Read Lautu Chin 1 Korin 15 Bible Online

1 Korin 15 - Lautu Chin bible

1 Korin 15

¹Uvnu hne sieta zaw,[22] ica za changpa yi thuophaabie kha namaa thyi pakhaa pata i khing. Ca thuophaabie ca cuhluo ung cate, nama zangna a cusa pata nama bangnapa ta a cuo.

²Niema ta hingpa ica changpa yi thuophaabie hing a cusa pata namaa patuv kieca khuopa ta cuo'a ung cate, a cusa pata namaa patuv li kieca nama zangna kha khaahmuo li patana a cuo aa.

³Tahematapakieca i za hmungpa, a biepuvce tapata niema ica changpachaapa yi ca: Caapathepa chunglie ama za capepa haata Khrih ca ma sue nakawta thiy te;

⁴paby yite, Caapathepa lie aa capepa haata ningthung napa lie pathu pakhaa pata a cuo.

⁵Piter'a lie kha a luo te, cakhutaata lucuotuv hlyihning cunglie kha aa luo.

⁶Cakhutaata a ziytuv zapangaa hlyi cunglie kha yikha ta a luo te, chekha ca ama thiy tli raalaa pata hluv vie ca ama hring kalie.

⁷Cakhutaata Jeim'a lie kha a luo te, lucuotuv bangkhuo'a lie kha aa luo.

⁸A hnangcawce ta aning-acuo cuo li pata a puvpa haata a cuopa kama'a lie zaw kha aa luo.

⁹Tahematapakieca kama ca lucuotuv tie hrawlie a cawcepa tana i cuo. Khazing khrihsaabuv kha i za hrisaathierue nakawta lucuotuv tapata ku riypa tahmuo a tla va ang.

¹⁰Cuorasala Khazing vihnyina thueta kama ca ata i cuona haahingta cuo ang te, vi ina hnyina ca a cakhawpa ta cuo vyi. Lucuotuv hrangpa bangkhuo laata khuo vie ta rehrie ang te, cuorasala capaca kama ta i hriepa cuo li pata kama chunglie a awpa Khazing vihnyina ta a hriepa tana a cuo.

¹¹Kama cuo angse, iema cuo yi se, ma bangkhuo ta thuophaabie kha phu pate niema zaw nama zang.

¹²Khrih ca thiyna taata na a thupakhaa tapata phupa a cuo kieca, khaapanakawma niema chekha ta thiyna taata thupakhaana aw vyi tapata nama ri the?

¹³Thiyna taata thupakhaana na a aw va tapata a cuo kieca, Khrih hing pathu pakhaa pata cuo'a vyi.

¹⁴Khrih hing pathu pakhaa pata a cuo li kieca, ma thuophaabie phupa hing a cakhawpa ta cuo'a te, nama zangna zaw a cakhawpa a cuo aa.

¹⁵Kiema zawte kha Khazing kaw a richiepa ta malie ama hmung aa, tahematapakieca, Khazing na Khrih kha thiyna taata a pathu tapata Khazing kaw kha tehte ma khuo. Athiypa tie thupakhaa vayi tapata a cuo kieca, Khazing ta Khrih kha thiyna taata a pathu pakhaa li nakawtana a cuo aa.

¹⁶Tahematapakieca a thiypa tie pathu pakhaa pata a cuo li kieca, Khrih zaw pathu pakhaa pata cuo'a vyi.

¹⁷Khrih kha pathu pakhaa pata a cuo li kieca, nama zangna ca khaahmuo cuo li'a pata nama suena chunglie a aw kaliepa tana nama cuo aa.

¹⁸Cakhutaata Khrih zang pata, a thiypa tie zaw ama lidie diy aa.

¹⁹Khrih chunglie maa nguopuona hing chuelyi ma hring chung cuota dyi hingta a cuo kieca, cawsaa bangkhuo hrawlie ngiechi aa chiycepa tana ma cuo aa.

²⁰Cuorasala Khrih ca thupakhaa hmisi saw te, a thiypa tie hraw taata thyipaa taapa ta a cuo.

²¹Thiyna ca cawsaa pakha taata a tlung pahaata, thiyna taata thupakhaana zaw cawsaa pakha thue tana a tlung ra.

²²Tahematapakieca Adam thueta cawsaa bangkhuo ama thiy pahaata, Khrih thueta cawsaa bangkhuo kha pahring pata ama cuo aa.

²³Cuorasala iema'a na ama cuo cyicuo ta pathu pakhaa pata ama cuo aa: thyipaa taapa ca Khrih ta cuo'a te, cakhutaata aa vaw ningta a cawsaa a cuopa tie ta ama cuo aa.

²⁴Cakhutaata cuo chuona kha vya tlung'a te, Khrih ta uvtuv bangkhuo, nawhnyina bangkhuo hne cahrana bangkhuo kha a para diy khu taata, pena ca a Paa Khazing'a luo kha a pi aa.

²⁵A carie bangkhuo kha a phyipazaa rawlie a chaapuo nate yi ta a uv'a yi.

²⁶A hnangcawce ta para riypa a cariepa ca thiyna ta a cuo.

²⁷Tahematapakieca, “Ama ta hmangting bangkhuo kha a phyipazaa rawlie a chi,” a ta. Cuorasala, “hmangting bangkhuo kha a phyipazaa rawlie a chi,” a ta tiyta hmangting kha Khrih phyipazaa rawlie a chituv Abyipa ca ripuo pata cuo vyi tapa kha a sie.

²⁸Hmangting bangkhuo kha ama uvna rawlie chi diy pata a cuo tiyta, saacapaa hrahring hing hmangting bangkhuo ama phyipazaa rawlie a pachi sa diypa Khazing uvna rawlie kha aw'a te, Khazing ca hmangting bangkhuo cunglie uvtuv ta a cuo aa.

²⁹Cacuolikieca, a thiypa tie cuopa ta tiy a nawpa tie kha tuokhaata? Athiypa tie kha pathu pakhaa pata ama cuo li kie, khaapanakawma cawsaa ta iema cuopa ta tiy amaa naw aa?

³⁰Cakhutaa, khaapanakawma kiema hrahring hing ruvnaana chunglie ma aw pari?

³¹Ningting tana i thiy! Uvnu hne sieta zaw, niema icaa pale sakhyipa yi hing, a cuo hmisipa, ima Khrih Zingsuv chunglie ta icaa pale sakhyipa yi tana a cuo.

³²Efesa khy lie saahruo tie hne i zaa tuv pakha cawsaapa a nguopuo cakhawna hneta cuo sala, khaama ina thlahne aa? A thiypa tie pathu pakhaapa ama cuo li kieca, “Ning thluo dang thluo'a ungpuv, tahematapakieca, kiema ca mawluo a thiy riy'apa tana ma cuo.”

³³Cawsaa ta ca dung kha yi se: Viesaa pha lipa na zyazaa pha a para.”

³⁴Lungsingpyapa ta aw ungla pathiy-palung pha hnyi tie ung. Suena tue kha tie ung, tahematapakieca cawsaa chekha ca Khazing kha pachang vayi. Nama nang zaa naase ta ang te na hinghaahingta ica ta yi.

³⁵Chekha ta, “A thiypa tie hing tuokhaatama ama thupakhaa aa? Tuokhaapa pangpa ma ama hnyi aa?” nama ta aa.

³⁶A ngaapa zaw! Na tuvpa saciy kha a thiy li pata a kya pu the ma?

³⁷Na tuvpa ca a kya le riypa a kung kha cuo li pata a ciy suokha, jungsacuo a cuo li kie a saciy suokhakha ta a cuo aa.

³⁸Cuorasala Khazing ta ama khingna haata saciy ca a khingpa pangpa kha a pi. Saciy cyicuo khata iema'a na pangpa cyicuo ama hnyi.

³⁹Hringna a hnyipa bangkhuo ta ama hnyipa ngesaa hing a lu vayi, cawsaa ngesaa a phanghrang, saruo ngesaa a phanghrang, pavaa ngesaa a phanghrang, ngaa ngesaa a phanghrang tana ama cuo.

⁴⁰Vuoruo pangpa aw te alyi pangpa a aw ra, cuorasala vuoruo pangpa rungnaana a phanghrang, alyi pangpa rungnaana a phanghrang tana a aw.

⁴¹Ning rungnaana a phanghrang, thlaapa rungnaana a phanghrang, aasiy zaw rungnaana a phanghrang tana a aw; hmisi ta ripa kieca aasiy zaw hmuo suokha hne suokha ama rungnaana aa nanang kalie.

⁴²A thiypa tie thupakhaana zaw cahaacatana a cuo. Saapa pangpa ca ma paby ningta a thuv thepa cuote, pathu pakhaapa a cuo tiyta ca a thuv the lipa tana a cuo.

⁴³Pabypa a cuo ning ca a hming chiepa hne a thaadyapa cuote, pathu pakhaapa a cuo thue ca a puvthepa hne a cahrapa ta a cuo aa.

⁴⁴Paby ning ca chuelyi pangpa cuote, pathu pakhaa thue ca thlaapa pangpa tana a cuo aa.

⁴⁵Caapathepa ta, “Cawsaa taapa Adam ca a hringpa cawsaa ta a cuo,” a ta. A hnangcawpa Adam ca hringna a pipa thlaapa tana a cuo.

⁴⁶Cuorasala a aw taapa ca thlaapa kha cuo li pata, saapa pangpa khatana a cuo, cakhutaa catana thlaapa ca aa vaw.

⁴⁷Cawsaa taapa Adam ca alyi taata cuote, alyi diypa taata sapa tana a cuo; cuorasala Adam pahningnapa ca vuoruo taata a zuvpa tana a cuo.

⁴⁸Alyi huopa a cuopa tie ca alyi ta sapa haakhata cuo yite, vuoruo huopa a cuopa tie ca vuoruo taata a zuvpa haakhata ama cuo.

⁴⁹Alyi ta sapa hmingsuo kha ma phya pahaata vuoruo taata a zuvpa hmingsuo zaw kha ma phya riypata a cuo.

⁵⁰Uvnu hne sieta zaw, i ripa ca hinghaahingta a cuo: thiy hne saa ta ca Khazing pena kha cu khu'a vyi, a ra khupa ta a ra khu lipa ru kha cu khu'a vyi.

⁵¹Naa thlie tie ung, aa thuvpa bieparuv na ica chang'a yi! Kiema bangkhuo hing thiy diy'a va puv, cuorasala a hnangcawcepa hmyakaa ama tung thueta kiema bangkhuo hing sungkhata lie, ming vy hluota lieta maa thle aa. Hmyakaa kha tung'a yite, a thiypa tie kha a ra the lipa luo pathu pakhaa pata ama cuo aa, cakhutaa kiema kha maa thle aa.

⁵²

⁵³Tahematapakieca hingpa a ra thepa pangpa hingta a ra the lipa kha a hryi'a te, hingpa a thiy thepa pangpa hingta a thiy the lipa kha aa hryi aa.

⁵⁴Hingpa a ra thepa pangpa ta a ra the lipa kha a hryi'a te, hingpa a thiy thepa pangpa ta a thiy the lipa pangpa kha a hryi tiyta Caapathepa lie cape siypa kha a tling aa: “Thiyna ca tena chunglie pahlipadiepa a cuo tli.”

⁵⁵Vya thiyna, na tena ca khaapalie ma a aw? Vya thiyna, na ca-ie ca khaapalie ma a aw?

⁵⁶Thiyna ca-ie ca suena cuote, suena cahrana ca phungbie ta a cuo.

⁵⁷Cuorasala, ima Byipaapa Zingsuv Khrih thueta tena malie a pituv Khazing ca pathuo sa pata aw mangsue.

⁵⁸Cacuonakawta, i duepa zaw,[23] a cu pata a daa tie ung. Khaapatahmuo ca hnyi khu kha yi se. Abyipa re kha a phace pata hrie pari tie ung, tahematapakieca Abyipa re nama hriepa bangkhuo ca a hripa ta cuo vyi tapa kha nama pachang.