Read Lautu Chin 1 Korin 6 Bible Online

1 Korin 6 - Lautu Chin bible

1 Korin 6

¹Niema hrawlie pakhakha ta nama uvnu cunglie palung tling lina nama hnyi pata a cuo kieca mingpathepa tie'a luo cakuo cuopa ta, tuokhaatama a dang lipa chuelyi bierina zung luo a cakuo nguo?

²Mingpathepa tie na chuelyi bie a ri'a yi tapa hing pachang va ung cama? Chuelyi hing niema na a bie a ripa'a ungciy tapata a cuo kieca hing bie saalipa hing ripa khu va ung cama?

³Avuoming bie na ma ripa aa tapa hing pachang va ung cama? Hing chuelyi ma hringna lie maa tawpa bie changchiy hing ca ma ri riypa na a cuo.

⁴Cahaapa bie nama hnyi tiyta khaapanakawma Khrihsaabuv ta siysaa ri lipa tie hmie luo nama chiykhyi?

⁵Nama nang zaa naase tapatana i ri. Niema zangtuv[8] pakha hne pakha a lala lie bie chi riypata nama hrawlie mingsingpa pakha hmuo aw vyi tapa ca a cuo khu'a ma?

⁶Zangtuv hne zangtuv[9] tazaa a cyi ung cate ma zanglituv'a luo ca namaa chiykhyi?

⁷Pakha hne pakha tazaa namaa cyipa hing niema cuota asungna tana a cuo pacie tli. Khaapanakawma nama ang hriy thluo va? Khaapanakawma namaa padung sa thluo va?

⁸Cuorasala niema tlaku ta nama uvnu cunglie kha hmangsue va tue ung cate nama dung.

⁹Hmangpha lipa a tuepa tie ca Khazing pena cu'a vayi tapa kha pachang va ung cama? A dung kha ung; aparuvsuena a tuepa tie, kuvtuezuv abiepa tie, nungvaathingsuena a tuepa tie, capaa hne capaa, canung hne canung suena a tuepa tie,

¹⁰a paruvpa tie, a karuo a awpa tie, sahmaa a pariypa tie, cawsaa thuo a pachipa tie hne a ruvhangpa tie ca Khazing pena cu'a vayi.

¹¹Niema chekha ca cahaapaapa catana nama za cuo. Cuorasala Abyipa Zingsuv Khrih ming hne ima Khazing Thlaapa chunglie ta pasiypa, pathe sapa hne duopacupa ta nama cuo tli.

¹²“I cuota hmangting hing tue anaa vyi,” cuorasala i cuota thlahnena naa pipa cuo vyi. “I cuota hmangting hing tue anaa vyi,” cuorasala khaapa hmang tahmuo sii ta naa ziy kha se.

¹³“Sa ca pavaw cuota cuote, pavaw ca sa cuota a cuo,” cuorasala Khazing ta a suohning hingta a para aa. Ma pangpa hing aparuvsuena tuena cuota hmuo riypa cuo vyi, cuorasala ma pangpa ca Abyipa cuota cuote, Abyipa zaw ma pangpa cuota a cuo.

¹⁴Khazing ta Abyipa kha thiyna taata pathu pakhaa te kiema zaw hing a cahrana ta malie a pathu pakhaa aa.

¹⁵Nama pangpa hing Khrih pangpa chebuo a cuopa kha pachang va ung cama? Cacuonakaw Khrih pangpa chebuo kha la pata siyhrawnung pangpa chebuo ta i tue'a ma? Tue buo hluo'a va ang!

¹⁶Siyhrawnung a awhnepa ca ama hne pangkha ama cuopa kha pachang va ung cama? Tahematapakieca Caapathepa ta, “Iema pahning ca pangkha ama cuo aa,” a ta.

¹⁷Cuorasala Abyipa hne a pazuepa ca ama hne thlaapa lieta suokha ama cuo aa.

¹⁸Aparuvsuena kha cahriy tie ung. Cawsaa pakha ta a tuepa suena bangkhuo ca pangpa le luota cuote, aparuvsuena a tuepa taca ama pangpa cunglie hrahring khana suena a tue.

¹⁹Nama pangpa hing Khazing'a taata hmung ung cate nama chunglie a awpa Thlaapa Pathe biena-ing[10] a cuopa pachang va ung cama? Niema ca niema huopa cuo va ungciy;

²⁰muo pipa ta calyipa tana nama cuo. Cacuonakawta nama pangpa kha Khazing rungnaana ta hmuo tie ung.