Read Lautu Chin 2 Korin 12 Bible Online

2 Korin 12 - Lautu Chin bible

2 Korin 12

¹A thlahnenapa khaahmuo a aw li zaw ta i pale a hu, cuorasala Abyipa’ taata muocuo hne biephu kaw tana a cuo aa.

²Ma hnang luo kung hraa hlyipaliy ning kha Khrihsaapapaa pakha ca avuo duothungna te ta ama lathawpa kha i pachang. A pangpa tama a cuo cuo vama tapa ca pachang va ang, Khazing na a pachang.

³Capa a pangpa tama a cuo, cuo vama pachang va ang, Khazing na a pachang i tapapaa ca

⁴Paradais luo calang yite cawsaapa ri riypa hne cawsaapa chang riypata pahya lipa bie kha a thyi.

⁵Capapaa cuo cata i pale aa, cuorasala i thaadyana kawlie ta li pata ca kama kaw ca a pale'a va ang.

⁶I pale khing pata a cuo kiezawma a ngaapa ta ca cuo'a va ang, tahematapakieca a hmisipa dyi kha i ri'a nakawta a cuo. Cuorasala pakhakha ta ina hmungnapa hne kama'a taata a thyipa laata a suo vie ta ina hmung li riypata a pale'a va ang.

⁷Cacuonakawta a hlyi vie ta i hmungpa biephu nakawta i pale tuv li riypata Setaa pathliepa haata re a hriepa a ahling suokha kha i pangpa chunglie hing ina pi.

⁸Hing hmang hingta ina thuse riypata Abyipa'a lie kha yi thung te paa i kie.

⁹Cuorasala, Abyipa ta, “I vihnyina hing na cuota aa desa, cahrana ca thaadyana liena a tling,” ina ta. Cacuonakawta, Khrih cahrana ca kama'a lie a aw riypata i thaadyana lie kha khuo vie ta i palung tluo te i pale.

¹⁰Cacuonakawta, thaadyana, esena, ruvnaana, hrisaathieruena, hne vuochina zaw kha palungtlingsa pata Khrih cuota i ang; tahematapakieca i thaadya ning khana i cahra ningta a cuo.

¹¹I ngaa ciemuo! Niema na naa pangaa ungciy. Hmisi ta kieca niema na naa pathuosa riypata a cuo ungciy. Tahematapakieca kama hing khaahmuo i cuo li raalaa pata lucuotuv a suocepa tie laa hingta a ne vie changchiy va ang.

¹²Lucuotuv hmisi cuona ca palungpasiyna, pamangsana hne kharuehaa hmang tuena ta niema hrawlie paluo sa pata a cuo tli.

¹³Hmangriy ta icaa tue lipa yi ri li pata Khrihsaabuv hrangpa tie laata khaapalie khama a chie vie ta ica tue yi? Hingpa i paana hing ca naa ngiethe tie ung!

¹⁴A yithungna niema'a luo a vaw riypata a ting cie pata i aw tli. Nama cuota hmangriy cuo'a va ang, tahematapakieca nama hnyipa sue cuo li pata niema na icaa hu yi. Saata zaw ta nungpaa cuota sue pacung riypa cuo li pata, nungpaa tuv ta saata zaw cuota sue pacung riypata a cuo.

¹⁵Niema cuota i hnyipa kha palung tluoce pata a hmuopa ca kama cuo ang te, i pangpa zaw niema cuota hmuopa i cuo aa. Niema kha ica due vie thluopa yi tama kama kha na due uo li pata nama aw aa?

¹⁶Nama cuota hmangriy cuo va ang tapata rue'a ungpuv. Cadyiseca niema ta a zyatepa, cawsaa a dungpa ina ta ungciy.

¹⁷Niema'a luo i vya pathliepa pakhakha'a taakhata a thungna i huvpa aw kanaa?

¹⁸Titas kha niema'a luo tlaw riypata chang ang te, zangtuv uvnu pakha kha ama hne i vya pathlie. Titas zaw niema'a taata athungna a lapa aw vyi cuo vama? Kiema ca aa lupa pathiypalung tana aa lupa re kha ma hrie pakhaw cuo vama?

¹⁹Nama hmiekungliena kiema hne kiema a paduona bie ama ri tapata malie rue pari kanaa ungciy? Zingsuv ming tana Khazing hmiekunglie bie ma ri. Duepa zaw, ma tuepa bangkhuo hing niema sathawna riypatana a cuo.

²⁰Niema'a luo i vya chiy tiyta, hinghaahingta cuo yi sala ica tapa haayita nama cuo li sue riypa hne kama zaw hinghaahingta cuose nama tapa haata i cuo li sue riypa kha i thlaa a zang. A hru a ina, hietliena, hihaana, kiema kaw dyi a pacuona, kawchie rina, caw-yina, hruotlena, a luopuv li pata hringna tapa tie nama hrawlie a aw sue riypa zaw i thlaa a zang.

²¹Niema'a luo i vya chiy pakhaa tiyta, Khazing ta nama hmiekunglie nangzaa pata ina pa-aw sa sue aa tapa kha i thlaa a zang. Cawsaa hluvpuv ta hringpyalyipa hne aparuvsuena ama za tuepa kha a ngiepachiy li pata ama awna kawlieta ngiechisa pata i caa riypa kha i thlaa a zang.