Read Lautu Chin Rom 9 Bible Online

Rom 9 - Lautu Chin bible

Rom 9

¹Zingsuv ming ta a hmisipa na i ri. Hang va ang tapa ca i chiephathleduona ta Thlaapa Pathe thueta a pacu sa.

²I pathiypalung chunglie ngiechina lepuv hne pasana i hnyi.

³Tahematapakieca i cawsaa,[6] saapa lieta i phangkha ta a cuopa tie cuota a cuo kieca, kama hing chiesa pata Khrih'a taata chepa cuo riypa kha hmuota i khing.

⁴Iema ca Israel ming ta cuo yite, saata ta pacuosapa, rungnaana a pipa, biekuona a pipa, phungbie a pipa, biena a pahnyi sapa, hne biekuona a hmungpa tie ta ama cuo.

⁵Hluoning mingpa tie'a taata pathlapa cuo yite, iema'a taacata Messiah[7] ca thiy hne saa ta pathlapa a cuo. Ama ca Khazing cuote, hmangting bangkhuo cunglie a awpa a cuo nakawta chuozaa pathuo sa pata cuo mangsue. Amen.

⁶Cata a cuo tiyta Khazing bie kha tling vyi tanata cuo vyi. Tahematapakieca Israel ming bangkhuo kha Israel ta cuo hmisi lipa yi ta,

⁷Abraham saata zaw bangkhuo kha ama bangkhuo ta Abraham ciypathla ta cuo diy vayi. Cuorasala, “Isak chung taata a puvpa tie hingna na samingsahlaa ta ripa a cuo'a yi,” a ta.

⁸A ri khingpa ca, cawsaa thiysaa cakhawpa ta sapa ca Khazing saata ta cuo vayi, cuorasala biekuona ta a puvpa saata zaw khana ciy hne hruo ta ripa a cuo yi.

⁹Tahematapakieca biekuona ta hinghaahingta a ri, “Capa cuo ning ca Kama kha za kaa'a ang te Sarah ta saacapaa kha a hnyi aa,” a ta.

¹⁰Cadyi ca cuo vyi; Rebekka ta a navaapa pakha dyipa ma mingpa Isak taata nu a phya ning yi kha capa hne cata aa lusapa hmang a cunglie a tlung.

¹¹Ama za puv hluo, a chie a pha khaahmuo ama tue the hluo baataa khata, Khazing ta a tingpa atlawna ca

¹²tuehriena thueta cuo li pata kupa cuona thueta aa pazue na riypata, Rebekka kha, “A uvthyipa hing a syipa rehrietuv tana a cuo aa,” tapata changpa a cuo.

¹³Caapathepa lie aa capepa ca, “Jakob kha due ang te, Esau ca i hue,” a ta.

¹⁴Cacuokie tuokhaama ma ta aa? Khazing ca a dang vyi ma ta'a ma? Ta khu changchiy'a va puv.

¹⁵Tahematapakieca, Moses kyihuo khata, “Nang i due khingpa tie kha nangdue'a yi ang te, Kaw i pacuo khingpa tie kha kaw i pacuo'a yi,” a ta.

¹⁶Cacuonakawta hmangting bang-khuo hing cawsaa khingna hne temaana taata cuo li pata nang malie a duetuv Khazing thue tana a cuo.

¹⁷Tahematapakieca Caapathepa ta Faro kha, “I ming kha chuelyi bangkhuo ta u khyipa a cuo riypata i cahrana kha na cunglie paluo riypa atingna hneta icaa tlawpa tana a cuo,” a ta.

¹⁸Cacuonakawta nang a due khingpa tie kha nang due yite, ama palung a cahra sa khingpa tie kha ama palung a cahra sa yi.

¹⁹Cakhutaa, niema ta, “Cacuokie, khaapanakawma Khazing ta sue malie a phaw the? A khingna ca ahungma a du khu?” nama ta aa.

²⁰Cuorasala nama Khazing bie a i tuv cawsaapa hing ahung tama na cuo? Sapa hne vypa a cuopa ta satuv hne vytuv kha, “Khaapanakawma hinghaahingta ina tue ciy? a ta the'a ma?

²¹Bi vytuv ca acyi kha a khingta tue khuna naw hnyi vama? Acyi hlungkha chung taata bi suokha kha a sungnaa vie ta hmuo riypa hne a hrangpa bi suokha kha hmuo cakhaw riypata sana naw a hnyi cuo vama?

²²A hihaana kha paluo khing te a cahrana a paluo sa khingpa Khazing ta para riypata sapa hne hihaana a ang riypa tie kha palung pasiysa pata a ang law kie yi ca,

²³a nangduena a hmung riypa tie, Judah ming dyi cuo li pata Jentail ming kiema zaw yalya chung taata a rungnaana cuota tingpaciena hne a kupa tie ta a hnyirungna hne a rungnaana ama pachang riypata ca ang hryly li pata a aw'a ma?

²⁵Hosea chunglie ta a za ri sasawpa ca, “I cawsaa ta a cuo lipa tie kha ‘I cawsaa,’ ta'a yi ang te, I due li nung kha ‘I duesa nung,’ i ta aa,” a ta.

²⁶“‘I cawsaa ta cuo va ungciy,’ i ta napa hmang lie caci kha, A hringpa Khazing saata tapata kupa ama cuo aa,” a ta.

²⁷Israel ming kaw hne a patuv pata Isaiah ta, “Israel ca mingluv ta riyliy viehnang zaa ta hluv ra mang yi sala, a cawta dyina khuo pata a cuo'a yi.

²⁸Tahematapakieca Abyipa ta chuelyi lie a biechina kha a catlisa pata hne a siesa pata a patling sa aa.

²⁹Isaiah ta a za ri paciepa ca, “Alesyipa Abyipa ta kiema kha malie nguo buo li pata aw sala, Sodom haahingta cuo'a tli pate, Gomorrah haa hing tana tuepa ma cuo aa,” a ta.

³⁰Cacuokie, tuokhaatama ma ta aa? Jentail ming adangna a huv lipa tie khata adangna hmung yite, caca zangna thueta ama hmungpa a dangna tana a cuo.

³¹Cuorasala, Israel ming, phungbie kha a patuv pata adangna a huvpa tie ta ca phungbie kha patling khu vayi.

³²Khaapanakawma ama patling khu va? Tahematapakieca zangna ta huv lipa yi ta tuehriena ta ama huv nakawtana a cuo. A pachiyna alung lie kha a pachiy yite amaa lie.

³³Caapathepa ta, Mang tie ung, Cawsaa zaw a pachiy pata a liena riypa alung kha, amaa liena riypata Kama ta Zion lie i chi, A zangpa bangkhuo ca nangzaana a taw'a vayi,” a ta.