Read Lautu Chin Rom 16 Bible Online

Rom 16 - Lautu Chin bible

Rom 16

¹Kenkhria khrihsaabuv lie khrihsaa uvthyi[21] a cuopa ma sietanung Fibi hing niema'a luo ica vya pachang sa yi.

²Mingpathepa tie hrawlie ta a cuo riypa hmang a cuopa haata, ama kha Abyipa ming ta cuhluo ungla, niema'a taata abyana a caa hiepa yi bangkhuo kha pi tie ung. Tahematapakieca ama ca cawsaa hluvpuv hne kama cuo hrahring ta byatuv pha tana a cuo.

³Khrih Zingsuv chunglie i re hrie hne a cuopa Prisilla hne Akuila kha nama kuv ica patuv yi.

⁴Iema ca kama hringna cuota ama luv a pi nguopa tana ama cuo. Iema'a lie i palung a tluopa dyi cuo vyi, Jentail khrihsaa bangkhuo zaw ama palung a tluo hringhruo.

⁵Ama ing lie a pungpa khrihsaa tie zaw nama kuv ica patuv yi. Asia ruo taata Khrih a zang taapa[22] ta a cuopa, i viesaa phapa Epenetas zaw na kuv ica patuv.

⁶Niema hrawlie rehrie te amaa hringhruopa Mary kha na kuv ica patuv.

⁷Andronikas hne Junias kha nama kuv ica patuv yi. Iema ca kama phangbuo, kama hne thaw a tla hnepa tana ama cuo. Iema ca lucuotuv tie ta ama za pachangsa pata cuo yite kama hluo ta Khrihsaa ama za cuo tli.

⁸Khrih chunglie i duepa Ampliatas kha na kuv ica patuv.

⁹I duepa Stakhis hne Khrih re i hrie hnepa Urbanas kha nama kuv ica patuv yi.

¹⁰Khrih zangna lie tlechuo aa chiysapa Apelles kha na kuv ica patuv. Aristobulus ingchungkhue tie kha nama kuv ica patuv yi.

¹¹I phangbuo a cuopa Herodion kha na kuv ica patuv. Narsissas chungkhue tie zaw kha Abyipa ming ta nama kuv ica patuv yi.

¹²Abyipa rehrietuv Trifana hne Trifosa kha nama kuv ica patuv yi. Abyipa re lie te a maasapa, i duepa Persis kha na kuv ica patuv.

¹³Abyipa ta aa tlawpa Rufas hne a nung, i nung ta a cuo rapa kha nama kuv ica patuv yi.

¹⁴Asinkhritas, Flegon, Hermes, Patrobas, Hermas hne uvnu hne sieta zaw iema hne a awpa tie bangkhuo kha nama kuv ica patuv yi.

¹⁵Filologas, Julia, Nereus hne a sietanung, Olimpas hne iema hneta a awpa tie bangkhuo nama kuv ica patuv yi.

¹⁶Pakha hne pakha kha a pathepa a pahnuona ta nama kuv a patuv ung. Khrih huo a cuopa khrihsaabuv na nama kuv caa patuv yi.

¹⁷Uv nu hne sieta zaw,[23] a chena hne a duna a chiykhyipa tie kha a raaring ungla, nama cuhluo ciepa pacuvna a du pata a rilepa tie kha cahriy tie ung.

¹⁸Tahematapakieca, cahaapa cawsaa zaw kha ca Abyipa Khrih rehrietuv cuo lipa yi ta iema riyvaw cuo dyi ta a hriepa tana ama cuo. Ama bie pahniepa hne malie ama pata thenapa khata cawsaa zaaruo tie kha ama dung.

¹⁹Thuophaabie hne aa patuv pata zangtluo namaa tlana kha cawsaa bangkhuo ta ama pachang nakawta hingpa kawlie hingta i palung aca tluokhyi hringhruo yi. Hmangphapa kawlie kha singvaa ungla, hmangpha lipa suena ta acaa kaa li riypa yi ta icaa khingkhyi yi.

²⁰Diena Khazing ta Setaa kha nama phyipazaa rawlie chi'a te a carie patang aa. Abyipa Zingsuv Khrih vihnyina ca niema'a lie aw mangsue.

²¹I rehriehne Timote ta nama kuv aca patuv yi. Cahaa cata, i phangbuo a cuopa Lusias, Jason hne Sosipater zaw ta nama kuv aca patuv yi.

²²Kama Tertias, hingpa caapaphya a capetuvpa zaw hingta Abyipa ming ta nama kuv ica patuv yi.

²³I ingtlungpa hne khrihsaabuv a pungna ing hnyituv, Gaius zaw ta nama kuv aca patuv yi. Khypuv suekingtuv Erastas hne ma uvnupa Kuartas zaw ta nama kuv aca patuv yi.

²⁴(Ima Byipaapa Zingsuv Khrih vihnyina ca niema bangkhuo'a lie aw mangsue. Amen.)[24]

²⁵Kama i ripa hne i phupa Zingsuv Khrih thuophaabie hne cuo syipuv chung za nupa, cuorasala ata hing phu pata a cuopa bieparuv haakhata niema thaazuo caa pi khupa ca Khazing tana a cuo.

²⁶Cakhutaata chuozaa a hringpa Khazing bie pina haata, zang yite a bie ama ziy the riypata, profet tie capepa caa thueta, ama ca Jentail ming bangkhuo kha pachang sa pata a cuo tli.

²⁷Pakha dyipa, a singpa Khazing ca Zingsuv Khrih thueta chuozaa ta a ming rungnaa pata aw mangsue! Amen.[25]