Read Lautu Chin 2 Korin 13 Bible Online

2 Korin 13 - Lautu Chin bible

2 Korin 13

¹Atalie hne hingta ca niema'a luo ica vya tlawpa yi hing a yi thungna ta a cuo. “Sue a phawna suokhakha ca pachangkhyituv pahning a cuo li kie pathung a aw kiena pacu sa pata a cuo aa.”

²Niema'a luo a yihningnapa i vaw ning kha suena zaa tuepa tie hne a hrangpa tie kyihuo khata, i vya chiy pakhaa pata a cuo kieca ca diy'a va tli yi ang hing i ta pahaa yi khata, ata luohlaa luo i aw ning hingta a raaringna i pi yi.

³Khrih na kama'a taata bie a ri tapa kha a cuo hmisi ma tapata nama pachang khing. Khrih hing niema'a lie re a hrie tiyta a thaa dya vyi, a cahra.

⁴Tahematapakieca ama ca thaadyasa pata vieluo cunglie ama thie, cuorasala ata hing ca Khazing cahrana hneta a hring. Kiema zaw ama haata ma thaa a dya, cuorasala niema'a lie re ma hrie tiyta Khazing cahrana thueta ama hne ma hring aa.

⁵Niema hne niema kha zangna chunglie ma aw ma tapata a mangpasie tie ung. A pacie pachiy tie ung. Zingsuv Khrih nama chunglie a awpa kha a pasie va ung cama? Namaa pasie li kieca namaa mangpasiena lie tling va ungciy!

⁶Ma tlingpa kha nama hmung aa tapata i nguopuo.

⁷Tuesuena nama hnyi li riypata Khazing'a luo thlaa maca chuopa yi. Kiema ca a mangpasiena lie ma tling tana ta cuo li pata, a tling lipa ma lu zaw ta niema ca aa hmuopa kha nama tue riypata a cuo.

⁸Tahematapakieca biehmisipa ca maa daakhyi ta li pata ca a du taca a du khu va puv.

⁹Kiema ma thaa a dya zaw ta niema nama cahra kieca ma palung a tluo. Cacuonakawta cawsaa tluotlingpa nama cuo khu riypata kiema zaw thlaa ma chuo.

¹⁰Cacuonakawta luohlaa taata hingpa caa hing i vya cape pata a cuo, tahematapakieca niema parana cuo li pata sathawna riypata Abyipa ina pipa nawhnyina hing niema'a luo i vaw thueta khuosa ta i hmuo sue lina riypatana a cuo.

¹¹A hnangcawce ta, uvnu hne sieta zaw, nama tluopa ta za aw mya ung! Nama hringzya zaa pare ungla paa ica kiepa yi hing naathlie tie ung. Nama palung a lu sala diena hne aw tie ung. Cata a cuo kieca duena hne diena Khazing ca niema'a lie a aw aa.

¹²Pakha hne pakha kha a pathepa a pahnuona ta bie a chang tie ung. Mingpathepa tie bangkhuo na bie a caa chang yi.

¹³Abyipa Zingsuv Khrih vihnyina, Khazing duena, hne Thlaapa Pathe a viesaana ca nama bangkhuo cunglie aw mangsue.