Read Lautu Chin 1 Korin 5 Bible Online

1 Korin 5 - Lautu Chin bible

1 Korin 5

¹Lawki ming hrawlie hmuo a aw lipa canungcapaa kaw luota suena na niema hrawlie a aw tapa kha ina chang yi. Cawsaa pakha na a paa napuvnung hne a aw hne yi tapata a cuo.

²Cata a cuo thluopa cata niema ca namaa pale kalie. Hmisi ta kieca nama ngie a chisa riypata cuo vama? Capa hmang a tuetuvpa ca niema hraw taata nama papya riypata cuo vama?

³Pangpa ta niema'a lie i aw li raalaa pata, thlaapa ta niema'a lie i aw.

⁴Niema'a lie a awpa haata cahaapa hmang a tuetuvpa cunglie ca Abyipa Zingsuv ming ta biechina i tue tli. Namaa pung tiyta ima Byipaapa Zingsuv Khrih cahrana hneta i thlaapa ta niema'a lie a aw ra.

⁵Capa cawsaa ca a pangpa para riypata Setaa'a luo kha pi tie ung, cakiedyina Abyipa Zingsuv khuona ning thueta a thlaapa kha khuona a hmung aa.

⁶Namaa palepatiepa hing pha vyi. Thiynung a cawta tah viedie naw ciepa bangkhuo a pathu sa tapa kha pachang va ung cama?

⁷Thiynung hlungpa kha thaw tie ung, cakiedyina niema ca thiynung phuv lipa a thaapa viedie nawpa haata nama cuo aa. Tahematapakieca lawsena pyi tuvtaata Khrih ca vieluo lie thiepa a cuo tli.

⁸Cacuonakawta, lawsena pyi ca thiynung hlungpa ta a cuopa a pha lipa pathiypalung hne pha lina ta cuo li pata thiynung phuv lipa viechuo ta a cuopa pathena hne biehmisipa khata tue ungsiy.

⁹I caa paphyapa chunglie ta i capepa ca canungcapaa kawlie zyazaa pha lipa tie hneta a khe kha ungla tana ta cuo vyi.

¹⁰Hing chuelyi lie canungcapaa kawlie zyazaa pha lipa tie, a karuo awpa tie hne a ruvhangpa tie, kuvtuezuv abiepa tie zaw i ta khingna ta cuo vyi, cahaa cata a cuo kieca hing chuelyi taahingta nama pya muo a hu'a ta.

¹¹Cuorasala, niema'a luo i vya capepa ca Khrihsaa ming phya tlung pata canung capaa kawlie zyazaa pha lipa tie, a karuo awpa, kuvtuezuv abiepa, cawsaa thuo a pachipa, sahmaa a pariypa hne a ruvhangpa tie hneta a khe kha ungla tapa na a cuo. Cahaapa cawsaa hneta ca sa ning riypa tahmuo a tuhne kha ung.

¹²Hmisi ta ripa kieca, kama ta ale luo'apa tie bie i ripa riypa yita a cuo ma? Khrihsaabuv chunglie a awpa tie hingna ama bie nama ripa aa cuo vama?

¹³Khazing ta Khrihsaabuv le lie a awpa tie kha bie a ripa'a yi. Cawsaa pha lipa kha niema hraw taata papya tie ung.