Read Lautu Chin Rom 11 Bible Online

Rom 11 - Lautu Chin bible

Rom 11

¹Cacuokie, Khazing ta a cawsaa zaw ca a thaw yi ma? Thaw changchiy vayi! Kama hrahring hing Israel ming, Abraham saming, Benjamin phang ta i cuo.

²Khazing ta hluo ning taata a za pachang ciepa a cawsaa zaw kha thaw vayi. Caapathepa chunglie Elijah ta Israel ming kawlie kha Khazing'a luo tuokhaatama a ri tapa kha pachang va ung cama?

³Elijah ta, “Abyipa, na profet tie kha thie yite, na bienatluophie kha ama phi diy; kama dyi hingna a ngaa ang, kama hing hmuo thie inaa nang kalie yi,” a ta.

⁴Cuorasala Khazing'a taata tuokhaatama a palie? “Kama cuota Baal hmielie a pakhuv a pane lipa thaw sariy i pangaa kalie yi,” a ta.

⁵Cahaa cata ata cuo lie zaw hing Khazing ta vihnyina ta aa tlawpa amaa ngaa kalie.

⁶Cuorasala capa aa tlawpa yi ca tuehriena thueta cuo li pata vihnyina thue tana a cuo. Caacuolikieca vihnyina ca vihnyina ta cuo'a vyi.

⁷Cakhutaa, tuokhaama ma ta aa? Israel ming ta ama huvpa kha hmung vayi. A tlawpa tie ta capaca hmung yite, cuorasala aa ngaapa tie ca ama palung kha a pakhung sa yi.

⁸Caapathepa lie a capepa ca, Khazing ta iema kha ama palung pakhung sa yite, ata ning tepa hingta ama ming hmung li'a pata, ama naa zaw thyi'a vyi,” a ta.

⁹Cakhutaata David ta ri te, “Ama cabya ca sariy hne cyihyi ta a li sala, ama cuota a pachiyna alung hne phuv aa lana ta a li se.

¹⁰Ama hmung the li riypata ama ming ca pacuepa cuo sala, ama ke ca chuozaa ta a kang se,” a ta.

¹¹Cacuokie, iema ca amaa pachiy kie amaa lie'a ma? Cuo changchiy'a vyi. Cuorasala, iema amaa pachiyna[9] thueta Khuona ca Judah ming hietlie riypata Jentail ming'a luo kha aa vaw.

¹²Iema a pachiyna ta chuelyi lie thluechiyna a hluvpuv chiykhyi te, iema a sungna ta Jentail ming cuota thluechiyna hluvpuv a chiykhyi kieca, a tlingta tah iema amaa te rapa ca khatluv tama aa ky hryly aa!

¹³Ata hing ca niema Jentail ming khana ica ta yi. Jentail ming'a luo lucuotuv i cuo chung bangkhuo ca i re ca i palesakhyi pari aa.

¹⁴I mingphang[10] zaw kha ama hie patlie sa pata a cawta chuo khuo khu the'a yi angma i tanapa tana cuo.

¹⁵Tahematapakieca, iema kha thawpa ama cuona pata Khazing hne chuelyi a rena ta a cuo kieca, iema kha cuhluo pata ama cuona ca khaapama a lu aa? A thiypa tie cuota hringna na a cuo aa.

¹⁶Viechuo tluo taata tluokha kha Khazing pacuo pate a pathe pata a cuo kieca tluo hrangpa zaw bangkhuo kha pathe te, a thariy kha a pathe pata a cuo kieca a ce zaw kha ama pathe ra.

¹⁷Cuorasala cyipa Oliv kung a nge chekha kha te pata, niema ruo Oliv kung a nge kha iema hmang lieca patue pata, cyipa Oliv kung thariy[11] taata a la kha namaa hraw thluo pata a cuo kieca,

¹⁸tepa nge tie kha ahruo tlesue kha ung. Ahruo nama tle kieca, niema ta a thariy kha ring lipa ung cata a thariy ta niema aca ringpa yi kha a thyi tie ung.

¹⁹Nama ta, “Kama kha patue riypatana a nge kha te pata ama cuo,” na ta aa.

²⁰Capaca aa hmuopa a cuo. Iema ca ama zang li nakawta tepa ama cuo, cuorasala niema ca zangna thue dyi tana nama aw. Cacuonakawta ahruo tle kha ung, ciyna pathiypalung tuv kha hnyi tie ung.

²¹Tahematapakieca Khazing ta a nge hmisipa kha ngie a buo li pata a aw kieca, niema zaw kha ngie caa buo ra'a vayi.

²²Cakhutaata, Khazing duena hne ciy aa chiyna kha a thyi tie ung. A liepa tie cuota ciy a chiysa te cuorasala Khazing ta niema cunglie a hnyipa duena ta a duena chunglie kha aca pa-aw sa pazue'a yi. Caacuolikieca niema zaw kha tepachung pata nama cuo ra aa.

²³Cakhutaata, Israel ming kha hmuo ama zang lina kha ama sise kieca patue pakhaa pata ama cuo aa, tahematapakieca Khazing ca iema kha patue pakhaa riypata cahrana a hnyi.

²⁴Tahematapakieca niema kha ruo Oliv kung taata ca te yite, a phung a cuo li raalaa pata cyipa Oliv kung luo patue pata nama cuo kieca, khatluv tama ace hmisipa a cuopa kha a kung puvnung luo patue pakhaa ca a na vie aa.

²⁵Cacuonakawta, uvnu hne sieta zaw,[12] niema nama cuona laata a sing vie pata a rue kha ung. Hingpa bieparuv hingna ica pachang sa khing yi: Israel ming chekha cunglie ta palung a khungna tlung'a te, caca Jentail ming zangna chung luo a vaw riypa zaa amaa vawna cuote khiy tana a cuo aa.

²⁶Cakhutaata Israel ming bangkhuo ca khuo pata ama cuo aa. Caapathepa ta, Zion taata khuona a vaw'a te, Jakob'a taata pha lina bangkhuo kha a cade diy aa.

²⁷Ama suena kha i lapa thue yi ta, Hingpa biekuona hing iema hneta i tue aa,” a ta.

²⁸Thuophaabie ta ripa kieca iema ca Khazing cariepa ta cuo yite, caca niema cuota na a cuo. Cuorasala a tlawna ta ripa ta a cuo kieca iema ca ama mingchingmingvuo tie thueta Khazing ta a duepa ta ama cuo.

²⁹Tahematapakieca Khazing lasaw hne kuna ca a thle buo vyi.

³⁰A hluo taca niema ca Khazing ri a zaa ngie li pata nama cuo, cuorasala atalie hing Judah ming kha ri amaa ngie li nakawta niema ca Khazing ngiechina kha nama hmung.

³¹Cacuonakawta niema nama hmungpa nangduena thue khata iema zaw nangduena ama hmung ra riypata iema ca Khazing ri kha a ngie li pata a pa-aw sa yi.

³²Tahematapakieca cawsaa bangkhuo cunglie nangduena a hnyi the riypata Khazing ta ama bangkhuo khata ri a ngie lina thaw chunglie a chi diy yi.

³³Khazing hing a hnyirung hring-hruo de! A singna hne a pachangna hing aa thuv hringhruo de! A biechina hing ahung ta a khingna capya khu'a te ma, a hmang tuepa hing ahung ta a pachang khu aa!

³⁴“Tahematapakieca ahungma Khazing pathiypalung a pachang? Ahungma ruena a pi khu?”

³⁵“Ama'a taa lasaw hmung pakhaa riypata, Ahungma ama kha lasaw a pi buo?”

³⁶Tahematapakieca hmangting bang-khuo hing ama'a taata hne ama thueta hne ama huopa tana ama cuo diy. A cunglieta rungnaana chuozaa ta aw mangsue. Amen.