Read Lautu Chin Rom 12 Bible Online

Rom 12 - Lautu Chin bible

Rom 12

¹Cacuonakawta, uvnu hne sieta zaw,[13] Khazing ngiechina thueta nama pangpa kha a pathepa hne cuhluo tluo aa tlapa a hringpa hriykhung a rina haata Khazing'a luo kha a pi tie ung. Capaca Khazing'a luo nama pi riypa biena hmisipa tana a cuo.

²Hing chuelyi[14] phung hing ziyle kha ung cuorasala palung thaapa phya ungla a thle tie ung. Cacuokiena Khazing khingna hing khaama a cuo, khaapama Khazing hmielie a phapa hne, cuhluo tluo a tla te a tlingpa ta a cuo tapa kha nama hmung dawlu khu aa.

³Ina pipa vihnyina thueta niema pakha cyicuo kha ica chang yi. Namaa rue riypa laata a suo vie ta a rue kha ung, cuorasala Khazing ta aca pipa yi zangna cyicuo haakhata nama cuona kha a pachang tie ung.

⁴Pangpa suokha chunglie hing saapa chebuo a hluvpuv aw te capa saapa chebuo rehriena ca a lu kaluo vayi.

⁵Cacuonakawta kiema ca a hluvpuv ma cuo raalaa pata Khrih chunglie ca pangkha ta ma cuo. Pakha cyicuo ta ca pangkha chunglie chebuo ta ma cuo ung.

⁶Kiema malie a pipa vihnyina haakhata aa nanangpa lasaw hnyi pate, capaca profet-biephu ri ta a cuo kieca zangna ma hnyipa zaa kha hmuo ung sala ri ung siy;

⁷Khazing rehrie a cuo kieca hrie ung sala, pacuvtuv re a cuo kieca pacuv ung siy;

⁸malie thaazuo pi kha a cuo kieca malie kha thaazuo pi ung sala, malie pipachaa riypata a cuo kieca pahyasa pa ta pi ung siy; luochiytuv re ta a cuo kieca temaana hne hrie ung sala, malie ngie va chi riypata a cuo kieca palung tluosa pata ngie va chi ungsiy.

⁹Duena ma tapa hing pathiypalung hmisi ta duena cuose. Hmang pha lipa kha va hue la, hmangphapa kha a patuv tie.

¹⁰Pakha hne pakha kha viesaa duena ta a pasungpanaa ungla a due tie ung. Pakha hne pakha kha a pa-uvsathyi tie ung.

¹¹Nama thaa thuv kha se; palung thusa pata Khazing re kha hrie tie ung.

¹²A nguopuona lie kha nama palung tluo se. Ruvnaana nama ang tiyta nama palung pasiy sala, thlaa chuo pari tie ung.

¹³Mingpathepa tie amaa huna kha pihluo ungla khychehluobaa due a thepa cuo tie ung.

¹⁴Caa hrisaathieruepa tie kha thluechiy pi tie ung; chiesa li pata thluechiy pi tie ung.

¹⁵A palung a tluopa tie kha palung tluokhyi ungla, a caapa tie kha caakhyi tie ung.

¹⁶Pakha hne pakha palung a lusa pata aw ungla; nama palung le kha se. Cuorasala aa phahlapa tie hne khata a khe the ungla, nama cuona laa khata a pasing sa vie kha ung.

¹⁷Pakha hne pakha kha pha lina ta vieriy a thung kha ung, cuorasala cawsaa bangkhuo hmielie a phapa kha tue a zue tie ung.

¹⁸A cuo khu pata a cuo kieca cawsaa bangkhuo hne khata aa re a dieta tah aw tie ung.

¹⁹I duepa zaw, niema ta tah phuv la kha ung, Khazing hihaana tuv ta a hrie the riypa khata chi thluo tie ung. Caapathepa chunglie aa capepa ca, “Abyipa ta, phuvlana ca kama huopa tana a cuo, Kama na a thung'a yi ang, a ta,” a ta.

²⁰“Cacuonakawta, na carie tie kha ama nang a diy kieca sa pi yi la; ama tiy a hrie kieca tiy pi tie yi. Cahaa cata na tue kieca a luv cunglie kha myihyi sekhalapa na chi patana a cuo aa,” a ta.

²¹Pha lina kha a pate sa kha ung, cuorasala pha lina kha phana ta te tie ung.