Read Lautu Chin Rom 6 Bible Online

Rom 6 - Lautu Chin bible

Rom 6

¹A cuo kie tuokhaatama ma ta aa? Khazing vi ca a cha hryly se tapata suena ca ma tue hryly'a maw?

²Tue changchiy'a va puv. Suena lie ma thiy tli pata tuokhaatama a chunglie ca ma aw pari the aa?

³Khrih Zingsuv chunglie tiy a nawpa kiema bangkhuo ca a thiyna chunglie zaw tiy maa naw tapa kha pachang va ung ca maw?

⁴Cacuonakawta tiy maa naw ning khata ama hne paby pakhawpa cuo pate a thiyna lieta ma thiy ra tli; cahaa cata Khrih ca Paa rungnaana ta a pathu pakhaa pahaata kiema zaw hringna thaapa ta ma hring ra aa.

⁵A thiyna lie ama hne ma thiypakhaw kieca hringna luo pathu pakhaa a cuona lie kha kiema zaw pathu pakhaa pakhawpa ma cuo ra aa.

⁶Ma pangpa suena kha para riypata ma cawsaa hlungpa kha ama hneta vieluo lie khepuo pata a cuo tli tapa kha ma pachang. Caca suena sii ta ma cuo li tlina riypatana a cuo.

⁷Tahematapakieca a thiypa ca suena taata hya a zangpa tana a cuo.

⁸Cuorasala Khrih hneta ma thiyhne kieca ama hneta ma hring hne aa tapa kha ma zang.

⁹Thiyna taata pathu pakhaa pata a cuopa Khrih ca thiypakhaa li tli pata thiyna ta uv'a va tli tapa kha ma pachang.

¹⁰Suena lieca yikha ta ade pata thiy te, a ta a hringna hing ca Khazing chunglie tana a hring.

¹¹Cacuonakawta niema zaw ta, suena lieca thiy pate Khazing chunglie ca Khrih Zingsuv thueta ma hring tapata na maa rue riypatana a cuo.

¹²Cacuonakawta saapa khingna kha nama ziy li riypata a thiy thepa nama pangpa ca suena ta uv kha tie se.

¹³Nama pangpa a khaapa khahmuo a pha lipa suena tuena riypata pi kha ung. Cuorasala thiyna taata hringna luo pathu pakhaapa haata nama pangpa a khaapa kha hmuo Khazing'a luo kha aa dangpa hmang tuena riypata pi tie ung.

¹⁴Tahematapakieca niema ca suena rawlie hring li pata vihnyina rawlie nama hring nakawta suena ta ca uv kha yi se.

¹⁵Cacuokie tuokhaata? Suena rawlie aw li pata vihnyina lie ma aw nakawta suena ca ma tue'a ma? Tue changchiy'a va puv!

¹⁶Niema ca pakhakha'a luo kha ri a ngiepa sii haata namaa pi kieca, suena ta a chiykhyipa thiyna lie a cuo zaw, ri-angiena ta a chiykhyipa adangna lie a cuo zaw namaa pipapaa sii cata nama cuopa kha pachang va ung cama?

¹⁷Cuorasala Khazing ca a law pata cuo mangsue. Tahematapakieca niema ca suena sii nama za cuo raalaa pata ata hing ca pacuvna nama hmungpa chung taata biehmisipa kha pathiypalung hmisi ta nama ziy mangtli.

¹⁸Suena taata hya pazangpa cuo ung cate, adangna sii ta nama cuo tli.

¹⁹Nama thyi khu the li nakawta chuelyi bie ri ta i ri pata a cuo. Ahluo taca nama pangpa kha a pathe lipa hmang tuena luo hne a le vie hrylypa zyachiena luo namaa zaa pi. Cuorasala ata hing ca nama pangpa kha pathena luo caa chiykhyi riypa yi aa dangpa hmang tuena ta a pi tie ung.

²⁰Suena sii ta nama cuo ning kha adangna hne a patuv pata hya a zangpa nama cuo.

²¹Cacuokie atalie nama nang a zaakhyipa hing ta li pata khaapa thlahnena ma nama hmung? Capa hmang zaw a chuona ca thiyna tana a cuo.

²²Cuorasala ata hing suena taata hya pazangpa cuo ung cate Khazing sii ta nama cuo mangtli. Thlahnena nama hmungpa ca pathesana cuote a chuona ca chuozaa hringna ta a cuo.

²³Tahematapakieca suena muo ca thiyna cuote, cuorasala Khazing lasaw ca ma Byipaapa Khrih Zingsuv chunglie chuozaa hringna tana a cuo.