Read Lautu Chin 1 Korin 1 Bible Online

1 Korin 1 - Lautu Chin bible

1 Korin 1

¹Khazing khingna thueta Khrih Zingsuv lucuotuv cuo riypata kupa kama Paul hne ma uvnupa Sosthenes ta,

²Khazing mingpathepa cuo riypata kupa hne Khrih Zingsuv chunglie ta pathesapa Korin khy lie a awpa Khazing Khrihsaabuv tie hne, iema hne kiema Byipaapa[1] ta a cuopa Abyipa Zingsuv Khrih a zangpa, hmangting lieta a awpa tie'a luo kha caa maca paphya yi.

³Ma Paa Khazing hne ima Byipaapa Zingsuv Khrih'a taata vihnyina hne diena ca nama cunglie aw mangsue.

⁴Khrih Zingsuv thueta aca pipa yi vihnyina kawlie kha Khazing i pathuosa pari.

⁵Tahematapakieca niema ca ama thueta hmangting bangkhuo kha pipa cuo ung cate, bierina hne pachangna phangting zaw kha pipa nama cuo nakawta,

⁶Khrih kaw[2] tehte ma khuopa kha niema hrawlie a cusa pata a aw tli tana ta a cuo.

⁷Cacuonakawta, ma Byipaapa Zingsuv Khrih aa luona riypa nama huona lie hing nama hmung lipa thlaapa luo lasaw suokha hmuo aw vyi.

⁸Ma Byipaapa Zingsuv Khrih ning thueta suephawpa nama cuo li riypata ama ta ningchuona ning te ta thaazuo aca pi'a yi.

⁹Khazing ca zangtluo aa tla; ama thueta niema ca a saacapaapa, ma Byipaapa Zingsuv Khrih hne a viesaana hnyi riypata kupa nama cuo.

¹⁰Uvnu hne sieta zaw,[3] niema bangkhuo palung a lusa sala, nama hrawlie a chena aw li pata, palung lungkha phya ungla aa lupa atingna hnyi pata nama aw riypata Zingsuv Khrih ming ta paa ica kie yi.

¹¹Uvnu hne sieta zaw, Khalawi chungkhue ta niema hrawlie ahru-a-ina a awpa kha ina chang yi.

¹²I ri khingpa ca niema cyicuo ta, “Kama ca Paul phuv tana i cuo,” “Kama ca Apollos phuv tana i cuo,” Kama ca Piter phuv tana i cuo,” Kama ca Khrih a ziytuv tana i cuo,” nama ta.

¹³Khrih hing chetuv a cuo ma? Paul hingma nama cuota vieluo lie khepuopa a cuo? A cuo li kie Paul ming tama tiy namaa naw?

¹⁴Krispas hne Gaius ri li pata pakha hmuo tiy ica naw li nakaw yi ta Khazing i law.

¹⁵Tahematapakieca ahungtahmuo i ming tana tiy maa naw a ta riypa aw va ungciy.

¹⁶(Stefanas hne a ingchungkhue zaw kha tiy i za naw ra yi; cakhutaata tiy i nawpa ama aw kalie ma tapa pachang va ang.)

¹⁷Tahematapakieca Khrih ta tiynaw riypata na pathlie vyi. Thuophaabie phu riypata pathliepa cuo ang te, caca cawsaa bie rithena ta cuo'a vyi, tahematapakieca Khrih vieluo hing cahrana hnyi li pata a aw sue lina riypatana a cuo.

¹⁸Vieluo lie Khrih thiyna kaw hing rana luo a chiy nguoluopa tie cuota ca ngaana bie cuote, cuorasala khuo nguoluopa kiema cuota ca Khazing cahrana tana a cuo.

¹⁹Tahematapakieca Caapathepa ta, “Mingsing tie singna kha para'a ang te, A thepa tie thena kha i pavie aa,” a ta.

²⁰Khaapaliema a singpa ca a aw? Phungbie saya ca khaapaliema a aw? Ata chuo bie i a thepa tie ca khaapaliema ama aw? Khazing ta chuelyi singna kha ngaana ta a pacuo sa tli cuo vama?

²¹Tahematapakieca Khazing singna chunglie hing chuelyi hingta singna ta Khazing a pachang khu li nakawta, ma phupa ngaana bie ama tapa thuophaabie hingta a zangpa tie khuo riypa kha Khazing khingna tana a cuo.

²²Tahematapakieca Judah ming ta pahmungsana kha hie yite Grik ming ta singna kha ama tlechuo,

²³cuorasala kiema ca Khrih vieluo lie a thiyna kaw kha phu pate, capaca Judah ming cuota aliena cuote Jentail ming cuota ngaana bie ta a cuo.

²⁴Cuorasala Khazing kupa Judah ming hne Grik ming cuota ca Khrih ca Khazing cahrana hne Khazing singna tana a cuo.

²⁵Tahematapakieca Khazing ngaana ca cawsaa singna laata sing vie te, Khazing thaadyana ca cawsaa cahrana laata a thaa a ruv vie ngiethie.

²⁶Uvnu hne sieta zaw, Khazing ta aca kuna yi kha rue syalya tie ung. Niema hrawlie hing chuelyi taana luota a singsapa, hmang a tue khupa hne phanghruo luota aa suopa hluvsa va ungciy.

²⁷Cuorasala Khazing ta chuelyi lie a singpa tie nang pazaa riypata aa ngaapa tie kha a tlaw yite, a cahrapa tie nang pazaa riypata a thaa dyapa tie kha a tlaw yi.

²⁸Khazing ta chuelyi lie esenutaapa tie hne siysaa ri lipa tie kha a tlaw yite, a biepuvpa hmang tie kha khaapatahmuo ama cuo li riypata a biepuv lipa hmang kha aa tlaw.

²⁹Cacuonakawta Khazing hmielie ca ahungtahmuo a palepatie khu'a vyi.

³⁰Khazing ca Khrih Zingsuv thueta nama hringna hruo ta a cuo. Zingsuv ca kiema cuota Khazing taata a zuvpa singna, adangna, pathesana hne khuona ta a cuo.

³¹Cacuonakawta, Caapathepa lie a capepa haata, “A pale khingpa ca Abyipa'a lie kha a pale se.”