Read Lautu Chin 2 Korin 1 Bible Online

2 Korin 1 - Lautu Chin bible

2 Korin 1

¹Khazing khingna ta Khrih Zingsuv lucuotuv a cuopa kama Paul hne i nuta Timote ta, Korin khy lie a awpa, Khazing khrihsaabuv hne Akhaia pe khy ting ta a awpa mingpathepa tie'a luo caa maca paphya yi.

²Ma Paa Khazing hne Abyipa Zingsuv Khrih'a taata vihnyina hne diena ca nama cunglie aw mangsue.

³Ima Byipaapa Zingsuv Khrih a Paa hne a Khazing, ngie malie a chituv ma Paa, hnaanguona Khazing ca pathuosa pata cuo mangsue.

⁴Riethyi vuosuona bangkhuo lie hnaa malie a panguotuv cuote, cahaa cata kiema zaw ta ama'a taata ma hmungpa hnaapanguona kha hmuo pata riethyi vuosuona a ang rapa tie kha hnaa ma panguo ra yi.

⁵Tahematapakieca Khrih te-angna bangkhuo lie a hraw rapa ma cuopa haata Khrih thueta hnaapanguona zaw a hmungpa ta ma cuo.

⁶Kiema na riethyi vuosuona a hmung puv tapa kieca niema hnaanguona hne khuona cuo tana a cuo. Kiema na hnaapanguopa ta a cuo puv tapa a cuo kieca niema zaw hnaapanguopa cuo ung cate, kiema ima hmungpa te-angna kha palung pasiyna hne nama ang khu na riypata thaazuo nama hmungna ta a cuo.

⁷Niema cuota maa nguopuona ca a cahang buo'a vyi; tahematapakieca kiema te-angna namaa hraw pahaata hnaapanguopa ma cuona zaw namaa hraw ra aa tapa kha ma pachang.

⁸Uvnu hne sieta zaw,[1] Asia ruo chunglie riethyi vuosuona ma angpa kha pachang li pata nama aw riypa khing va puv; tahematapakieca khuopuv ta, ma ang khu li na te ta malie pavy yite hring riypa hmuo zaa nguopuo khu va puv.

⁹Thiy riypata bie ripa pa tana ma cuo tli tapatana maa zaa rue. Cuorasala hinghaahingta a cuopa ca kiema hne kiema kha a ring li pata a thiypa a pathu pakhaatuv Khazing maa ring the riypa khatana a cuo.

¹⁰Kiema kha ciy aa chiypa thiyna chung taata malie a khuopa ama ta malie a khuo canyi aa. Thlaachuona ta malie namaa bya pahaata, malie a khuo canyi aa tapata ama'a lie kha maa nguopuo.

¹¹Cacuonakawta cawsaa hluvpuv thlaachuona thueta, kiema ma hmungpa thluechiyna kawlie hingta, cawsaa hluvpuv ta kiema cuopa ta alawna bie ama ri aa.

¹²Kiema maa palesakhyipa, ma chiephathleduona ta tehte a khuopa ca: hing chuelyi lie ma hringzya hne niema hne maa pazuena lie hing chuelyi singna ta cuo li pata Khazing vihnyina hne pathiypalung hmisi tana a cuo tapa kha a cuo.

¹³Tahematapakieca niema nama ri khupa hne nama pachang khupa ri li pata a hrangpa suokha hmuo niema'a luo ma vya capepa aw vyi.

¹⁴Niema ta a chebuo nama pachang tlipa haahingta a chuona te ta nama pachang aa tapa kha icaa nguopuo yi; cahaa cata Abyipa Zingsuv ning a vya chiy tiyta kiema ca niema a palesakhyipa cuo'a pate niema zaw kiema a palesakhyipa nama cuo aa.

¹⁵Hingpa hing a siesa pata i pachang nakawta, palungtluona lehning nama hmung riypata niema'a luo ica vya tlaw taa khing yi.

¹⁶Masidonia luo i tlawpuo pata ca vya tlawpaa khing yi ang te, Masidonia taata niema'a luo vya kaa pakhaa pata, Judea luo ina pathlie riypa ung cata i khing.

¹⁷Hinghaahingta i tue khing tiyta a tuebung a tuethawpa i lu ma? Cuokha chunglie ta, “A cuo, a cuo” ama ta khu taata, “Cuo vyi, cuo vyi,” a ta pakhaapa chuelyi cawsaa cakhawpa tie haata i tuepa a cuo ma?

¹⁸Khazing ca zangtluo aa tlapa a cuopa haata, niema'a lie ima ripa bie ca, “A Cuo hne Cuo Vyi,” tapata a cuo riypa cuo vyi.

¹⁹Tahematapakieca, Silvanus hne Timote hne kama ta niema'a lie ima phupa Khazing Saacapaa Zingsuv Khrih ca, “A cuo hne Cuo vyi,” a pahlawpa ta cuo vyi. Cuorasala ama'a lieca, “A cuo,” tapatana a cuo pari.

²⁰Tahematapakieca ama ca Khazing biekuona bangkhuo lie kha, “A cuo,” tana a cuo. Canakaw ca muo Khazing pathuosa riypata Zingsuv thueta, “Amen,” ma ta pata a cuo ta.

²¹Cuorasala kiema hne niema hne Khrih chunglie malie pa-aw sa te sathu malie a pathuvpa ca Khazing tana a cuo.

²²Kiema cuota malie a chipa paciepa bangkhuo suokha hnang suokha ta ima hmung thena riypata ma cunglie kha caa malie khe te, ma pathiypalung lie Thlaapa malie a pi.

²³Naa pachangkhyituv ca Khazing ta a cuo: Korin luo i vaw pakhaa lipa ca niema nama thaa duo naase ica ta nakaw yi ta a cuo.

²⁴Nama zangna cunglie kha uv caa ting vayi ang; cadyiseca nama palung aa nuona riypata niema hne re a hrie pakhawpa tana ma cuo vie hriy, tahematapakieca niema ca zangna lie a cusa pata namaa daa.