Read Lautu Chin 1 Korin 10 Bible Online

1 Korin 10 - Lautu Chin bible

1 Korin 10

¹Uvnu hne sieta zaw,[12] ma mingchingmingvuo tie bang-khuo ca amyi rawlie za aw yite riyliy ama za tepa kha nama maw li riypata ica khing yi.

²Moses hnang ziytuv cuo riypata amyi chunglie hne riyliy chunglie kha tiy amaa zaa naw.

³Ama bangkhuo ta thlaapa sa kha za ning pakhaw yite,

⁴thlaapa tiy kha ama za dang pakhaw. Iema a ziylepa yi thlaapa Alung taakhata tiy ca dang yite capa Alung ca Khrih ta a cuo.

⁵Cata a cuo raalaa pata cawsaa hluv vie cunglie Khazing palung a tluo li nakawta ama riy kha ruochung lie ze patlaa siy pata ama cuo.

⁶Hingpa bangkhuo hing iema ama tuepa chiena kha ma tue khing ra li riypata kiema cuota a mangpuo riy tana a cuo.

⁷Caapathepa ta, “Cawsaa zaw ca ning riypa hne dang riypa khata a tu yite thu yite ama luo,” a tapa haakhata iema chekha haata kuvtuezuv abiepa cuo kha ung.

⁸Kiema ca iema hrawlie cawsaa chekha ta ama za tuepa haakhata a paruv suena tue'a va puv, cahaa cata ama za tue nakawta ning kha chunglie thawkiy thawthung ama za thiy.

⁹Iema chekha ta ama za tuepa haakhata kiema ca Khrih[13] kha ima dyapasya riypata cuo vyi, cahaa cata ama za tuena kawta pariy ta a za dawsa yi.

¹⁰Iema chekha amaa zaa ciephuvluvpa haakhata maa ciephuvluv riypata cuo vyi, iema ca Paratuv avuoming ta ama za para diy tli.

¹¹Iema'a lie a tlungpa hingpa hmang hing a raaringna riypata kiema chuotliepa saa zaw cuota capepa tana a cuo.

¹²Cacuonakawta a cusa pata na i daa a tapa ca aa lie li riypata a raaring se.

¹³Namaa tawpa pasupaliyna hing cawsaa cunglie a tlung buo lipa cuo vyi. Khazing ca zangtluo aa tlapa tana a cuo, niema nama ang khu lipa pasupaliyna kha capa ang sa'a vayi. Cuorasala namaa tawpa kha nama ang khuna riypata, capa pasupaliyna hne cata pyapathlana luopuv kha a ca sapa puo'a yi.

¹⁴Cacuonakawta, i duepa zaw, kuvtuezuv abiena ca cahriy tie ung.

¹⁵Ruena a hnyipa tie bie changpa haatana ica chang yi; i ripa hing niema ta tah thleduo tie ung.

¹⁶Abyipa zuosa lie ma hmuo pakhawpa palungtluona panuo cuota thlaa ma chuo tiyta Khrih thiyse na maa hraw ung cuo vama? Viechuo chechi pate maa hrawpa zaw ung hing Khrih pangpa na maa hraw ung cuo vama?

¹⁷Viechuo tluokha a cuo nakawta, kiema a hluvpuv hing pangkha tana ma cuo, tahematapakieca viechuo tluokha maa hraw nakawtana a cuo.

¹⁸Israel ming kha pacuo syalya pachiy tie ung; hriykhung a rina saa a cepa bangkhuo ca bienatluophie re lie kha phuvkha tana ama cuo cuo vama?

¹⁹I ri khingpa ca khaapama a cuo? Kuvtuezuv ama pipa sa a cuo li kie kuvtuezuv hing a biepuv i ta khingna a cuo ma?

²⁰Cuo vyi, i ri khingpa ca lawki ming hriykhung a rinapa ca khuevuo'a luo ama pipa cuote Khazing'a luo ama pipa cuo vyi. Niema ca khuevuo hne namaa viesaa riypata ca khing vayi ang.

²¹Abyipa panuo hne khuevuo panuo kha dang pakhe khu'a va ungciy. Abyipa cabya hne khuevuo cabya zaw dung pakhaw khu va ungciy.

²²Abyipa ca a hietlie se tapa ma ima khing? Ama laata a cahra vie pata a ri kanaa ungpuv?

²³Khaapa bangkhuo tue khu pata a cuo, cuorasala hmangting hingta thlahnena malie pi vyi. Khaapa bangkhuo hing tue khu pata a cuo, cuorasala hmangting hingta malie sathaw vyi.

²⁴Ahungtahmuo kiema phana cuo dyi huv riypa cuo vyi, cuorasala malie cuo phana khana ma huv vie riypata a cuo.

²⁵Saa zaana lie ama zaapa bangkhuo kha na chiephathleduona ta bie hiehriy tievya li pata va ning thluo.

²⁶Tahematapakieca chuelyi hne a chunglie a awpa bangkhuo hing Abyipa huopa tana a cuo.

²⁷Zanglituv pakha ta sa ning aca ku kieca na chiephathleduona lie bie hiehriyna suokha hmuo tue li pata na hmiekunglie ama pachiepa bangkhuo kha ning tie.

²⁸Cuorasala cawsaa pakhakha ta, “Hing sa hing hriykhung rina lie ama pipa sa tana a cuo,” aca ta kieca caa changtuvpa kaw pacuona hne chiephathleduona kawlieta ning li pata aw tie.

²⁹Chiephathleduona i ta tiyta niema cuo li pata caa changtuvpa chiephathleduona khana i ri khing pata a cuo. Khaapanakawma cawsaa pakha chiephathleduona ta kama hyazangna kha ina pakhuo aa?

³⁰Sa kha thlaa a chuo ang te i ning kieca, capa sa cuota thlaa i chuo nakaw cata khaapanakawma ina caw-yi'a yi?

³¹Cacuonakawta, na ning kie cuose, na dang kie cuose, khaapa na tue kie zaw ma, na tuepa bangkhuo kha Khazing rungnaana cuota tue tie.

³²Judah ming cunglie cuose, Krik ming cunglie cuose, Khazing Khrihsaabuv cunglie cuose, a patawpamuona tue kha.

³³Kama hing naa mangpuo tie ung. Hmangting i tuena lie hing cawsaa bangkhuo palung patluo riypa a zue ang te, kama phana kha huv lipa angta, cawsaa hluvpuv phana hmung riypa kha i huv. Caca cawsaa hluvpuv khuona ama hmung thena riypatana a cuo.