Read Lautu Chin Rom 8 Bible Online

Rom 8 - Lautu Chin bible

Rom 8

¹Cacuonakawta Khrih Zingsuv chunglie a hringpa tie cuota ca suephawna aw va tli.

²Tahematapakieca Khrih Zingsuv chunglie ta a awpa Thlaapa hringna phungbie ta suena hne thiyna phungbie chung taata hya aca pazang yi.

³Saapa thaa a ne nakawta phungbie ta a tue khu lipa kha Khazing ta a tue: ama saacapaa kha a suepa cawsaa thiysaa cuona haata suena te riypata za pathlie te suena kha saapa cuonapa lieta sue a phaw.

⁴Caca saapa khingna haata cuo li pata Thlaapa khingna haata a ziypa tie hringna lieta aa dangpa tue riypa tapa phungbie a tling thena riypatana a cuo.

⁵Tahematapakieca saapa khingna haata a awpa tie ca ama pathiypalung kha saapa hmang lie chi yite, cuorasala Thlaapa khingna haata a hringpa tie ca ama pathiypalung kha Thlaapa hmang lie ama chi.

⁶Saapa khingna chunglie pathiypalung chipa ca thiyna cuote, cuorasala Thlaapa khingna chunglie pathiypalung chipa ca hringna hne diena tana a cuo.

⁷Canakaw cata saapa khingna lie sangpa pathiypalung ca Khazing hne a carie te; Khazing phungbie kha ziy vyi _ a ziy heta ziy khu vyi.

⁸Saapa khingna chunglie a awpa ta ca Khazing palung kha patluo khu vyi.

⁹Cuorasala niema ca saapa khingna lie aw va ungciy; Khazing Thlaapa kha nama chunglie khy a sa nakawta Thlaapa khingna chunglie na nama aw. Khrih Thlaapa a hnyi lipa ahunghmuo ama huopa ta cuo vayi.

¹⁰Cuorasala Khrih kha niema chunglie a aw kieca, nama pangpa ca suena nakawta thiy ra sala Thlaapa ca a dangna thueta a hring aa.

¹¹Zingsuv thiyna taata a pathu pakhaapa, ama Thlaapa kha niema'a lie khy a sa kieca, thiyna taata Zingsuv a pathu pakhaapapaa khata a thiy thepa nama pangpa kha niema'a lie khy a sapa Thlaapa thueta hringna aca pi'a yi.

¹²Cacuonakawta, uvnu hne sieta zaw, kiema ca saapa khingna haata hring riypata, saapa lieta lyibuo a hnyipa cuo va puv.

¹³Tahematapakieca, thiysaa khingna haata nama aw pata a cuo kieca nama thiy aa; cuorasala pangpa ta a tuepa suena kha Thlaapa ta nama thie kieca nama hring aa.

¹⁴Tahematapakieca Thlaapa ta aa chiypa bangkhuo ca Khazing saata ta ama cuo.

¹⁵Niema ca ciyna luo caa pathla pakhaapa yi, sii cuona thlaapa kha a tingpa ta cuo va ungciy, cuorasala saata ta caa pacuo sapa yi, thlaapa khana nama ting. “Abba![4] I Paa! nama tapa hing

¹⁶Khazing saata ta ma cuonapa kha na capa Thlaapa ca hne kiema thlaapa ta tehte ama khuo pata a cuo.

¹⁷A saata ta ma cuo kieca, rucutuv zaw ma cuo, Khazing rucutuv cuo pate Khrih hneta ru a cu hnepa ta ma cuo. Cata a cuo kieca ama hne rungnaana a hrawpa ma cuo riypata ama hneta ruvnaana a angpa ma cuo riypatana a cuo.

¹⁸Ata cuo lieta ma angpa ruvnaana hing ca hmie luo ma cuota phupa ta a cuo riypa rungnaana hneta ca pakhingpuo tluo aa tlapa cuo vyi.

¹⁹Khazing saata zaw paluopa ama cuona cuo kha sapa hmang ta a ngietie hringhruo vayi.

²⁰Tahematapakieca sapa hmang bangkhuo hing iema khingna ta cuo li pata Khazing ta cuose a tapa haata vievuv diy riypata khuekhuo ciepa ta a cuo.

²¹A ruechuona a awpa ca sapa hmang bangkhuo hing thuvna siicuona taata palaw sa pata cuo'a te Khazing saata zaw rungnaana kha ama hmung ra aa.

²²Ata cuo te hingta ca sapa hmang bangkhuo hing nupazi pasapa haata amaa hrung amaa ie nguoluo tapa kha ma pa chang.

²³Sapa hmang zawdyi cuo li pata Thlaapa thyipaa taapa ta a cuopa kiema zaw hrahring hmuo ma pangpa malie a khuo riypa hne saata ta malie a tue riypa ma huopuo nguoluo pata maa hrung maa ie ra.

²⁴Tahematapakieca a ruechuona thueta khuopa tana ma cuo. Ma hmungpuopa a nguopuona ca a nguopuona cuo vyi. Hmung thluopa ca ahungma a nguopuo aa?

²⁵Cuorasala ma hmung lipa kha maa nguopuo kieca, palung pasiyna hneta capaca ma huo pata a cuo.

²⁶Cahaa cata Thlaapa ta ma thaadyana lie kha malie aa bya. Tuokhaatama thlaa ma chuo riypata a cuo tapa hmuo ma pachang li ning kha capa Thlaapa cata ahrungna hne pakaa ta ri khu lipa bie ta paa malie a kiepa.[5]

²⁷Cawsaa pathiypalung a mangpasiepa Khazing ca Thlaapa palungphya kha a pachang; tahematapakieca Thlaapa ta Khazing khingna haakhata mingpathepa tie cuota paa a kiepa nakaw yi tana a cuo.

²⁸Khazing a duepa tie hne Khazing ta a tingna haata a kupa tie cuota ca hmangting zawdya hingta a phana luota a tuepale yi tapa kha ma pachang.

²⁹Khazing ta a pachanglupa tie ca a Saacapaa hminghmie lu riypata aa tlaw pathlyi yi, capa a Saacapaa ca uvnu a hluvpuv hrawlie a uvthyice cuo riypata a cuo.

³⁰A tlaw pathlyipa tie kha ama ta a ku yi, a kupa tie kha duo pacu sa yite, duo a pacu sapa tie kha rungnaana a pi yi.

³¹Cakhutaata capa zaw kaw lieca tuokhaama ma ta aa? Khazing kha kiema'a luo malie aa cuo kieca ahungma malie a du khu aa?

³²A Saacapaa hmuo a khe li pata ma bangkhuo cuota malie a pi pakieca a Saacapaa hne cata a hrangpa hmang bangkhuo kha malie pi li pata a aw'a ma?

³³Khazing ta a tlawpa kha ahungma sue a phaw khu aa? Duo a pacutuvpa ca Khazing tana a cuo.

³⁴Ahungma sue a phaw aa? Khrih Zingsuv, thiy te a thupakhaapa, Khazing cacuo luo kuo ta a tupa na kiema cuota paa malie a kiepa pata a cuo.

³⁵Ahungma Khrih duena taata malie a pache khu aa? Ruvnaana ma, ngiechina ma, a cuo li kie hrisaathieruena ma, a cuo li kie cakuona ma, abuv-ase riy hnyi li pata awna ma, a cuo li kie ciy aa chiypa hmang ma, a cuo li kie zueziy ma tapa tie hingta malie a che khu'a ma?

³⁶Caapathepa lie a capepa ca, Nama kawlieta ningaw ta thiepa ta ma cuo; Thie riypata chipa tuv haatana ma cuo, tapata a cuo.

³⁷Malie che khu'a vyi, hing hmang bangkhuo lieta kiema ca malie a duetuv ama thueta tetuv tie laata tetuv vie tana ma cuo.

³⁸Tahematapakieca thiyna cuose, hringna cuose, avuoming cuose, luochiytuv tie ta cuo yi se, atalie a cuopa hmang ta cuose, a vya chiy riypa hmang ta cuose, cahrana cuose,

³⁹aa suopa ta cuose, aa thuvpa ta cuose, sapa hmang suokhakha ta cuose, ma Byipaapa Khrih Zingsuv chunglie Khazing duena taata malie che khu'a vyi tapa kha i pachang.