Read Lautu Chin Lucuotuv 9 Bible Online

Lucuotuv 9 - Lautu Chin bible

Lucuotuv 9

¹Capa cuo hrawning ca Saul ta Abyipa ziytuv tie kha thie riypata a pachiypahuo nguoluo yi. Tluobyilecepa'a luo kha vaa te,

²Damaskas khy Judah ming apungna-ing uvtuv tie ta ama ama pachangna riypata caa kha a hie. Aa tingna ca capa khy lie kha Phungluo a ziytuv ama aw pata a cuo kieca canung capaa ta li pata patuv pata Jerusalem luo thaw pathla riypata a chiy riypata a cuo.

³Damaskas khy luo a va chiy'a nangpa khata, sungkha puv ta vuoruo taata khena ta ama hne a cahriy kha a za khe.

⁴Alyi lie kha a lie te ueryi suokha ta, “Saul, Saul, khaapanakawma ina hrisaathierue ciy?” a ta.

⁵Saul ta, “Ahung tama na cuo, Abyipa? a ta. Capa ueryi cata, “Na hrisaathieruepa Zingsuv tana i cuo.

⁶Thu la khypuv chung luo kha vaa ngie tie, na tue riypa kha chang pata na cuo aa,” a ta.

⁷A khytlawhnepa tie ca a ca-ang ta ama ca-ang, tahematapakieca ueryi dyi kha thyi yite ahunghmuo hmung vayi.

⁸Saul ca a lyi taakhata kya thu te a ming a padyi raalaa ca khaahmuo hmung the vyi; cacuonakawta a kuv ta ca-yale yite Damaskas khychung luo kha amaa ngiekhyi.

⁹Ningthung chung a ming hmung li pata, hne ning li dang li pata a aw.

¹⁰Damaskas khy chunglie ca Ananias ama tapa ziytuv pakha a aw. Muocuo suokha hmung te Abyipa ta, “Ananias,” a ta. Ama ta, “Abyipa, hinglie hing na i aw,” a ta.

¹¹Abyipa ta, “A pachie la Luo Aa dangpa ama tapa luopuv luo kha vaa la; Judas ing lie kha Tarsas khypa Saul ama tapa kha a aw ma tapata va hiehriy tie yi. Ama ca thlaa a chuo nguoluo ning ta cuo te,

¹²Ananias ama tapapaa ta a luv cunglie a kuv khang te a ming a hmung pakhaa thena riypata thlaa a chuopa nguoluopa kha muocuo ta a hmung,” a ta.

¹³Cuorasala Ananias ta, “Abyipa, hingpapaa kaw hing cawsaa hluvpuv'a taata i thyi tli, Jerusalem lie a awpa na cawsaa pathepa zaw cunglie ta hmangpha lipa khazaa ma a tue tapa hne

¹⁴hingpa lie zaw hing nama ming caa upa zaw bangkhuo patuv riypata tluobyilecepa'a taata nawhnyina a la patana a cuo,” a ta.

¹⁵Cuorasala Abyipa ta, “Cakuo tie, tahematapakieca ama ca Jentail ming hne siepahruo tie'a lie, hne Israel ming hraw luo i ming a phyatuv hne a pachang satuv riypata i tlawpa i cehre tana a cuo.

¹⁶Kama hrahring ta hingpapaa hing kama kawlieta khatluv tama a te-ang tapa kha ica pahmung sa aa,” a ta.

¹⁷Cacuonakawta Ananias ca ingchung luo kha a ngie te, Saul luv cunglie kha a kuv a khang khu taata, “Uvnu Saul, Hingpa luo naa vawnapa luopuv lie nama'a lie a luopa Abyipa Zingsuv ta na ming a hmung pakhaa riypa hne Thlaapa Pathe ta na bi riypata kama hing ina vya pathlie,” a ta.

¹⁸Sungkhabala ta ngaaphuvhling haata a tapa kha Saul ming taata tla te a ming ca a hmung khu pakhaa. Cakhutaata thu te tiynawna a ang.

¹⁹Cakhutaata sa ning te thaazuo a hnyi pakhaa. Saul ca Damaskas khy lie a awpa ziytuv tie'a lie kha ning pachangta chung a aw.

²⁰Apungna-ing lie kha, “Zingsuv ca Khazing Saacapaa tana a cuo,” tapa kha a phu.

²¹A bie ripa a thyipa bangkhuo kha ama nang ta uo te, Hingpapaa hing Jerusalem lie Zingsuv a zangtuv tie a paratuv kha cuo vama? Iema kha patuv pata tluobyi tie'a luo chiykhyi riypata hingpa hmang luo a vawpa kha cuo vama? ama ta.

²²Saul ca cahrana hneta bi viele hryly te Zingsuv ca Messiah[33] tana a cuo tapata a ripa khata Damaskas khy lie a awpa Judah ming kha ama palung a pataw a pamuo yi.

²³Ning syipuv khu taata Judah ming ta thie riypata ama rawpa kha

²⁴Saul ta a pachang. Ama thie khu riypa khata thlake bangkhuo kha chungzuo ta ama huo,

²⁵cuorasala ama a ziytuv tie ta pasyi lie khung yite zuo ta dya cakuo khyi yite khy dungkhuona piehu khue taata ama pachung.

²⁶Jerusalem luo a chiy tiyta ziytuv tie a taw riypa kha aa zue; cuorasala ziytuv a cuo ra hrahring tli tapa kha ama zang li nakawta ama bangkhuo ta ama kha ama ciy.

²⁷Cuorasala Barnabas ta lucuotuv tie'a luo kha vaakhyi te luopuv lieta Abyipa a hmung na zya, Abyipa ta ama'a lie bie a ripa, Damaskas lieta Khazing bie a phuna kaw kha a chang yi.

²⁸Cacuonakaw Jerusalem lieta iema'a lie kha hyazangsa pata aw te Abyipa ming ta riephasa pata phung a ri.

²⁹Grik ryi a cyipa Judah ming zaw hne khata bie a rue yite a i zaw amaa i, cuorasala iema ta ama kha thie amaa nang.

³⁰Khapa kaw kha zangtuv tie[34] ta ama thyi tiyta ama kha Sisaria luo paphya yite Tarsas luo ama pasi.

³¹Capa cuo ning ca Judea ruo, Galilee ruo hne Samaria ruo lie a awpa khrihsaabuv tie'a lieca diena aw te a kiethaw ciemuo. Abyipa ciyzaana hne hring yite Thlaapa Pathe hnaanguona chunglie ama aw nakawta mingluv zaw ama hluv hryly.

³²Piter ca khyzaa ta a awpa zangtuv tie a tlawlepa yi ta Lidda lie a awpa a mingpathepa tie'a luo kha a chiy.

³³Capa lieca a pakya nakawta kung cari chung a ziena lie a laa tlipa Ainias ama tapapaa kha a hmung.

³⁴Piter ta, “Ainias, Zingsuv Khrih na caa patluo sa tli, thu la na pangphaa kha lang tie,” a ta. Ainias ca sungkha ta a thu.

³⁵Lidda lie hne Sharon lie a awpa bangkhuo khata hmung yite Abyipa'a luo amaa vya pali.

³⁶Joppa khy lie kha Tabitha ama ta nung ziytuv pakha aw te Grik ryi taca Dorkas[35] ama ta. Ama ca hmangphapa tue pari te a siypasapa tie a bya paripa tana a cuo.

³⁷Capa cuo ning kha pasa te a thiy. A riy ca pasiy yite cungluo duo lieta ama pasing.

³⁸Lidda khy ca Joppa khy hne khata a ngie te, Joppa lieta Piter a awpa kha ziytuv tie ta ama pachang nakawta cawsaa pahning pathlie yite, “A catli pata kiema'a luo a vaw la,” tapata paa ama va pakie sa.

³⁹Cacuonakaw Piter ca a pachie te iema hne cata a si. A va chiy pahne a cung duo luo kha ama kie khyi. Nunghlyi bangkhuo ta a thaa lie kha a vya daa yite ama caapuo pata a hring chung ta a taapa pa yi buohryicungle hne caw hrangpa zaw kha ama pahmung.

⁴⁰Piter ta iema kha ale luo papya yite cakhutaacata a pakhuv pane te thlaa a chuo. A riy luo kha a pali te, “Tabitha, thu tie,” a ta. A ming kya padyi te Piter kha a hmung ca aa kya tu.

⁴¹Piter ta a kuv kha hluo te a padaa. Cakhutaata a mingpathepa tie hne nunghlyi zaw kha u yite a hring tapa kha a pahmung yi.

⁴²Capa thuohlaa ca Joppa khy kha a ze diy te cawsaa hluvpuv ta Abyipa kha ama zang.

⁴³Piter ca Joppa khy lieta Simon ama tapa savang re a hriepapaa'a lie kha cuo syipuv a aw.