kha hrisaathieruena khuopuv ta a tlung. Cacuonakawta lucuotuv tie ri li pata zangtuv bangkhuo ca Judea hne Samaria ruo chunglie kha amaa chepatlaa diy.

²Khazing a ciyzaapa chekha ta Steven kha paby yite khuopuv ta caa yite a muochie ama sa.

³Cuorasala Saul ca Khrihsaabuv kha para aa ting. Ingkha hnang ingkha ta cakuo te zangtuv tie kha canung capaa ta li pata a da yite thaw a pathla yi.

⁴Zangtuv a chepatlaapa tie kha hmangting ta si yite thuophaabie ama ri.

⁵Filip ca Samaria khypuv luo kha zuv te Messiah[31] kaw thuophaabie kha a ri.

⁶A ripa kha thyi yite a tuepa kharuehaa hmang kha ama hmung tiyta ama bangkhuo ta Filip bie kha a phata tah naa ama thlie.

⁷Thlaapa pyalyipa kha cawsaa hluvpuv chung taata khuopuv ta khi yite ama pya, a pakyapa tie hne a phyi cabiepa tie a hluvpuv zaw ama tluo.

⁸Cacuonakawta capa khypuv lieca palungtluona ta a bi.

⁹Capa khypuv chunglie ca Simon ama tapa, pacuo a thepa pakha aw te Samaria ming zaw kha ama kharue a pahaa yi. Cawsaa ciemuopa pakha tana i cuo tapata aa rue.

¹⁰Cawsaa bangkhuo, a cawcepa taata a lecepa te ta a bie kha naathlie yite, “Hing cawsaapa hing Khazing cahranapa, Alepa Cahrana tapa khatana a cuo, ama ta.

¹¹A pacuo khata iema kha cuo syipuv ama nang a pa-uo tli nakaw yi ta ama kha ama ziy.

¹²Cuorasala Khazing pena thuophaabie hne Zingsuv ming Filip ta a u khyipa kha ama zang tiyta canung hne capaa hne tiy amaa naw.

¹³Ama Simon hrahring zaw kha a zang ra. Tiy aa naw khu taata Filip kha a cakuona bangkhuo ta paziy te pamangsana hne kharuehaa hmanglepuv zaw kha a hmung tiyta a nang dyi a uo.

¹⁴Jerusalem lie a awpa lucuotuv tie ta Samaria ming na Khazing bie a cuhluo yi tapa kha ama pachang tiyta Piter hne Johan kha iema'a luo ca ama pathlie.

¹⁵Iema'a luo ama chiy tiyta Thlaapa Pathe kha ama cu riypata thlaa ama chuopa.

¹⁶(Zingsuv ming ta tiy amaa nawpa dyi cuote Thlaapa Pathe kha ahungtahmuo ta ting valie yi).

¹⁷Piter hne Johan ta ama luv cunglie kha ama kuv khang yite Thlaapa Pathe kha ama ting.

¹⁸Lucuotuv tie ta ama cunglie ama kuv khang yite na Thlaapa ama ting tapa kha Simon ta a hmung tiyta, iema kha tuokaa pi yite,

¹⁹“Ama cunglie i kuv i khangpa ahunghmuo cuo sala Thlaapa ama ting the riypata hing cahrana hing kama zaw na pi ra tie ung,” a ta.

²⁰Cuorasala Piter ta, “Khazing pipa lasaw kha tuokaa ta calyi naa ting nakawta nama hne na tuokaa hne khata va lidie tie ung.

²¹Khazing hmiekunglieta na pathiypalung a pha li nakawta ma re lie hing a te ra the vaciy, cuvu zaw hnyi vaciy.

²²Hing phalina hing a ngiepachiy la a ngiethena na hmung riypata Abyipa'a luo kha thlaa chuo tie.

²³Tahematapakieca nama ca ihnyina hne bi cate suena thaw chunglie a tlapa tana na cuo,” a ta.

²⁴Simon ta, “Na ripa suokha hmuo i cunglie a tlung li riypata thlaa na chuopa tie,” tapata a palie.

²⁵Piter hne Johan ca ama hmungpa hne amaa tawpa kha ama ri khu taata hne Abyipa bie kha ama phu khu taata Jerusalem luo kha kaa yite Samaria khyta hluvpuv lie kha thuophaabie ama kya phupaale.

²⁶Cakhutaata Abyipa avuoming pakha ta Filip kha, “Thu la sungluo kha sibung la Jerusalem taata Gaza luo a sipa luopuv luo kha sibung tie,” a ta. (Capa luopuv ca hmuo li tlipa luopuv tana a cuo).

²⁷Cacuonakaw thu te a si. Luopuv lie kha Ethiopia siepahruonung Kandeis a sue a thiy bangkhuo a kingtuvpa, naw a hnyi ciemuopa, Ethiopia tiydiypa abyi pakha a za aw. Ama ca Khazing abie riypata Jerusalem luo kha a khaw te

²⁸ing luo a kaale ningta a cuo; aruole cunglie kha a tu te profet Isaiah caa-uv kha a ri.

²⁹Thlaapa ta Filip kha, “Huepa aruole a thaa luo hue vaa tie,” a ta.

³⁰Aruole luo kha vaa ruo te profet Isaiah caa-uv a ripa kha a thyi ca, Filip ta, “Na ripa hing a siyluo na pachang ma?” a ta.

³¹Ama ta, “Pakhakha ta ina pasiepa li pata ca tuokhaatama i pachang the aa?” a ta. Cakhutaacata Filip kha aruole luo kie riypata hry te a thaa lie a patu sa.

³²A za ri nguoluopa biepathepa ca: Ama ca thie riypa tuv haata sikhyi yite, A hming a ngutuv hmielie tuvtaata khi li pata a awpa haata, kaakha hmuo bie ri li patana a aw.

³³Nangzaana kha ang te a daakuotuv ahunghmuo hnyi vyi. Chuelyi taata a hringna lapa a cuo nakawta, A ciypathla ahunghmuo ri riy aw vayi.

³⁴Ethiopia tiydiypapaa cata Filip kha, “Ca hiehriy thi'a ang, profet ta a ripa hing ahung kaw tama a cuo? Ama kaw ma, pakhakha kaw ma?” a ta.

³⁵Catiyta Filip ta hningpa Caapathepa taahingta pathu pata Zingsuv kaw thuophaabie kha ama ca a chang.

³⁶Cahaa cata ama si bung nguoluo pata tiy awna luo kha ama chiy ca, capa a byipa cata, “Mang tie, tiy a aw hing; tiy a naw riypata khaapama naa pakhuo aa?” a ta.

³⁷(Filip ta, “na pathiy na palung yalya ta na zang kieca tiynawna hmung riypa na cuo,” a ta. Capapaa cata, “I zang, Zingsuv Khrih ca Khazing saacapaa tana a cuo tapa kha i zang,” a ta.)[32]

³⁸Aruole kha padaa sa te, ama pahning ta tiy chung luo ca cung yite Filip ta tiy a naw.

³⁹Tiy chung taata ama kya pya ca Abyipa Thlaapa ta Filip kha la te a vie; Ethiopia byipa khata hmung the va tli, cadyiseca ama ca palung tluo ciemuo pata ing luo kha a si.

⁴⁰Filip ca Azotus khy lie kha a vya luo te, Sisaria a chiyna te luopuv lie khy bangkhuo khata thuophaabie a phule.