Read Lautu Chin 1 Korin 13 Bible Online

1 Korin 13 - Lautu Chin bible

1 Korin 13

¹Kama hingta cawsaa ryi a phangphang hne avuoming ryi khahmuo the ra ang sala, duena i hnyi li kieca i ryi ca malie naa a ruepa daakhang pu hne chaaraa pu khana a lu.

²Profet biephu ri khuna hnyi ang te, bie a thuvpa bangkhuo i pachang diy khutaa pachangna phangting hnyi pata, tluo a hnyi khupa zangna bangkhuo i hnyi zaw ta duena i hnyi li kieca, khaapatahmuo cuo va ang.

³I hnyipa bangkhuo kha malie pi diy yi ang te i pangpa kha myi ta rue riypata i pi zaw ta, duena i hnyi li kieca khaapatahmuo cuo va ang.

⁴Duena ca a palung pasiy te kawpacuo a the. Duena ca malie hietlie vyi, a pale a patie vyi. Duena ca a hruotle li pata

⁵a palung chiehruv vyi. Duena ca ama phana dyi kha huv vyi. A hi haa li pata vieriy thung khingna palung hnyi vyi.

⁶Duena ca a pha lipa hmang lie a palung tluo vyi, cuorasala biehmisipa lie kha aa law.

⁷Duena ca hmangting kha ang khu te, hmangting kha a zang. Hmangting kha a nguopuo te hmangting lie te a maa khu.

⁸Duena ca chuo buo vyi. Cuorasala profet biephu zaw ca a chuo aa. Ryi phangting rithena zaw die'a te, pachangna zaw a chuo aa.

⁹Tahematapakieca a chebuo dyi pachang pate, bie kha a che dyi ma phu.

¹⁰Cuorasala a tlingpa a vya chiy tiyta a chebuo hing ca a chuo aa.

¹¹Haatiy i cuo ning kha haatiy haata bie i ri, haatiy haata rue ang te, haatiy haata i ruepacuo. Uvthyita i vya cuo tiyta ca haatiy cuona kha i pachuo sa.

¹²Tahematapakieca ata hing ca thlaluo lie a sie pawliy li pata maa hmungpa haata cuo pate, capa thueta ca a hmiepachaw pata ma hmung aa. Ata hing ca a chebuo dyi pachang ang te, capa thueta ca kama kha ina pachangpasie pahaata a bangkhuo ta i pachang aa.

¹³Ata hing a hmang paripa hmang suothung aw te; zangna, anguopuona hne duena ta ama cuo, capa suothung chunglie ta a lecepa ca duena tana a cuo.