Read Lautu Chin Rom 2 Bible Online

Rom 2 - Lautu Chin bible

Rom 2

¹Cacuonakawta ahung nama cuo zaw ta a sie khu'a va ungciy; tahema tapa kieca malie kha bie nama ripa tiyta, ama tuepa kha nama tue ra thluo nakawta niema mamaapa khana sue namaa phaw pata a cuo.

²Niema ta, hinghaapa hmang a tuepa tie cunglie ta Khazing biechina hing aa hmuopa tana a cuo,” nama ta.

³Ahung tama i cuo tapa kha namaa rue buo ma? Malie kha bie nama ripa tiyta iema tuepa kha nama tue ra thluo nakawta Khazing bieripana taata ima law thlu aa tapata namaa rue ma?

⁴A cuo li kie a lepa a duena hne a palung pasiyna hne a ngiechina hing siysaa ri li pata aw kanaa ungciy? Khazing duena ca sue a ngiepachiyna luo caa chiytuv na a cuo tapa kha pachang va ung cama?

⁵Cuorasala nama palung a le tuv nakawta Khazing ta adangna hne bie a chi ning, Khazing hihaana ning thueta nama cunglie a tlung riypa khana namaa pacung chiy tyly pata a cuo.

⁶Pakha cyicuo kha ama tuena haata a thung'a yi.

⁷Hmangphapa kha palung pasiysa pata tue yite rungnaana, pa-uvsathyina hne a ra khu lipa chuozaa hringna a huvpa tie ca Khazing ta chuozaa hringna kha a pi'a yi.

⁸Ama kaw dyi a pacuo te biehmisipa kha thuse pata phalina a tuepa tie cunglie ca Khazing hihaana hne pathiy lingna kha a tlung aa.

⁹Pha lina a tuepa bangkhuo ca ruvnaana hne te-angna ama hmung aa; Judah ming hmung taa yite Jentail ming ta ama paziy aa.

¹⁰Cuorasala phana a tuepa bangkhuo ca rungnaana hne pa-uvsathyina hne diena kha ama hmung aa. Judah ming hmung taa'a yite Jentail ming ta ama paziy aa.

¹¹Khazing ca ahung hmie hmuo mang vyi.

¹²Phungbie li pata suena a tuepa tie ca phungbie li pata ra'a yite, phungbie raw lieta a suepa tie ta phungbie ta bie ripa pata ama cuo aa.

¹³Tahematapakieca Khazing hmiekunglie aa dangpa hne Khazing hne a rena a hmungpa tie ca phungbie a thyipa tie khata cuo vayi, phungbie a ziypa tie khatana ama cuo.

¹⁴Phungbie a hnyi lipa Jentail ming ta, phungbie hmuo hnyi li pata aw raalaa yi sala, phungbie ta tue ungla a tapa kha palung thusa pata ama tuepa ca iema cuota phungbie na a cuo thluo.

¹⁵Phungbie ta tue ungla a tapa kha ama palung chunglie na aa cape tapa kha iema ta ama paluo sa. Ama chiephathleduona khata ama tuepa hing aa hmuo tapata aa daakhyi ning yi aw te, ama ruenapa khata sue a phaw ning yi hne a paduo ning yi a aw.

¹⁶Kama i phupa thuophaabie haahingta, Khazing ta Zingsuv thueta cawsaa palungruv ruena kha bie a ripa ning thue ca cahaacatana a cuo aa.

¹⁷Cacuonakawta niema hne niema kha Judah ming aa ta ung cate, phungbie lie kha a daa ung cate, Khazing hne namaa pazuena kawlie kha namaa pale.

¹⁸Cakhutaata a khingna kha pachang ung cate phungbie ta pacuvpa nama cuo nakawta khaama a phace tapa kha namaa tlaw the.

¹⁹Niema hne niema kha mingcue tie luochiytuv, a zingna lie a awpa tie cuota khena,

²⁰a ngaapa tie cawpatuv hne haatiy tie pacuvtuv tana ma cuo tapa kha na maa pachang, tahematapakieca phungbie chunglie hing pachangna hne biehmisipa a tling pata ma hnyi nama ta.

²¹Cacuokie niema malie a pacuvtuv saya zaw, niema'a na niema cahaw a pacuv'a nang va ung cama? Paruv kha ungla tapata ri ung cate ma niema ta nama paruv?

²²Nungvaathingsuena tue kha ungla ta ung cate ma niema ta nungvaathingsuena nama tue? Kuvtuezuv ca duvsa ung cate ma biena-ing chechiy ca nama paruv?

²³Phungbie lie a palepa tie, phungbie para ung cate ma Khazing ming nama pachie?

²⁴Caapathepa lieta, “Niema Judah ming kawlie hingtana Jentail ming hrawlie Khazing thuo a chi,” a ta.

²⁵Phungbie nama ziy kie muo nama vangdaw a tena ca muo a hnyi'a ta; phungbie nama para kie vangdaw a te lipa hne tana namaa lu aa.

²⁶Cacuonakawta, vangdaw a te lipapaa ta phungbie kha a ziy kieca vangdaw a tepapaa haata rue pata cuo'a vama?

²⁷Saapa lie vangdaw aa te li thluo pata phungbie a ziypapaa ta phungbie caa-uv hnyi te vangdaw aa te raalaa pata phungbie a parapapaa kha sue aca phaw aa.

²⁸Cacuonakawta le luo cuonapa taa dyi ta Judah ming a cuopa ca Judah ming hmisipa ta cuo li pata le luo saapa ta vangdaw a tena ca vangdaw a tena hmisi ta cuo vyi.

²⁹A chung luo taata Judah ming a cuopa kha Judah ming hmisi pata cuote, vangdaw a tena hmisipa ca pathiypalung hne aa sepa hmang tana a cuo, thlaapa hmang ta cuote caabie ta cuo vyi. Cahaapa cawsaa ca a hrang taata cuo li pata Khazing'a taata pathuosana na a hmung aa.