Read Lautu Chin 1 Korin 11 Bible Online

1 Korin 11 - Lautu Chin bible

1 Korin 11

¹Kama ta Khrih kha i mangpuo pahaata kama kha naa mangpuo ra tie ung.

²Hmangting kawlie kama kha naa thyi ung cate ica pacuv pachaapa yi phungluo kha nama ziy nakawta ica pathuo sa yi.

³Cuorasala nama pachang riypata i khingpa yi ca, Khrih ca cawsaa bangkhuo luv ta cuote, navaapa[14] ca napuvnung luv[15] ta a cuo, cakhutaa Khazing ca Khrih luv ta a cuo.

⁴Capaa pakha thlaa a chuo tiyta hne biephu a ri tiyta a luv kha aa khuv kieca a luv ling a pazuepa tana a cuo,

⁵cuorasala canung pakha ta a luv kha a khuv li pata thlaa chuo te biephu a ri kieca a luv ling a pazue pata a cuo, a luv a pamyipa canung pakha hne tana aa lu.

⁶Cacuonakawta canung ta a luv kha aa khuv li kieca a suo kha a ngu lalue se; cuorasala canung pakha cuota suo a ngupa hne luv a pamyipa kha lingzuena ta a cuo kieca a luv kha a khuv se.

⁷Capaa ca a luv kha a khuv riypata cuo vyi, tahematapakieca ama ca Khazing hmingsuo a phyapa hne a rungnaana a paluo sapa tana a cuo; cuorasala canung ca capaa rungnaana a paluo satuv dyi tana a cuo.

⁸Hmisi ta ri pata a cuo kieca, capaa ca canung'a taata sapa cuo li pata, canung tuv kha capaa'a taata sapa ta a cuo.

⁹Capaa ca canung cuota sapa cuo li pata, canung tuv kha capaa cuota sapa ta a cuo.

¹⁰Capanakaw hne avuoming hmiemang pata canung pakha ca luvkhuv kha a khuv se.

¹¹Tuokhaata a cuo zaw, Abyipa chunglie ima hringna lie hingta ca capaa aw li pata canung ta ama seta a daa khu aw li pata, capaa zaw canung aw li pata ama seta a daa khu vyi.

¹²Tahematapakieca canung ca capaa chung taata sapa a cuo pahaata capaa zaw canung chung taata a puvpa ta a cuo. Cuorasala hmangting bangkhuo hing Khazing'a taata a vawpa tana a cuo.

¹³Niema ta tah bie a chi tie ung: canung ta a luv a khu li pata Khazing'a luo thlaa chuo riypa a pha'a ma?

¹⁴Chuelyi hmang awtuv zya hingta capaa ta a suo a pasyi kieca a ling kha a pazue te,

¹⁵canung ca a suo a syi kieca a rungnaana tana a cuo tapata cuo vama? Tahematapakieca a suo ca a luv a khuvna riypata pi pata na a cuo.

¹⁶Cuorasala cawsaa pakhakha ta hingpa hing a i khing kieca kiema'a lie cuose, Khazing Khrihsaabuv'a lie cuose, cahaapaapa phungluo ca aw vyi, tapata i ri khing.

¹⁷Cadyiseca, a raw luo pacuvna kawlie hingta ca ca pathuo sa khu vayi ang, tahematapakieca namaa pungnapa hingta phana laata chiena a chiykhyi vie.

¹⁸Tahematapakieca a suokhana ca Khrihsaabuv lie namaa pung tiyta phuvkha hne phuvkha palung a lu lina nama hnyi tapa kha thyi ang te, a hmuo buo thluo thlu aa tapata i zang.

¹⁹Hmisi ta ripa kieca, a phuv ta a chena ca a aw a hu thluo ra, cakiedyina niema hrawlie ahungma a hmisipa a cuo tapa kha aa luo aa.

²⁰Niema namaa pung pakhaw tiyta nama ningpa ca Abyipa zuosa ta cuo vyi.

²¹Ning tiy a vya ta tiyta, nama huopa cyicuo kha a la ung cate nama ning; pakha ca a nang diy te pakha ca nama pariy.

²²Ningna dangna riypata ing hnyi va ung cama? A cuo li kie, Khazing Khrihsaabuv kha nutaa pata khaahmuo a hnyi lipa tie nang pazaa riypa ma nama khing? Khaapa bie ma ica chang'a yi? Ica pathuo sa'a yi ma? Hingpa kawlie hingta ca ca pathuo sa'a vayi ang!

²³Tahematapakieca ica pi pachaapa yi hing Abyipa'a taata i hmungpa tana a cuo. Abyipa Zingsuv ca ama lyi zuopa lie kha viechuo tluokha kha la te,

²⁴palungtluona bie a hluo khu taata, chechi te, “Hingpa hing i pangpa[16] tana a cuo, niema cuota a cuo. Kama a thyina riypata tue tie ung,” a ta yi.

²⁵Cahaa ngiethie cata, zuosa ama ning khu taata, panuo zaw kha la te, Hing panuo hing i thiyse ta pacu sapa biekuona thaapa tana a cuo. Hing panuo nama dang kyry hingta kama a thyi pakhaana riypata tue mya ung,” a ta.

²⁶Tahematapakieca hing viechuo ning ung cate hing panuo nama dang kyry ta Abyipa thiyna khana ama a vaw pakhaa nate ta nama phu pata a cuo.

²⁷Cacuonakawta a hmuo tluopa a cuo li pata Abyipa viechuo kha ning te panuo kha a dangpa ca Abyipa pangpa hne thiyse lieta a suepa tana ama cuo.

²⁸Nama hne nama kha a hiehriypasie taa la, cakhutaa dyi cata viechuo kha ce la panuo kha dang tie.

²⁹Tahematapakieca Abyipa pangpa kaw kha pachangpasie li pata viechuo kha ce te panuo a dangpa ca iema cunglie suena patlung riypata a ning a dangpa tana ama cuo.

³⁰Capa kaw liecana niema a hluvpuv ca nama thaa dya te nama pasa, chekha ca nama thiy.

³¹Kiema hne kiema kha maa hiehriypasie kieca bie ripa pata cuo'a va puv.

³²Cuorasala, Abyipa ta kiema kha bie malie a ripa kieca chuelyi ming hneta sue phaw hnepa ma cuo li riypata malie a pasiypa-yapa tana a cuo.

³³Cacuonakawta, i uvnu hne i sieta zaw,[17] Abyipa zuosa hmuo riypata namaa pung tiyta, pakha hne pakha kha a huo mya ung.

³⁴Nama nang a diy kie ing lie kha ning tie ung. Cahaa cata a cuo kieca, namaa pung thueta sue aca phaw riy yi aw'a vyi. Hmang hrangpa hne aa patuv pata ca i vya chiy thue na ica pacuv pakhaa'a yi.