Read Lautu Chin Rom 1 Bible Online

Rom 1 - Lautu Chin bible

Rom 1

¹Zingsuv Khrih changtaapa[1] hne lucuotuv, Khazing thuophaabie ri riypata a tlawpa kama Paul ta caa ica paphya yi.

²Caapathepa lieta profet tie hmuo pata bie za kuolupa,

³Saacapaa hneta aa patuvpa Thuophaabie tana a cuo. Thiysaa luota ripa kietaca David ciypathla cuote,

⁴thlaapa luo hne a pathena luo kuo ta ripa kieca cahrana lepuv ta thiyna taata pathupa a cuonapa khata Khazing Saacapaa a cuona kha a paluo sa.

⁵Ama thueta a vihnyina hne lucuotuv cuona kha hmung pate, Jentail ming kha zangna chung luo a vya chiy riypata malie a chang.

⁶Capa Zingsuv huota kupa chunglie ca niema Rom lie a awpa zaw namaa te ra.

⁷A cawsaa pathepa cuo riypata Khazing ta ku te a duepa Rom lie a awpa bangkhuo: Ima Paa Khazing hne Abyipa Zingsuv Khrih'a taata vihnyina hne diena ca nama cunglie aw mangsue.

⁸A suokhana ta, nama zangna ca chuelyi bangkhuo a pathuo nakawta, niema kawlie cata Zingsuv Khrih thueta i Khazing kha i pathuo sa.

⁹A saacapaa kaw thuophaabie kha pathiypalung hmisi ta i phupa Khazing ca i thlaachuona lie niema kha ci li ta icaa thyipa yi kha naa pachangkhyituv a cuo.

¹⁰Khazing ta luo na pahawpa sala a ru hluo ta niema'a luo ica vya tlaw khuna riypa yita thlaa i chuo.

¹¹Tahematapakieca niema hmung kha a ngietie lipa angta niema hne thlaapa lasaw kha a hraw pata thaazuo ica pi khing yi.

¹²Caca niema hne kama kha ma zangna ta thaazuo a pi kaluo riypa khatana a cuo.

¹³Uvnu hne sieta zaw,[2] ica pachang sa khingpa yi ca, niema tlaw riypa hing yi hluvpuv i ting tli, cuorasala naa pakhuopa suokhakha a aw pari. Jentail ming hrangpa'a taata ama palung i pathle sapa ama awpa haata niema hraw taa zaw ta a palung a thlepa pa-aw sa riypa ca i khing hringhruo

¹⁴Kama hing Grik ming hne Grik ming a cuo lipa tie'a lie cuose, a singpa hne a ngaapa tie'a lie zaw lyibuo i hnyi.

¹⁵Capacana niema Rom lie a awpa tie'a lie zaw thuophaabie phu riypa i khing hringhruopa ca a cuo.

¹⁶Thuophaabie hing zaakhyi va ang; tahematapakieca a zangpa bangkhuo khuona ama hmung riypata Khazing cahrana tana a cuo, Judah ming cuota cuo taa te Jentail ming cuo zaw ta a cuo ra.

¹⁷Caapathepa chunglie ta, “Cawsaa aa dangpa ca zangna thue tana a hring aa,” a tapa haata, ca thuophaabie chunglie ca Khazing'a taata adangna kha a luo te, ca adangna ca a hruothu taata a chuona te zangna thue tana a cuo.

¹⁸Khazing hihaana ca vuoruo taata zaa luo te, iema phalina ta biehmisipa a pakhuopa tie ama phalina bangkhuo hne Khazing ama pachang lina kha aa du.

¹⁹Tahematapakieca iema ta Khazing ama pachang khuna riypa luo kha Khazing ta iema'a lie a siesa pata a paluo sa thluo.

²⁰Chuelyi hruothu baataata chuozaa ta a hmangpa a cuona hne a cahrana ca, hmung khu a cuo li raalaa pata, a tuepa hmang taata pachang khu pata a cuo. Iema ca a ngiethe pata cuo'a vayi;

²¹tahematapakieca Khazing kha ama pachang thluo pata ama hne aa phuvpa pa-uvsathyina kha pi lipa yi ta aa law zaw a law vayi. Ama ruena kha vievuv te, ruena a hnyi lipa ama pathiypalung ca a zing ta a zing.

²²Ma sing ne ama ta raalaa pata a ngaapa ta ama cuo.

²³A thiy khu lipa Khazing rungnaana kha a thiykhupa cawsaa hne pavaa, a cuo li kie phyipaliypa saruopa hne aa thiy ta a thiypa saruopa hne aa lupa kuvtuezuv khata thle yite ama bie.

²⁴Cacuonakawta Khazing ta ama pathiypalung hietliepa hmang pyalyipa kha patue sa thluo yite, iema pakha hne pakha cunglie ama pangpa ling a pazue sapa hmang kha ama tue.

²⁵Tahematapakieca Khazing biehmisipa kha hangna ta thle yite, satuv laata sapa a cuopa kha abie yite a re ama hrie. Satuv khana chuozaa pathuo sa riypata a cuo! Amen.

²⁶Cahaa cata a cuo nakawta Khazing ta iema kha pangpa ling a pazue sapa hmang hietliena luo kha a pathlie yi. Ama canung tie kha tahmuo tue phungpa awhnena kha hmuo lipa yi ta tue phung lipa awhnena kha ama hmuo.

²⁷Cahaa ngiethie cata capaa zaw ta canung hne tue phungpa awhnena kha thuse yite capaa hne capaa tlaku ama aw hne. Capaa hne capaa ta nangzaa aa chiypa hmang kha ama tue nakawta iema hne aa phuvpa duotena kha ama hmung.

²⁸Cahaa cata, iema ta Khazing pachang khingna pathiypalung kha ama hnyi li nakawta, Khazing ta a pyalyipa pathiypalung hnyi riypa khata pathlie thluo yite tue li riypa hmang kha ama tue.

²⁹Iema ca chiena hne phalina phangting, karuo-awna hne i-awna, hietliena, lienawna, aduna, hanghiena, zyana hneta ama bi. Pakha hne pakha amaa caw-yi,

³⁰ama thuo amaa pachi, Khazing kha siysaa ri vayi, malie kha ama ese, ahruo ama tle, amaa pale, chiena tue kha ama rue byalya, nungpaa ri a ngie vayi,

³¹ama ngaa, zangna hnyi vayi, nangduena hnyi vayi, malie kha ngiechi khing vayi.

³²Hinghaahingta a hringpa bangkhuo ca thiy amaa phuv tapa Khazing biechina kha ama pachang thluo raalaa pata, iema ama tue hlyitaw taata kha haapa hmangpha lipa a tuepa tie kha ama palung a tling khyi.