Read Lautu Chin 2 Korin 10 Bible Online

2 Korin 10 - Lautu Chin bible

2 Korin 10

¹Nama hmiekunglie i aw ningta a pane ang te luohlaa luo i aw tiyta riephasa pata bie a ri thepa kama Paul ta Khrih nangnena hne duena ta paa ica kie yi.

²Niema hne i aw ning hing chuelyi phung[5] tana ma aw tapata a ruepa tie kha a nguona hne riephasa pata a du a hu li riypata paa ica kie yi.

³Cawsaapa haata[6] ma aw hmisi, cuorasala ma cawsaa cuona ta[7] rie a du va puv.

⁴Tahematapakieca kiema ma rie a duna cehre ca cawsaapa[8] cehre ta cuo vyi, a cusapa carie adaakhuona piehu zaw a para khupa Khazing cehre khata na ama cuo.

⁵Khazing pachangna kha a pakhuopa bie a ina hne a palena kha para pate, Khrih ri a ngie riypata cawsaa ruena bangkhuo kha sii ta ma tue yi.

⁶Nama ri-angiena tluo a tling khu taata ri a ngie lipa bangkhuo kha duote riypata a ting pacie pata ma aw.

⁷Niema ca hmang kha a cungphang dyi ta na nama mang. Khrih huopa tana ma cuo namaa ta nguo kieca, niema haakhata kiema zaw Khrih huopa ma cuo rapa kha a thyi tie ung.

⁸Abyipa ta niema kha para riypata cuo li pata sathaw riypata malie a pipa nawhnyina kha i palesakhyi tuv kiezaw ma a zaakhyi va ang.

⁹I caapaphya ta caa pachiypa yi i lu riypa hing khing va ang.

¹⁰Tahematapakieca, iema ta, “A caa ca kacu te a cahra, cuorasala a pangpa ta a aw puo kieca khaapapuv ta cuo tlung vyi, a bie zaw naathlie tluo'apa aw vyi,’ ama ta.

¹¹Cahaapa cawsaa zaw cata, ma aw li pata caa lie ma ripa hing, ma aw thue zaw ta ma tue aa tapa hing pachang yi se.

¹²Iema hne iema a pathuosa patie hne khata ca a pakhing pata a ripuo nguo'a vayi puv. Cuorasala iema hne iema kha malie hneta amaa pakhing tiyta ama ngaanapa khana ama paluo sa.

¹³Cadyiseca, kiema hing a hlyikhung ta a pale'a va puv, Khazing ta malie a pipa re, luriy chunglie khana ri'a pate ma aw aa. Capa chunglie ca niema'a lie ma hriepa re zaw hing a te ra.

¹⁴Niema'a luo ma vya chiy ning kha ma ruoriy law pata ma vya chiypa cuo vyi; kiema ca Khrih thuophaabie hneta niema'a luo a vya chiy taapa tana ma cuo.

¹⁵Kiema ca a luriy law pata malie hrie ciepa re lieta a palepa cuo va puv; cuorasala kiema maa ruechuopa ca, nama zangna kha le viele'a te, niema hrawlie ma rehriena ruo zaw kha a ku viele riypa khana a cuo.

¹⁶Cahaa cata niema nama awna ruo kha law pata, malie tie hrie ciepa re lie kha a pale li pata, thuophaabie kha ma ri khu aa.

¹⁷“A palepa ca Abyipa'a lie dyi kha a pale se.”

¹⁸Tahematapakieca Khazing ta a khingpa ca ama hne ama a pathuosapa cuo li pata Abyipa ta a pathuosapa khana a cuo.