Read Lautu Chin 2 Korin 11 Bible Online

2 Korin 11 - Lautu Chin bible

2 Korin 11

¹I ngaapuo hriehruv kiezaw a ang zya ina the riypa ung cata i khing. Na ang law tie ung!

²Khazing ta hie aca tlie pahaayita kama zaw hie ica tlie ra yi. Tahematapakieca lesaapathenung kha pakha dyipa a navaapa'a luo pipa haata niema kha Khrih'a luo pi riypata bie i kuo.

³Cuorasala pariy ta, a zyatena ta Evi kha a dungpa haata, nama pathiypalung kha a dangsa pata hne a pathesa pata Khrih'a luo namaa pina taata dungpa nama cuo sue riypa kha i ciysa.

⁴Cawsaa pakhakha ta kiema ma phupa cuo li pata Zingsuv hrangpa kha a phu kie cuose, a cuo li kie, niema ta nama cuhluo ciepa thlaapa kha cuo li pata thlaapa hrangpa kha a paw ung cate, niema nama cuhluo ciepa kha cuo li pata thuophaabie hrangpa zaw kha namaa paw paluo lawmaw.

⁵Hingpa lucuotuv a suocepa nama tapa tie laa hingta i ne vie tapata a rue va ang.

⁶Bieri luota i the li zaw pachangna luo taca a ne va ang; hmangting kaw kha a luo phangting ta a siesa pata ma paluo sa tli.

⁷Niema kha cyicalang riypata kama kha a pane ang te, Khazing thuophaabie kha a selawpa ta ica changpa yi ca i sue maw?

⁸Niema cuota re hrie riypata iema'a taata abyana i lapa ca Khrihsaabuv hrangpa taata i chuvpa yi tana a cuo.

⁹Niema'a lie i aw ning, i husa ning kha ahunghmuo nama hmang ca pariy vayi ang, Masidonia taata a vawpa i viesaa tie na i hupa kha naa pi yi. Cacuonakawta a cuo khu chung ta nama hmang ica pariy li riypa yi kha i za cahriy pahaata hmie luo zaw i cahriy aa.

¹⁰Khrih biehmisipa kha i chunglie a aw pahaata, i palenapa hing Akhaia pe lieca ahungtahmuo padie khu'a vayi.

¹¹Khaapanakawma? Ica due li nakaw yi ma? Ica duepa yi ca Khazing na a pachang.

¹²Kiema hne hingta amaa khing amaa nguo tapata cawsaa ta ama rue riypa a khingpa tie ama khingna kha a du riypata i hriepa hing i hrie pazue kalie aa.

¹³Tahematapakieca cahaapa hruotle tie ca lucuotuv pakhipa, malie a dungthepa rehrietuv cuo yite, Khrih lucuotuv pakhipa tie tana ama cuo.

¹⁴Kharuehaa riypa cuo vyi. Setaa hmuota khena avuoming aa cuo pakhi.

¹⁵Cacuonakawta a rehrietuv tie ta adangna rehrietuv tie haata amaa cuo pakhi kieca kharuehaa riypa hmang cuo vyi. A chuona lieca ama tuepa hne aa phuvpa khana ama pahriy aa.

¹⁶I ri canyi, ahungtahmuo a ngaapa ta na rue kha yi se; ina rue kiezaw ungcama, a cawta i pale the ra riypata na rue thluo tie ung.

¹⁷Ata riephasa pata i palepa hing Abyipa nawhnyina ta i palepa cuo vyi, cuorasala a ngaapa haatana i pale pata a cuo.

¹⁸Ama cawsaa cuona[9] ta a palepa ama hluvsa nakawta i pale ra aa.

¹⁹Tahematapakieca, nama singsa nakawta a ngaapa tie kha nama chaw khusa.

²⁰Niema ca sii ta caa ziypa tie, caa dung caa viepa tie, caa mangbungpa tie, nama be caa tungpa tie zaw kha namaa ngiethe khusa.

²¹Cahaapa tuena kawlie ma phahlasapa ca nangzaa na a chiy puv! Cuorasala, pakhakha ta hmang suokhakha kawlie aa pale kieca, a ngaapa haata ri thluo'a ang, kama zaw capa kawlie ca i pale ra aa.

²²Iema ca Hebru ming ta ama cuo ma? Kama zaw i cuo ra. Israel ming ta ama cuo ma? Kama zaw i cuo ra. Abraham ciypathla ta ama cuo ma? Kama zaw i cuo ra.

²³Iema ca Khrih rehrietuv ta ama cuo ma? A ngaapa haata mang ri'a ang, Khrih rehrietuv pha vie tana i cuo. Khuo vie ta re i hrie, thaw a hluv vie i tla, ri tie li na tuv yite, vuotaasiy thiy'a nangna yi hluvpuv i taw.

²⁴Yisawliy tlingna yikha dyi a bupa sungpe ta china kha Judah ming kuv taata yipangaa i ang.

²⁵Asung ta yi thung ina tuv yi. Alung ta luokha ina vaa yi. Tiypalaw ta luothung na rakhyi te zuo kha hne ning kha chung riyliy tiy ta ina phya.

²⁶Khytlawna lieta, cavaa tiy ciy aa chiypa, damie kuv lie ciy aa chiypa, i cawsaa zaw'a taata ruvnaana, Jentail ming'a taata ruvnaana, khypuv chunglie ciy aa chiypa, ruochung lie ciy aa chiypa, riyliy chunglie ciy aa chiypa, hne uvnu hne sieta[10] pakhipa tie'a taata ruvnaana zaw kha i ang.

²⁷Riethyisa pata rehrie ang te ruvnaana chunglie i hring. Zuokhydyi mingsaa pasing li pata i aw. Nangdiy tiyhrie pata hne sa ning li pata i aw. A kangsapa chunglie abuv-ase riy hnyi li pata i aw.

²⁸A hrangpa ca ri li pata khrihsaabuv kaw i pacuonapa hingta ningting ta a vy ta ina vy.

²⁹Pakhakha thaazuo a caw kie, i thaazuo caw li pata i aw'a ma? Pakhakha suena chunglie aa lie kie, i se hie li pata i aw'a ma?

³⁰I pale kieca, i thaadyana a paluo sapa hmang kawlie khana i pale aa.

³¹Khazing hne Abyipa Zingsuv Paa ta i hang lipa kha a pachang, ama ca chuozaa pathuosa pata cuo mangsue.

³²Damaskas lie i aw ning kha siepahruo Aretas kuv rawlie a awpa muokiybyipa khata kama patuv riypata khypuv kha a cadung sa yi.

³³Cuorasala khypuv dungkhuona piehu thlaluo-aw taakhata pasyi ta na pachung yite ama kuv chung taata i law.