Read Lautu Chin 1 Korin 2 Bible Online

1 Korin 2 - Lautu Chin bible

1 Korin 2

¹Uvnu hne sieta zaw,[4] niema'a luo Khazing bieparuv[5] phu riypata i vaw ning kha bie a thuvsapa hne singna kha hmuo va ang.

²Tahematapakieca niema'a lie i aw ning kha Zingsuv Khrih hne vieluo lie ama thiena kaw ri li pata khaapahmuo pachang a hu vyi tapata i za rue.

³Niema'a luo kha thaadyasa pata hne ciypuopa hne a cathangpuo pata i vaw.

⁴I ripa hne i phupa bie kha cawsaa singna bie puvthepa cuo li pata Thlaapa hne a cahrana paluosana ta a cuo.

⁵Cacuonakawta nama zangna ca cawsaa singna cunglie bangpa cuo li pata Khazing cahrana cunglie bangpa tana a cuo.

⁶Cuorasala ruena a ky tlipa tie cunglie ca singna bie kha ma ri. A cuo raalaa pata ca singna ca a rale nguoluopa ata chuo singna hne ata chuo uvtuv tie singna zaw ta cuo vyi.

⁷Cuorasala kiema ma ripa singna ca Khazing ta kiema rungnaana cuota chuelyi puv hluo taata a za rawrue paciepa, a paruv ta a za nupa, Khazing singna tana a cuo.

⁸Ata chuo uvtuv tie pakha tahmuo pachang vayi; pachang yi sala rungnaana Byi kha vieluo lie thie'a vayi.

⁹Cuorasala Caapathepa ta, “Ming ta a za hmung buo lipa, naa ta a za thyi buo lipa hne, Cawsaa palung lie a puv buo lipa hmang kha, Khazing ta ama a duetuv zaw cuota a tingtuo pacie,” a ta.

¹⁰Hing hmang zaw hing Khazing ta Thlaapa ta kiema'a lie a paluo sa. Tahematapakieca Thlaapa ca hmangting bangkhuo hne Khazing tuepa aa thuvpa hmang bangkhuo khahmuo huv te a pathiypahle diy.

¹¹Cawsaa pakha a ruena hne a pacuona kha ama chunglie a awpa a thlaapa ri li pata ahungma a pachang khu? Cahaa ngiethie cata Khazing Thlaapa ri li pata ca Khazing ruena hne pacuona kha ahungtahmuo pachang khu vayi.

¹²Kiema ma tingpa thlaapa hing chuelyi thlaapa ta cuo vyi, Khazing'a taata a zuvpa Thlaapa tana a cuo. Khazing ta malie a pipa lasaw kha ma pachang thena riypata Khazing Thlaapa kha ma ting tli.

¹³Cacuonakawta thlaapa cawsaa a cuopa tie kha thlaapa bie ma pacuv tiy yi ta, khapa hmang bangkhuo kha cawsaa singna ta pacuv li payi pata thlaapa singna ta ma pacuv yi.

¹⁴Thlaapa cawsaa a cuo lipa tie ca Khazing Thlaapa lasaw kha ting vayi, capa hmang ca iema cuota ngaana cuote, iema ta khapa hmang kha pachang khu vayi, tahematapakieca capa hmang ca thlaapa luotaa dyi ta hmung khupa tana a cuo.

¹⁵Thlaapa cawsaa zaw taca hmangting kha hmung khura yite, ahungtahmuo sue phaw khu vayi. Caapathepa ta,

¹⁶“Ahungma Khazing pathiypalung kha pachang te, a chang pachaa khu? a ta. Cuorasala kiema ca Khrih pathiy-palung a hnyituv tana ma cuo.