Read Lautu Chin 1 Korin 9 Bible Online

1 Korin 9 - Lautu Chin bible

1 Korin 9

¹Kama hing hya a zangpa pakha cuo naa ang? Kama hing lucuotuv pakha cuo naa ang? Ima Byipaapa Zingsuv zaa hmungpa cuo naa ang?

²Malie cuota lucuotuv i cuo li zaw, niema cuo chuo taca i cuo, tahematapakieca niema ca Zingsuv chunglie lucuotuv i cuonapa a pacu satuv caakhe tana nama cuo.

³Kama naa hiehriypasietuv tie i palienapa yi ca ama hing tana a cuo.

⁴Ma re kawlie hing sa hne tiy hmung a tla va pama?

⁵Lucuotuv hrangpa tie, Abyipa nuta zaw hne Piter haahingta ma khy tlawna luo hing zangtuv napuv zaw a paziysalena naw hnyi ra va pama?

⁶A cuo li kie Barnabas hne kama kyalya hingma ma hringna cuota rehrie li pata a aw the li riypata a cuo puv?

⁷Ahungma ama tuokaa hmuo pata rieka re a hrie buo? Ahungma a thyi thyikha hmuo ce li pata mingsuv a cyi buo? Ahungma a tuv chung taa a pyapa a hnungtiy dang li pata tuv a khie buo?

⁸Hingpa hing cawsaa hmungna kuo luo taata i ripa a cuo ma? Phungbie zaw ta hinghaahingtana a ri cuo vama?

⁹Moses phungbie chunglie ta, “Suo a ciy nguoluopa cuetungpa kha a hmya hy kha ung,” a ta. Khazing ta a ri khingpa hing cuetungpa cuo tama a cuo?

¹⁰Kiema cuo hingta a ripa cuo'a vama? Kiema cuota aa capepa tana a cuo. Tahematapakieca le a thawpa ta a nguopuona hne thaw te, sacuo a ciypa zaw thyipaa kha hmung ra riypa a nguopuona hne tana aa ciy.

¹¹Niema'a lie thlaapa saciy kha tuv pate niema'a taata chuelyi chechiy kha ma hmung kieca a hluv tuv nama ta ma?

¹²Cawsaa hrangpa tie ta niema'a taata hinghaahingta hmung riypa amaa nguopuo kieca kiema changchiy ca a hluv vie ta a nguopuo riypa cuo va pama? Cuorasala, cahaa cata hmung riypa hing a zue buo va puv, Khrih thuophaabie luo a khuotuv ma cuo li riypata hmangting kha a ang tuv ta ma ang.

¹³Biena-ing lie re a hriepa tie ca ning riypa kha biena-ing taata hmung yite, bienatluophie lie hriykhung rina a tuepa tie zaw ta hriykhung rina taata cuvu ama hnyi tapa kha pachang va ung cama?

¹⁴Cahaa cata thuophaabie a ripa tie zaw thuophaabie rina taata ama riy amaa caw riypatana a cuo tapata Abyipa bie pi pata a cuo.

¹⁵Cuorasala hing hmung riypa hing i hmuopa aw vyi. Hingpa caa zaw hing cahaapa byana hmung riypata i capepa cuo vyi. Tahematapakieca hing a hruo i tlekhyipa i daahmang hing pakhakha ta khaapahmuo a cuo li pata a tuepa laa taca a thiy hmuo i thiy khing vie.

¹⁶Thuophaabie na i ri tapa a cuo kieca a hruo i tlena riypa aw vyi. Tahematapakieca i ri hrahring riypatana a cuo. Thuophaabie hingna i ri va tapa kieca chiesapa tana i cuo aa.

¹⁷Kama ri tana thuophaabie hing i ri tapa a cuo kieca lawmuo hmung riypa i hnyi aa; cuorasala kama ri ta a cuo li kieca hrie riypata naw pipa tana i cuo.

¹⁸Khaapa hingma i lawmuo ca a cuo? Hingpa hing tana a cuo: muo pi li pata thuophaabie rithena hmung ang te, i hmung riypa muo la li pata thuophaabie i ripa hingna a cuo.

¹⁹Cacuonakawta kama ca ahung sii hmuo i cuo li pata, cawsaa hluv vie hmung khu riypata kama hne kama kha cawsaa bangkhuo sii ta i tue.

²⁰Judah ming i la thena riypata Judah ming'a luo kha Judah ming haata i tue; Moses phungbie rawlie i hring li raalaa pata Moses phungbie rawlie a awpa tie kha i la khuna riypata phungbie rawlie a awpa tie'a luo kha phungbie rawlie a awpa pakha haata i tue.

²¹Phungbie le luo a awpa tie i la khu na riypata phungbie le luo a awpa tie'a luo kha phungbie le lie a awpa pakha haata i tue.

²²Thaazuo a dyapa tie i la the riypata thaazuo a dyapa tie'a luo kha thaazuo a dyapa haata i tue. A cuo khuna chung ta chekha zawchuo khuo khu riypata cawsaa bangkhuo luo kha cuona ting ta i hrawle.

²³Hing bangkhuo hing thuophaabie kawlieta i tuepa cuote a thluechiy i hraw ra khing nakawtana a cuo.

²⁴A ruo azuena lie kha a ruopa bangkhuo amaa zue raalaa pata pakha dyina lawmuo a hmung tapa kha pachang va ung cama? Cacuonakawta lawmuo hmung riypata a ruo tie ung.

²⁵Azuena lie a zue ra khingpa ca amaa cuv ning kha hmangting lieta iema hne iema khuopuv ta amaa uv. Cahaa cata ama tuepa ca a ra thepa paapaapa lakhuv hmung riypatana a cuo. Cuorasala kiema ca a ra the lipa paapaapa lakhuv hmung riypata a cuo.

²⁶Cacuonakawta cuokaa hnyi li pata a ruo cakhaw va ang. Cawsaa pakha ta thliy a phaw cakhawpa haakhata phaw va ang.

²⁷Cuorasala malie dyi kha chang pata kama tlaku thawpa i cuo sue li riypata i pangpa kha khuo ta i hri.