Read Lautu Chin Rom 4 Bible Online

Rom 4 - Lautu Chin bible

Rom 4

¹Cacuokieca thiysaa luo hne a patuv pata malie a pathlatuv Abraham hing thiysaa luo hne aa patuv pata khaapa thlahnena ma a hmung?

²Tahematapakieca, Abraham hing hriena thue tana duopacupa a cuo tapata a cuo kieca, hruotle khyi riypa chekha a hnyi aa. Cuorasala Khazing hmiekunglieca hruotle khyi riypa hnyi vyi.

³Caapathepa ta khaapa a ta ma? “Abraham ta Khazing kha zang te, capa a zangna thue cata Khazing ta ama kha aa dangpa ta a cuhluo,” a ta.

⁴Re a hriepa pakha ca a ninghlue kha lawmuo tapa pata cuo vyi. A hrie muo tana a cuo.

⁵Cuorasala tuena ta cuo li pata cawsaa pha lipa tie zaw amaa dang a tatuv Khazing a zangpa ca, a zangna kha adangna ta a cuhluopa.

⁶Cacuonakawta tuena a te li pata Khazing ta aa dangpa ta a cuhluopapaa thluechiypa a cuona zya David ta a ripa ca:

⁷Khazing ta a pha lina a ngiethe te, a suena a buvkhungpapaa ca thluechiypa tana a cuo.

⁸Khazing ta a suenapa sue ta a ripa lipapaa ca thluechiypa tana a cuo,” a ta.

⁹David ta a ripa thluechiy ca vangdaw tepa tie cuo dyi tama a cuo, vangdaw te lipa tie cuo zaw ta a cuo ra ma? Ma ripa ca, “Abraham zangna ca Khazing ta adangna ta a cuhluopa,” tapata a cuo.

¹⁰Tuokhaatama cuhluopa pata a cuo? Vangdaw aa te hluo tama aa te khu taata? Vangdaw aa te khutaa cuo vyi, aa te hluo tana a cuo.

¹¹Abraham ta vangdaw tepa cuona paluosanapa, a dangpa cuona ca vangdaw aa te hluo baataa khata zangna ta a cuhluo mangtli. Caca ama kha vangdaw a te li pata a zangpa tie paa ta pacuo sa riypa hne iema zaw bangkhuo kha a dangna pi riypata a cuo.

¹²Cahaa cata ama ca vangdaw a tepa tie paa ta zaw a cuo ngiethie, iema ca vangdaw amaa tepa dyi cuo li pata mingpa Abraham vangdaw aa te hluo ta a zangna hringzya haakhata ama hring ra nakawta a cuo.

¹³Tahematapakieca chuelyi na na cu aa tapa biekuo ca Abraham hne a samingsahlaa tie ta phungbie ziyna taata ama hmungpa cuo vyi, cuorasala zangna ta hmungpa a dangna thue tana a cuo.

¹⁴Phungbie a ziypa tie na rucutuv a cuo'a yi tapa a cuo kieca zangna ca khaapahmuo ta cuo li'a pata biekuona zaw a hrihripa tana a cuo aa.

¹⁵Tahematapakieca phungbie ta ca Khazing hihaana kha chiykhyi te, cuorasala phungbie aw lina lieca phungbie na ama para tapa zaw aw vyi.

¹⁶Cacuonakawta biekuona ca zangna lieta hruo a bangpa cuote, a vihnyina thueta Abraham samingsahlaa tie'a lieta biekuopa tana a cuo. Phungbie a ziypa tie'a lie dyi cuo li pata Abraham zangna haata a zangpa tie cuo zaw ta a cuo.

¹⁷Tahematapakieca Caapathepa ta, “Kama na nama ca mingphang hluvpuv paa ta caa tue ang,” a tapa haata, ama ca kiema bangkhuo paa tana a cuo. Ama ca a thiypa tie kha hringna pi yite a aw lipa zaw a pa-aw satuv, ama hrahring ta a zangpa Khazing hmie lieta ma paa tana a cuo.

¹⁸“Na samingsahlaa ca ama hluv hringhruo aa,” tapata ri ciepa haata a ruechuona khaahmuo a aw lipa chung taa khata, “mingphang hluvpuv paa tana i cuo aa,” tapa kha a zang.

¹⁹Ama ca kung zakha a ta tli. Cuorasala a thiy ciepa haata a ta tlipa a pangpa kha a rue tiyta cuose, Sarah a cingna kaw kha a rue tiyta cuose, a zangna cung vie vyi.

²⁰Khazing biekuona kawlie kha zang lina ta ama kha cahang khu vyi. Cuorasala Khazing kha pathuosa te zangna lie kha lethaw te a cahra.

²¹Khazing ta biekuo a pi ciepa ca a patlung hrahring aa tapa kha a zang karuv.

²²Cacuonakawta a zangna kha adangna ta a cuhluopa.

²³“Aa dangpa tana a cuhluo,” tapa hingpa bie hing ama huo selaw ta capepa cuo vyi,

²⁴kiema zaw bangkhuo cuota capepa a cuo ra. Ma byipaapa Zingsuv thiyna taata a pathu tuvpa a zangpa kiema zaw cuota a cuo ra aa.

²⁵Ama ca ma sue nakawta thiyna luo pachiy sapa cuote Khazing hne maa rena riypata pathu pakhaapa a cuo.