Read Lautu Chin 1 Korin 4 Bible Online

1 Korin 4 - Lautu Chin bible

1 Korin 4

¹Kiema kha Khrih changtaapa hne Khazing bieparuv mang-chiykingkaatuv ta malie rue tie ung.

²Cadyi cuo li pata mangchiyking-kaatuv ca zangtluo aa tlapa ama cuo a hu.

³Cuorasala niema ta cuose, khaapa chuelyi bierina zung ta cuose i bie ina chipa zaw ung cata kama cuota ca hmang taata tana a cuo. Kama hne kama zaw i kaw hing bie a chi khu va ang.

⁴Kama hne kama kha i pasuenapa aw vyi, cadyiseca i suena aw hrahring vyi ca a ta va ang. I bie naa ripatuv ca Abyipa tana a cuo.

⁵Cacuonakawta a ningkhue a tling hluo, Abyipa aa vaw hluo ta ahunghmuo bie va ripa kha ung. Abyipa ca atalie ta zingna chunglie aa nu nguoluopa hmang hing khena luo chiykhyi'a te, pathiypalung ta aa tingpa zaw kha a paluo sa diy aa. Cakhutaata cawsaa bangkhuo ca iema hne aa phuvpa pathuosana kha Khazing'a taata ama hmung aa.

⁶Uvnu hne sieta zaw,[7] niema phana riypata hingpa bangkhuo hing kama hne Apollos kha pakhingpuona ta hmuo ang te ica chang tli yi. Cahaa cata niema ta Caapathepa lie cape ciepa lawpakhung pata nama tue li riypata kiema'a taata namaa cuv riypa hne ahung nama cuo zaw cawsaa pakha hmie mang pata pakha kha nama hue li riypatana a cuo.

⁷Ahungma niema hing malie laata caapa nanang vie yi? Khazing'a taata nama cuhluo lipa khaapama a aw? Nama cuhluo pata a cuo kieca lasaw ta a cuhluo li pahaata khaapama namaa palekhyi riypa a aw?

⁸Niema ca nama khingpa bangkhuo nama hnyi! Nama hnyirung ciemuo tli! Kiema li pata siepahruo nama cuo tli. Kiema hne siepahruo cuo hne riypata siepahruo cuo sasaw ungla ca a pha'a pakha!

⁹Khazing ta kiema lucuotuv tie hing thiy riypata bie ripa paciepa tie haata cawsaa bangkhuo hnang luo ta malie a chipa tana ma cuo tapatana i rue. Tahematapakieca kiema ca chuelyi hne avuoming hne cawsaa zaw mangbaalaa riypata phusaapa tana ma cuo.

¹⁰Kiema ca Khrih cuota a ngaapa cuo pate, niema ca Khrih chunglie a singpa tana nama cuo. Kiema ca ma thaa a dya, cuorasala niema ca nama thaa a ruv. Niema ca pa-uvsathyipa nama cuo, cuorasala kiema ca nutaapa ta ma cuo.

¹¹Ata cuote hingta kiema ca nangdiy tiyhrie pata ma aw, ma cawsie ca pangbie thlapa a cuo, malie tuv malie de yite ing li lu li pata ma aw,

¹²ma kuv ta tah rehrie pate ma riy maa caw. Sie malie ama pi tiyta thluechiy ma pi yi; malie ama hrisaathierue tiyta ma ang law;

¹³ma thuo malie ama pachi tiyta duena ta ma palie yi. Ata tepa hingta kiema ca chuelyi ta thawpa hne hnehnawvaabuv haata ma cuo.

¹⁴Hing caa hing niema nangzaana riypata i capepa cuo vyi, cuorasala i duepa saa zaw nama cuo pahaata niema kha ica pasiypa-ya khing nakaw yi ta a cuo.

¹⁵Tahematapakieca Khrih chunglie nama hringna lie hing luochiytuv ri tie li nama hnyi zaw ta paa a hluvpuv hnyi va ungciy. Kama ca thuophaabie thueta Khrih Zingsuv chunglie nama hringna lie hing nama paa tana i cuo.

¹⁶Cacuonakawta kama inaa mangpuo riypa ung cata ica pasu yi.

¹⁷Capanakaw cana khy ting lie a awpa khrihsaabuv bangkhuo lie i pacuvpa haayita Khrih Zingsuv chunglie i hringzya kha niema pachang sa pakhaa riypata Abyipa chunglie i duepa hne zangtluo aa tlapa i saacapaa Timote kha niema'a luo i vya pathlie.

¹⁸Niema'a luo a vaw li tli riy'apa haata na rue ung cate, chekha ca ahruo tle ung cate namaa pale.

¹⁹Cuorasala Khazing khingna a cuo kieca niema'a luo ica vya tlaw patang'a yi. A hruotlepa hne a palepa tie ama bie dyi kha cuo li pata ama hmang tue khuna kha i mang'a lie.

²⁰Tahematapakieca Khazing pena ca bie lie cuo li pata cahrana liena a aw.

²¹Khaapama nama khing vie? Niema'a luo kha sungpe hne tama i vaw aa, a cuo li kie duena hne pathiypalung nena tama i vaw aa?