Read Lautu Chin Rom 13 Bible Online

Rom 13 - Lautu Chin bible

Rom 13

¹Uvtuv byi kha ama ri vaa ngie tie ung; tahematapakieca Khazing'a taa ta li pata uvtuv byi aw the vyi. Ata lie uvtuv byi tie zaw hing Khazing ta a pipa tana ama cuo.

²Cacuonakawta uvtuv byi a dupa ca Khazing ta re a pipa tie a du pata cuo yite, bierina na amaa taw aa.

³Tahematapakieca uvtuv byi tie ca hmangpha a tuepa tie ta ciy riypa cuo li pata pha lina a tuepa tie dyi ta ciy riypatana a cuo. Uvtuv byi tie ciy li pata na aw khing ma? Cacuokieca hmangphapa kha tue la aca pathuo sa aa;

⁴tahematapakieca uvtuv byi ca nama phana cuota Khazing changtaapa a cuopa tana ama cuo. Cuorasala hmangpha lipa na tue kieca, na ciy yi a hu aa, tahematapakieca uvtuv byi ca a cakhawpa ta zueziy kha a cyi vyi! Pha lina a tuetuvpa tie cunglie Khazing hihaana a patlung satuv Khazing changtaapa tana ama cuo.

⁵Cacuonakawta Khazing hihaana nakaw dyi ta cuo li pata nama chiephathleduona nakaw khata ama ri kha a ngie tie ung.

⁶Ngukhyi nama pipa zaw hing, uvtuv byi tie ca ama cuo bangkhuo uvna luota aa hmuopa Khazing changtaapa ama cuo nakawtana a cuo.

⁷Ama hmung riypa a cuopa bangkhuo kha pi tie ung _ pangpa ngukhyi a hmung riypa kha pangpa ngukhyi pi ungla, nama hnyipa hmang ngukhyi a hmung riypa kha nama hnyipa hmang ngukhyi pi tie ung. Hmiezaa tluo a cuopa ca hmiezaa ungla, pa-uvsathyi tluo aa tlapa ca pa-uvsathyi tie ung.

⁸Pakha hne pakha a due riypa ri li pata ahung cunglie hmuo lyibuo hnyi kha ung; tahematapakieca cawsaa hrangpa a duepa ca phungbie a patling sa patana a cuo.

⁹“Nungvaathingsuena tue kha; lie va naw kha; va paruv kha; malie hmang kha hie va tlie kha; tapa nawbie hne nawbie hrangpa zaw bangkhuo ca, “Na ingpaa kha nama pangpa naa due pahaata va due,” tapa bie lie hingna amaa vya sawhmya diy.

¹⁰Duena ta ingpaa cunglie pha lina tue buo vyi; cacuonakawta duena ca phungbie tlingna tana a cuo.

¹¹Capa khutaa cata, khaapa cuota ma a cuo tapa hne ata cuo hing ca maa hmungna taata maa kya chana cuo tana a cuo tapa kha nama pachang. Tahematapakieca khuona ca zangtuv ma vya cuo baaning ning laa khata malie aa vya ngie vie mangtli.

¹²Zuo cuo ca khung tli te ningchung a vya ngie tli. Cacuonakawta zingna hmang tuena kha thuse ung sala khena cehre kha a la ungsiy.

¹³Ningchung a cuopa haata pa-uvsathyi tluo aa tla pata aw ung sala, paringpasu pata hne sahmyisahmaa pariy pata aw kha ungsiy, aparuvsuena tue kha ungsiy, mang a ngie li pata aw kha ungsiy, ahru-achie li pata hne i a hnyi li pata aw ungsiy.

¹⁴Abyipa Zingsuv Khrih kha a hryi hriy ungla, saapa khingna palung patluo riypa kha huv kha ungsiy.