Read Lautu Chin Rom 14 Bible Online

Rom 14 - Lautu Chin bible

Rom 14

¹Zangna luota a thaa a cawpa kha cuhluo tie ung, cuorasala ama khueruena kha nama i khing nakawta cuo kha se.

²Cawsaa chekha ta ning phangting kha ning riypatana a cuo tapata ama zang ning kha zangna luo a thaa a cawpa tie ta uohnaasiyhnaa dyi kha ama ning.

³A phangtling a ningpa tie ta a ning lipa tie kha ese kha yi se. A ning lipa tie zaw ta a ningpa tie kha syi ra kha yi se. Tahematapakieca Khazing ta iema kha a cuhluo ra yi.

⁴Malie changtaapa bie ripa riypata nama ca ahung tama na cuo? Iema sue a ngiethe ama cuo riypa hne sue duotepa ama cuo riypa ca ama byipaapa biechina cungliena a aw. Cakhutaa sue a ngiethepa zaw ama cuo aa, tahematapakieca Abyipa[15] ca sue a ngiethe khutuv tana a cuo.

⁵Cawsaa chekha ta ning ning kha kha ning hrangpa laata a pha vie tapata ama rue ning kha a hrangpa tie ta ning bangkhuo hing a lu pata ama rue. Ama bangkhuo ta ama palung lie'apa kha a siesa pata zang yi se.

⁶Ning ning kha kha a sungnaa vie ta a ruepa ca Abyipa pa-uvsathyina ta pasungpanaa se. A phangtling ta a ningpa tie kha Abyipa pa-uvsathyina ta ama ningpa tana a cuo, tahematapakieca Khazing khana alawna bie ama hluo. A ning lipa tie zaw Abyipa pa-uvsathyina ta ama ning lipa cuote, Khazing na alawna bie ama hluo ra.

⁷Ahunghmuo kiema cuo dyi ta hring va puv, ahunghmuo kiema cuo dyi ta thiy va puv.

⁸Ma hringpa ta a cuo kie Abyipa cuota hring pate, ma thiy kie Abyipa cuotana ma thiy. Cacuonakawta ma thiy a cuo zaw ma hring a cuo zaw Abyipa huopa tana ma cuo.

⁹Hingpa kawlie hing tana Khrih ca a thiypa hne a hringpa tie Abyi cuo riypata, thiy te a hring pakhaa napa ta a cuo.

¹⁰Cacuokie khaapanakawma nama uvnu hne nama sieta tie[16] ca nama syi pachaa? A cuo li kie, khaapanakawma nama uvnu hne nama sieta kha nama ese pachaa? Ma bangkhuo hingta Khazing[17] hmielie bie ripa riypata a daa riypatana ma cuo ung.

¹¹Caapathepa lieta, “Kama Abyipa i hring pahaata, cawsaa bangkhuo ta i hmielie kha ama pakhuv pane'a yite, palyi bangkhuo ta Khazing kha ama pathuo sa aa,” a ta.

¹²Cakhutaata, kiema bangkhuo ca Khazing hmielie ma kaw maa ri kaluo aa.

¹³Cacuonakawta pakha hne pakha kha a syi kha tli ungsiy, cuorasala na uvnu luopuv lieta a pakhuo riypa hne a pachiyna riypa kha chi li riypata bie a chi pacie tie.

¹⁴Abyipa Zingsuv chunglie ta ina pachang sapa ca, khaapa hmang hing hmuo ama ta tah a pathe lipa aw vyi tapa hingta a cuo, cuorasala pathe vyi tapata a ruepa cuota ca pathe vyi.

¹⁵Nama na ningpa nakawta na uvnu hne na sieta zaw ama palung a pasa kieca, nama ca duena chunglie a hringpa cuo vaciy. Na ningpa nakawta Khrih ta a thiykuopa pakha rana cuo kha se.

¹⁶Cacuonakawta nama ta a pha na tapa kha a chie pata ri riypata pacuo sa kha.

¹⁷Tahematapakieca Khazing pena ca ning hne dang ta cuo vyi. Cuorasala Thlaapa Pathe lieta a dangna, diena hne palungtluona tana a cuo.

¹⁸Cahaa cata Khrih re a hriepa ca Khazing hmielie cuhluo tluo aa tlapa hne cawsaa pathuosa pata a cuo.

¹⁹Cacuonakaw pakha hne pakha malie a sathaw riypa hne diena a chiykhyipa hmang kha hrie a zue ungsiy.

²⁰Ningbaa kawlieta Khazing re kha para kha ungsiy. Hmang bangkhuo hing hmisi ta kieca a pathe, cuorasala na ningpa nakawta cawsaa hrangpa kha amaa lie kieca hmangphapa cuo vyi.

²¹Na uvnu hne na sieta zaw a liena a cuo kieca saa ce a cuo zaw, mingsuv sahmaa dang a cuo zaw, hmang hrangpa a cuo zaw tue riypa cuo vyi.

²²Na zangna kha Khazing hmie lieta a cusa pata chi thluo tie. Iema ta a cuo hmisi ama tapa kawlieta iema hne iema sue a phaw lipa tie ca thluechiypa tana ama cuo.

²³Cuorasala palung luolue pata a awpa tie ca ama ning kieca sue phaw pata ama cuo aa, tahematapakieca zangna ta ama tue li nakawta a cuo. Zangna taata a vaw lipa hmang tuena bangkhuo ca suena tana a cuo.[18]