Read Lautu Chin 1 Korin 12 Bible Online

1 Korin 12 - Lautu Chin bible

1 Korin 12

¹Uvnu hne sieta zaw,[18] thlaapa lasaw hne aa patuvpa hingta, ca pachang sa lipa yi ta aw khing va ang.

²Lawki ming nama za cuo ning kha a huv a sung lipa kuvtuezuv kha abie riypata ca za sawle yite, luo nama za paapa kha nama pachang.

³Cacuonakawta nama pachang riypata i khingpa ca Khazing Thlaapa thueta bie a ripa ta ca, “Zingsuv ca chie sapa cuose,” ta buo'a vayi. Thlaapa Pathe thueta ta li pata ca, “Zingsuv ca Abyipa tana a cuo,” ta khu'a vayi.

⁴Lasaw phangphang a aw raalaa pata, Thlaapa pakha'a taatana a cuo diy.

⁵Re a phangphang a aw raalaa pata, Abyipa pakha huona ma hrie diy.

⁶Rehriena a phangphang a aw raalaa pata, khapa bangkhuo a pahrie a patue sapa yi ca Khazing pakha tana a cuo.

⁷Zaapuv phana riypata pakha cyicuo kha Thlaapa paluohuo sa khunapa kha malie a pi.

⁸Thlaapa cata pakha kha singna bie ri khu riypa pi te, capa Thlaapa ngiethie cata pakha kha pachangna bie ri khu riypata a pi.

⁹A hrangpa pakha kha Thlaapa cata zangna pi te, capa Thlaapa ngiethie cata pakha kha patluo sana lasaw a pi.

¹⁰A hrangpa pakha kha kharuehaa hmang tue khuna pi te, a hrangpa pakha kha profet-biephu rithena a pi. A hrangpa pakha kha Thlaapa thleduo thena pi te, a hrangpa pakha kha ryi phanghrangpa tie cyi thena a pi, a hrangpa pakha kha ryi palie thenapa a pi.

¹¹Hingpa bangkhuo a tuetuv hing aa lupa Thlaapa pakha ta cuote, a khingna haakhata cawsaa kha lasaw phang nanang kaluo ta a pi yi.

¹²Pangpa ca suokha cuote chebuo a hluvsa a hnyi pahaata hne chebuo bangkhuo ca ama hluvsa raalaa pata pangpa suokha ta ama cuopa haata, Zingsuv chunglie zaw cahaa cata a cuo.

¹³Cahaa cata kiema bangkhuo zaw hing Judah ming ma cuo zaw, Jentail ming ma cuo zaw, sii ma cuo zaw, hya a zangpa ma cuo zaw, ma bangkhuo hingta pangpa suokha chunglie kha Thlaapa pakha ta tiynawna malie pi te, ma bangkhuo hingta dang riypa, Thlaapa pakha kha pipa tana ma cuo.

¹⁴Pangpa suokha lie hing chebuo suokha dyi aw li pata chebuo a hluvpuv ama aw.

¹⁵Phyi ta, kama ca kuv i cuo li nakawta pangpa ta cuo va ang ta sala, capa cata chebuo cuo li tli pata pa-aw sa'a vyi.

¹⁶Cahaa cata naa ta, “Ming i cuo li nakawta pangpa ta cuo va ang ta sala, capa cata chebuo cuo li tli pata pa-aw sa'a vyi.

¹⁷Ma pangpa bangkhuo hing ming ta cuo sala, tuokhaatama a thyi the aa? Ma pangpa bangkhuo hing naa ta cuo sala, tuokhaatama rang a thyi the aa?

¹⁸Cuorasala a ta a cuona haa yalya hingta, Khazing ta, ama khingna haata, chebuo tie kha iema'a na ama awna riypa hmang lie kha a chi yi.

¹⁹Chebuo suokha ta cuo diy yi sala, pangpa ca khaalie ma a aw aa?

²⁰Ata a cuona haahingta, chebuo hluvpuv aw yite, pangpa suokha ta a cuo.

²¹Ming ta kuv kha, “Nama kha caa hu va ang,” ta khu vyi; luv zaw ta phyi kha, “Nama ca caa hu va ang,” ta khu ra'a vyi.

²²Hmisi ta ripa kieca, a thaa a ne viepa haata a tapa chebuo tie hing ama aw li pata a cuo the lipa tana ama cuo.

²³Hmiezaa tluo a tla uo vyi tapata ma ruepa tie kha khuo vie ta mangchiy pate, a puvthe uo lipa chebuo tie kha a puvthe vie ta ma pangi yi ta.

²⁴A puvthe viepa chebuo tie ca cahaa cata tue a hu vayi. Cuorasala Khazing ta hmiezaa tluo aa tla uo lipa tie kha hmiezaana a le vie ta pi yite pangpa kha a sa.

²⁵Caca pangpa chunglie palung a lu lina a aw li riypa hne chebuo tie kha amaa mangchiy the kaluo riypata a tue.

²⁶Chebuo suokha ta pasana a ang kieca pasakhyi kaluo yite, chebuo suokha hmiezaana a hmung kieca amaa lawkhyi kaluo.

²⁷Niema ca Khrih pangpa cuo ung cate, pakha cyicuo hing capa pangpa chebuo cata nama cuo.

²⁸Khazing ta Khrihsaabuv lie re a pi tiy yi ta, a suokhana ta lucuotuv tie, a suohningna ta profet tie, a suothungna ta pacuvtuv tie, cakhutaa kharuehaa hmang a tuetuvpa tie, cakhutaata patluo sa khuna pipa tie, a paziy pata malie a bya khuna pipa tie, cakhutaata malie luochiy thena pipa tie, hne ryi a phangphang ta a cyi khupa tie tapata a pi yi.

²⁹Ama bangkhuo ta lucuotuv ama cuo ma? Ama bangkhuo ta profet ama cuo ma? Ama bangkhuo ta pacuvtuv ama cuo ma? Ama bangkhuo ta kharuehaa hmang ama tue ma?

³⁰Ama bangkhuo ta patluo sa khuna ama hnyi ma? Ama bangkhuo ta ryi hrangpa ama cyi ma? Ama bangkhuo ta ryi hrangpa kha ama palie the ma?

³¹Cuorasala aa suo viepa lasaw hmung riypa kha a zue tie ung. Kama zaw ta a phacepa luo kha ica pahmung sa'a yi.