Read Lautu Chin Rom 15 Bible Online

Rom 15 - Lautu Chin bible

Rom 15

¹Zangna lie a cahrapa kiema ta zangna a cawpa tie thaazuo dyana kha ma dyichaw a hu. Kiema palungtluona kha ma huv riypa cuo vyi.

²Kiema pakha cyicuo hingta ma ingpaa tie amaa sathaw riypa hne ama phana cuota ama palung ma patluo riypa yita a cuo.

³Caapathepa lie, “Nama caa ripachiepa zaw bie pha lipa ca kama cungliena a tla,” tapata a cape pahaata,” Khrih ca ama palungtluona kha tue vyi.

⁴Tahematapakieca Caapathepa ta malie a pipa palung pasiyna hne palung cahrana thueta a nguopuona ma hnyi the riypata, hluo ningta ama za capepa bangkhuo ca kiema pacuvna riypatana a cuo.

⁵Niema ta palung a lusa pata ma Byipaapa Zingsuv Khrih a Paa hne Khazing kha nama pathuosa pakhaw the riypata, palung pasiyna hne palung cahrana Khazing ta Khrih Zingsuv kha a mangpuo pata pakha hne pakha palung a lusa pata nama aw the riypata caa bya thi yi se.

⁷Khrih ta aca cuhluo pahaayita, Khazing ta rungnaana a hmung riypata pakha hne pakha kha a cuhluo tie ung.

⁸Ica chang khingpa yi ca, Khrih ca Khazing biehmisipa cuo khata vangdaw tepa tie changtaapa ta a za cuo. Caca mingpa tie'a luo a za pipa yi biekuona pacu sa riypa hne

⁹Jentail ming ta Khazing kha cawsaa cunglie duena a hnyina kawta ama pathuosa na riypatana a cuo. Caapathepa ta, “Cacuonakaw, kama ta nama kha Jentail ming hrawlie caa law'a ang te, na ming kha hlaa ta ica pathuosa aa”;

¹⁰Cakhutaa ri pakhaa te, “Jentail ming zaw Khazing cawsaa zaw hne khata a law pakhaw tie ung”;

¹¹Cakhutaa, Niema Jentail ming bangkhuo, Khazing ca pathuosa tie ungla, Cawsaa bangkhuo ta ama ca pathuosa yi se”;

¹²Isaiah ta ripakhaa te, “Jesse ciypathla pakha a vaw'a te, Jentail ming uvtuv ta a cuo aa; Iema Jentail ming ta ama cunglie kha a ruechuona ama hnyi aa,” a ta.

¹³Thlaapa Pathe cahrana chunglie ta a ruechuona nama hnyi na riypata, anguopuona Khazing ta zangna chunglie palungtluona hne diena ta ca pabi yi se.

¹⁴Uvnu hne sieta zaw,[19] niema ca cawsaa phasapa cuo ung cate, pachangna hne nama bi thluo nakawta pakha hne pakha namaa cawpa thesa aa tapata kama hrahring ta ica zang yi.

¹⁵A cuo raalaa pata hing caa i vya capepa chekha lie hing niema pathyi sa pakhaa riypata riepha ciemuo pata i vya cape. Tahematapakieca Khazing ta ina pipa vihnyina thueta,

¹⁶Khazing thuophaabie hne aa patuv pata tluobyi rehriena lie kha Jentail ming'a luo Khrih Zingsuv rehrietuv i cuo riypatana a cuo. Caca, Jentail ming kha Khazing hmielie cuhluo aa tlapa hriykhungrina haata ama cuo riypa hne Thlaapa Pathe ta a pathe sapa ama cuona riy'a pata a cuo.

¹⁷Cakhutaata, Khrih Zingsuv hne maa patuvna thueta, Khazing re i hriepa kawlie hing a pale riypa i hnyi.

¹⁸Tahematapakieca, Jentail ming'a taata pa-uvsathyina hmung riypata Khrih ta kama na hmuo te a patlungpa re kaw hing ri li pata aw khu'a va ang. Hingpa a tuepa hing bie ta cuose, tuena ta cuose,

¹⁹pahmungsana hne kharuehaa hmang cahrana ta cuose, Khazing Thlaapa[20] cahrana ta cuose, a tuepa tana a cuo. Cacuonakawta Jerusalem taata patha pata Illyrikum te ta Khrih thuophaabie ca tluotlingsa pata i phu riypatana a cuo.

²⁰Cahaa cata i saduvthie ta a cuo paripa ca Khrih ama pachang buo lina lie thuophaabie phu kha a cuo, tahematapakieca malie ta a hruo ama pathu ciena lieta i sa chiy li riypa khata a cuo.

²¹Caapathepa ta, Ama kaw chang buo lipa tie khata hmung'a yite, ama kaw a thyi buo lipa tie ta ama pachang aa,” a ta.

²²Niema'a luo ica vya tlaw riypa yita yi hluvpuv naa pakhuopa ca ama hing tana a cuo.

²³Cuorasala, ata hing ca hingpa ruo lie hing kama cuota rehriena riypa hmang a aw li tli nakawta hne kung syipuv taakhata niema'a luo vya tlaw riypa kha i khingpa a cuo nakawta,

²⁴Spain luo i vya tlawpuo pata caa vya tawpaa yi ang sala, niema hne cuokha chung aa nuosa pata maa khe khutaa ungta, capa luo si riypa kha naa bya ungla tapa i khing.

²⁵Cadyiseca, ata hing ca Jerusalem lie mingpathepa tie cuota rehrie riypata i si.

²⁶Tahematapakieca Masidonia ruo hne Akhaia ruo lie a awpa tie ta Jerusalem lie a awpa mingpathepa tie hraw taata siypasa tie'a luo palung thusa pata ama pipa hmang na a aw.

²⁷Capa hmang ama tuepa ca ama palung aa tluokhyi sa, hmisi ta ripa kieca ama tue riypa hrahring ta a cuo; tahematapakieca, Jentail ming ta Judah ming thlaapa luo thluechiy kha amaa hraw kieca, Judah ming zaw ta chuelyi chechiy luo thluechiy kha Jentail ming'a taata amaa hraw ra riypata a cuo.

²⁸Cacuonakawta hingpa re hing patlung'a ang te, i ri khingpa ca, iema cuota ama khyipa tuokaa bangkhuo a tlingsa pata iema kuv cung luo i pi khu taayita, Spain luo i tlawpuo pata ica vya tlawpaale'a yi.

²⁹Ica vya tlaw tiy yi ta, Khrih thluechiy kha a tlingsa pata ica vya phya'a yi tapa kha i pachang.

³⁰Uvnu hne sieta zaw, Abyipa Zingsuv Khrih hne Thlaapa duena ta icaa nuepa yi ca, Kama cuo hingta Khazing'a luo kha thlaa na chuokhyi ung.

³¹Judea ruo lie a awpa zanglituv tie kuv taata hya i zang khuna riypa hne Jerusalem lie i rehrie riypa hing mingpathepa tie cuota cuhluo tluo a cuo riypata thlaa chuo tie ung.

³²Cahaa cata, Khazing khingna a cuo pata a cuo kieca palungtluona hne niema'a luo vya chiy pata niema hrawlie thaazuo thaapa i lana ta a cuo aa.

³³Diena Khazing ca niema bangkhuo'a lie aw mangsue. Amen.