Read Lautu Chin 1 Korin 14 Bible Online

1 Korin 14 - Lautu Chin bible

1 Korin 14

¹Duena luo kha ziy ungla thlaapa lasaw hmung kha a zue tie ung. A hlyi vie ta profet-biephu rithena kha a zue tie ung.

²Tahematapakieca thyiliparyi a cyipa ca cawsaa'a lie kha a cyipa cuo li pata Khazing'a lie a cyipa tana a cuo. Tahematapakieca thlaapa chunglie bie aa thuvpa kha ama ri nakawta ahungtahmuo thyi vayi.

³Cuorasala biephu a ripa tie ca cawsaa hrangpa tie amaa sathawna riypa, thaazuo pina hne hnaa panguona ta ama ri pata a cuo.

⁴Thyiliparyi a cyipa tie ca iema hne iema kha a sathaw yite profet-biephu a ripa tie ca Khrihsaabuv kha ama sathaw.

⁵Niema bangkhuo thyiliparyi nama cyi riypa icaa khingkhyi raalaa pa yi ta, biephu rithena kha icaa khingkhyi vie yi. Biephu a ripa ca thyiliparyi a cyipa laata aa suo vie. Khrihsaabuv aa sathaw khu riypata pakhakha ta a ri khingna kha a palie ta li pata ca khaahmuo thlahne vyi.

⁶Uvnu hne sieta zaw,[19] niema'a luo kha thyiliparyi cyi pata a vaw ang sala niema kha Khazing biephu cuose, pachangna cuose, profet-biephu cuose, pacuvna cuose ica hnyi li kie yi ca khaapama a thlahne aa?

⁷Hringna a hnyi lipa, tungpa chechiy ta a cuopa, ramang hne tingtuo zaw ama paring cakhawpa hne tana aa lu aa. A ue kha a siesa pata a pya li kieca khaapa ue ma ama tung tapa kha pachang khu a aw'a ma?

⁸Hmyakaa a tungtuv ta rietuvna hmyakaa ue pachiy pata a siesa pata a tung li kieca ahungma rie tuv riypata a pachie pacie pata a aw aa?

⁹Cahaa cata thyiliparyi nama cyipa ca a ri khingna thyi thepa a cuo li kieca khaapana ama ri tapa kha ahungma a pachang aa? Thliy chunglie bie ri cakhawpa tana a cuo aa.

¹⁰Chuelyi cunglie hing ryi a phangphang ta aw te siyluo a hnyi lipa ryi suokha hmuo aw vyi.

¹¹Ryi phangkha kha a ri khingna i pachang li kieca a cyituvpa cuo khata kama ca ruohrang ming cuo ang te, a cyituvpa zaw kha kama cuota ruohrang ming tana a cuo ra.

¹²Cacuonakawta thlaapa lasaw kha nama hmung khing hringhruo kieca, khrihsaabuv a sathaw riypa lasaw kha hmung a zue tie ung.

¹³Cacuonakawta, thyiliparyi a cyipa pakha ca a ri khingna palie khu riypa kha thlaa a chuo se.

¹⁴Tahematapakieca thyiliparyi ta thlaa i chuo kieca, i thlaapa ta thlaa ca a chuo raalaa pata i pathiypalung lieta thlahnena aw vyi.

¹⁵Cacuokie khaapama i tue aa? Thlaapa ta thlaa chuo'a ang te, i pathiypalung ta zaw thlaa i chuo ra aa; thlaapa ta pathuosana hlaa sa'a ang te, pathiypalung ta zaw i sa ra aa.

¹⁶Cacuolikie thlaapa ta thlaa na chuopa kha khaapama na ri tapa a pachang lipa ale cawsaapapaa ta na thlaachuopa kha tuokhaatama “Amen” a ta the aa?

¹⁷Nama ca Khazing kha a phasa pata na pathuo sa raalaa'a pata cawsaa hrangpa cuota ca a sathawna aw vyi.

¹⁸Niema laata thyiliparyi i cyi the vie nakawta Khazing kha i law.

¹⁹Cuorasala, apungna chunglie malie changna riypa taca thyiliparyi biesuo thawhraa i cyipa laata thyipa ryi biesuo suopangaa khana i cyi hriy aa.

²⁰Uvnu hne sieta zaw, nama khueruena hing haatiy khueruena haata cuo kha se, uvthyita haata khuerue ungla, pha lina kawlie tuv dyi kha haatiy haata cuo tie ung.

²¹Phungbie caa-uv chunglie, Abyipa ta, “Ryi hrangpa a cyipa tie hne ruohrang ming pakaa taata hing cawsaa zaw'a luo hing bie i ri aa; Cakhutaacata hmuota naa na thlie ngiethie'a vayi,” a ta.

²²Cakhutaata, thyiliparyi ca zangtuv tie cuota cuo li pata zanglituv tie cuota pamangsana ta a cuopa haata profet-biephu rithena hing zanglituv tie cuota cuo li pata zangtuv tie cuota pamangsana ta a cuo ra.

²³Cacuonakawta, khrihsaabuv lie zangtuv tie bangkhuo a pung ungla, nama bangkhuo ta thyiliparyi nama cyina lie kha zanglituv tie amaa zaa ngie kie, ama ngaa diy tli muo ca ta'a vayi ma?

²⁴Cuorasala nama bangkhuo ta profet-biephu kha nama ri kieca, zanglituv a cuo li kie ale cawsaa pakhakha a zaa ngie tiyta, nama bie ta a pathiypalung ruv kha capya'a te a suena a pachang aa.

²⁵A pathiypalung ruv chunglie'a pakha a kya luo'a te, a pakhuv pane'a te Khazing kha abie te, “Nama hrawlie Khazing a aw hmisi,” a ta aa.

²⁶Cacuokie, uvnu zaw, khaapama ma tue aa? Khazing abie riypata namaa pung tiyta, niema pakha cyicuo ta, hlaa sa a khingpa, a pacuv khingpa, Khazing biephu a ri khingpa, thyiliparyi a cyi khingpa, a ri khingna a palie khingpa tapata nama aw aa. Hingpa bangkhuo hing Khrihsaabuv a sathawna ta tue tie ung.

²⁷Thyiliparyi a cyi khingpa nama aw kieca pahning a cuo li kie a hluvce ta pathung ta ri yi sala, aa paziy pata ri yi se; cakhutaata pakha ta a ri khingna kha palie se.

²⁸A palie riypa ama aw li kieca, a dieta tah aw yi sala, iema hne Khazing'a lie kha ri yi se.

²⁹Profet pahning a cuo li kie pathung ta bie kha ri yi sala, a hrangpa tie ta ama ripa kha ruepacuo yi se.

³⁰A thaa lie a tu rapa pakhakha'a lieta, Khazing biephu aa luo kieca, a ri taapa ca die se.

³¹Tahematapakieca, nama bangkhuo ta namaa cuv the riypa hne thaazuo namaa la thena riypata profet-biephu kha pakha hnang pakha ta nama ri khu.

³²Profet tie pathiypalung phya ta ca profet tie ri kha a ngie aa.

³³Tahematapakieca Khazing ca adang-apuo li pata hmang a tuepa cuo li pata diena Khazing tana a cuo. (Mingpathepa tie Khrihsaabuv bangkhuo lie ama tuepa haakhata,

³⁴canung ca apungna lie kha a dieta tah aw yi se. Tahematapakieca iema ca bie rina naw hnyi vayi. Phungbie ta a ripa haakhata, aa ne vie ta aw yi se.

³⁵Ama pachang khingpa suokhakha a aw kieca ama navaapa kha ing lie hiehriy yi se. Khrihsaabuv lie bie ripa ca canung cuota nangzaa aa chiypa tana a cuo.[20]

³⁶Khazing bie ca niema'a taata a hruo a thu kanaa? A cuo li kie capa bie ca niema'a luo dyi hing chiy kanaa?)

³⁷Niema hrawlie ta profet tana i cuo aa tapa tie, a cuo li kie thlaapa cahrana na i hmung aa tapa tie ta, ata niema'a luo i vya capepa caa hing Abyipa bie pipa tana a cuo tapa kha pachang yi se.

³⁸Hingpa hing khaapatahmuo a ri lipa ca khaapatahmuo ripa cuo'a vyi.

³⁹Cacuonakawta, viesaa zaw,[21] profet-biephu ri kha khing ungla, thyiliparyi cyi kha thlu kha ung;

⁴⁰cuorasala hmangting bangkhuo kha aa chawrawsa pata hne adang-apuosa pata tue tie ung.